Ձեր վստահելի աղբյուրը

«Մենք միշտ սխալ տրամաբանությամբ ենք առաջնորդվում` կոնկրետ Հայաստանի վերաբերյալ օրակարգում զեկույց կա թե ոչ, որովհետև բոլոր խնդիրներն ու նախաձեռնությունները, որոնք քննարկվում է ԵԽԽՎ-ում ուղղակիորեն առնչվում են նաև Հայաստանին: Այնպես որ ասել, որ եթե Հայաստանին վերաբերող բանաձև չկա օրակարգում, ապա այս նստաշրջանում մենք անելիք չունենք ճիշտ չէ»,- Panorama.am-ի հետ զրույցում նշեց ԵԽԽՎ-ում հայկական պատվիրակության անդամ Նաիրա Զոհրաբյանը` ներկայացնելով նստաշրջանի օրակարգի մանրամասները:

Ու թեև Հայաստանին վերաբերող ուղղակի հարց օրակարգում ներառված չէ, ըստ տիկին Զոհրաբյանի անելիքները շատ են:

Մասնավորապես. «Նստաշրջանի օրակարգում բազմաթիվ հարցեր ու բանաձևեր կան, որոնց կոնտեքստում մենք իհարկե բարձրաձայնելու ենք նաև Հայաստանին վերաբերող խնդիրները: Մասնավորապես, ես խոսելու եմ վերջին շրջանում Ադրբեջանի կողմից հայ-ադրբեջանական սահմանին ահագնացող ագրեսիոն գործողությունների մասին, որոնց արդյունքում եղան բազմաթիվ անմեղ զոհեր»,- տեղեկացրեց մեր զրուցակիցը:

Հիշեցնելով հայկական պատվիրակության կողմից ընդունած մորատորիումի մասին, այն է` չխոսել Ադրբեջանում տիրող հակադեմոկրատական վիճակից, որպեսզի ադրբեջանական կողմը դա ընկալի որպես սթափության կոչ և նույնպիսի գործելաոճ սկսելու օրինակ դիտի, ինչը երկու պատվիրակություններին հնարավորություն կտար ձևավորել գոնե փոխվստահության մթնոլորտ, պատգամավորը նշեց, որ ադրբեջանական պատվիրակությունը ուղղակի անսաց և շարունակեց իր մարտավարությունը. «Ես մի քանի առաջարկություններ ունեի, որոնք սառեցրել էի մորատորիումի պատճառով, բայց հիմա արդեն այս նստաշրջանում դրանք բարձրաձայնելու եմ: Դրանցից մեկն այն է, որ Եվրոպայի խորհրդի մարդու իրավունքների պաշտպանին առաջարկելու և պահանջելու եմ միջազգային փորձաքննության ենթարկել ադրբեջանական դասագրքերը: Եթե խոսվում է երկու ժողովուրդների միջև վստահության ինչ-ինչ քայլեր կատարելու մասին և ԵԱՀԿ Մինսկի խմբի համանախագահները իրենց բոլոր հայտարարություններում անընդհատ խոսում են փոխվստահության մասին և որ երկու կողմերի նախագահները պետք է իրենց ժողովուրդներին տանեն խաղաղության, ապա ես ՄԽ համանախագահներին կոչ եմ անելու ընդհանրական հայտարարություններ անելու փոխարեն իրենց ողջ ջանքերը գործադրել ու կոչերն ուղղել առ ադրբեջանական կողմը: Այն ելույթը, որ Ադրբեջանի նախագահն ունեցավ «Եվրանեսթ» ԽՎ-ի բացման ժամանակ ուղղակի ատելության, ռասիզմի և հայատյացության խորացման կատարյալ շեդևր կարելի է համարել»,- նշեց Ն.Զոհրաբյանն ու ընդգծեց, որ այս ամենը, ինչ ներկայացրեց մեզ, ներկայացվելու է նաև ԵԽԽՎ բարձր ամբիոնից:

Ադրբեջանական դասագրքերում, որով դաստիարակվում են սերունդներ, հայը ներկայացվում է որպես մարդասպան ու ջարդարար: Արդյո՞ք այդ սերունդը, հետաքրքրվեց պատգամավորը, կարող է մտածել ինչ-ինչ վստահության կամուրջների մասին:

Հաջորդ հարցը, որ պատրաստվում է վեհաժողովում բարձրացնել Նաիրա Զոհրաբյանը, հասցեագրված է ԵԽԽՎ նորընտիր նախագահ Ժան Կլոդ Մինյոնին, ով կարծես թե նոր նախաձեռնություն է ուզում սկսել` իր ձևակերպմամբ` տեսնելու, թե ի՞նչ հնարավոր լուծում կարելի է տալ ԼՂ հարցով ենթահանձնաժողովի աշխատանքներին և փորձում է հանդիպում նախաձեռնել հայկական և ադրբեջանական պատվիրակությունների միջև, որպեսզի հասկանա այդ խնդրի վերաբերյալ կողմերի դիրքորոշումը. «Իհարկե ինձ համար անհասկանալի է, թե ինչը հասկանալի չէ Մինյոնին այդ դիրքորոշման առումով: Այդուհանդերձ կարծում եմ Լեռնային Ղարաբաղի հարցով ենթահանձնաժողովի մասով ևս ինչ-ինչ քննարկումներ սպասվում են, այնպես որ բավականին ակտիվ նստաշրջան է լինելու»,- հավելեց հայկական պատվիրակության անդամը:

Հիշեցնենք, որ ԵԽԽՎ-ում հայկական պատվիրակությունն արդեն վաղը մեկնելու է Ստրասբուրգ, որտեղ երկուշաբթի օրվանից մեկնարկելու է վեհաժողովի ամառային նստաշրջանը: 

Նախորդող`ԵԽԽՎ նիստերին հայկական պատվիրակությունը կմասնակցի հին կազմով