Ձեր վստահելի աղբյուրը

Այս գիշեր ճանապարհատրանսպորտային պատահարի հետևանքով Գրիգոր Նազարյանն ու Մարկ Սաղաթելյանը Պետական բժշկական համալսարանի «Հերացի» հիվանդանոցային համալիր են տեղափոխվել ծանր տրավմատիկ շոկով, պոլիտրավմաներով, բարդ կոտրվածքներով: Ներկայում երկուսի վիճակն էլ կայուն է, պարզ գիտակցության մեջ են: Ինտենսիվ բուժման փուլում են գտնվում: Այս մասին ասուլիսում ասաց Բժշկական գիտությունների թեկնածու, պրոֆեսոր, Պետական բժշկական համալսարանի «Հերացի» հիվանդանոցային համալիրի Անեսթեզիոլոգիայի և ինթենսիվ թերապիայի կլինիկայի ղեկավար Իրինա Մալխասյանը:

Միաժամանակ նա նշեց. «Այս պահին նրանց կյանքին վտանգ չի սպառնում: Առաջնային բարդությունները հաղթահարված են»:
Նյարդավիրաբուժական ամբիոնի և կլինիկայի ղեկավար Ռուբեն Ֆանարջյանն ասաց, որ երկուսի մոտ առկա է զուգակցված գանգուղեղային և ողնաշարաողնուղեղային վնասվածքներ, գլխուղեղի ցնցում, որը համարվում է թեթև աստիճանի գանգուղեղային վնասվածք: Մարկ Սաղաթելյանի մոտ առկա է նաև ողնաշարի, պարանոցային և գոտկային հատվածի ողերի ելունների կոտրվածք: Դեռևս պետք է անցնեն մի շարք հետազոտություններ, հսկողություն տակ են գտնվում: «Երկու հիվանդի մոտ էլ նյարդավիրաբուժական իմաստով որևէ ֆունկցիոնալ խանգարում, ողնուղեղի վնասվածք չկա, այլ միայն ոսկրային վնասվածքների մասին է խոսքը, որը պահանջում է բուժում»,- ասաց նա:

Վնասվածքաբանության և օրթոպեդիայի կլինիկայի ղեկավար Արսեն Ազիզբեկյանի խոսքով, երկու հիվանդն էլ ներկա դրությամբ գտնվում են բավարար վիճակում, հարկավոր է բավականին երկար կոնսերվատիվ բուժում:

Նախորդող նորություն` Պատահարի հետևանքով Մարկ Սաղաթելյանը և Գրիգոր Նազարյանը տեղափոխվել են հիվանդանոց