Ձեր վստահելի աղբյուրը

Պաշտոնական այցով Հայաստան ժամանած Ավստրիայի Հանրապետության նախագահ Հայնց Ֆիշերն այսօր նախագահական նստավայրում հանդիպում է ունեցել նախագահ Սերժ Սարգսյանի հետ` քննարկվել են երկկողմ հարաբերություններին վերաբերող մի շարք հարցեր: Իսկ ավելի ուշ նույն վայրում երկու երկրների նախագահները լրագրողներին ներկայացրեցին այդ բանակցությունների արդյունքները:

Համատեղ ասուլիսի ժամանակ Հայաստանի նախագահը նախևառաջ նշեց, որ թեև Հայաստանի ու Ավստրիայի միջպետական հարաբերությունները 20-ամյա պատմություն ունեն, բայց սա Ավստրիայի Հանրապետության նախագահի առաջին պաշտոնական այցն է Հայաստան և ըստ այդմ էլ` այն ևս մեկ կարևոր ուղենիշ է հայ ու ավստրիացի ժողովուրդների՝ ժամանակի փորձությունն անցած բարեկամության ամրապնդման ճանապարհին, ինչպես նաև լավ հնարավորություն է ուրվագծելու երկկողմ համագործակցության առավել հավակնոտ և հեռանկարային ուղղությունները:

«Մենք Ավստրիան դիտում ենք որպես բարեկամ պետություն և վստահելի գործընկեր: Դա պայմանավորված է թե՛ հայ-ավստրիական դարավոր պատմամշակութային առնչություններով և մեր ժողովուրդների միջև առկա համակրանքով, թե՛ մեր երկրները միավորող արժեքային համակարգով, թե՛ ավստրիահայ համայնքի առկայությամբ և թե՛ վերջին երկու տասնամյակում մեր միջպետական հարաբերությունների դրական փորձով»,- իր խոսքում նշեց մեր երկրի ղեկավարը:

Անդրադառնալով մինչ ասուլիսը տեղի ունեցած բանակցություններին, Սերժ Սարգսյանն ընդգծեց, որ Ավստրիայի նախագահի հետ քննարկել են տարածաշրջանային և միջազգային մի շարք խնդիրներ և վերահաստատվել է երկկողմ և բազմակողմ բնագավառներում հայ-ավստրիական կապերն ավելի խորացնելու փոխադարձ ցանկությունն ու հանձնառությունը:

Մասնավորապես արձանագրվել է, որ երկու պետությունների միջև ձևավորված առևտրատնտեսական համագործակցությունը, մշակութային, կրթական կապերը զարգացման ներուժ ունեն և պայմանավորվածություն է ձեռք բերվել լրացուցիչ ջանքեր գործադրել այդ հարաբերություններին նոր լիցք հաղորդելու համար. «Պարոն Ֆիշերի այցը նաև տնտեսական բաղադրիչ ունի: Այցի շրջանակներում ընթանում է հայ-ավստրիական գործարար համաժողով, կստորագրվի հուշագիր Հայաստանի առևտրաարդյունաբերական պալատի և Ավստրիայի տնտեսական պալատի միջև` համագործակցության վերաբերյալ: Հուսով եմ, որ համաժողովը կտա տեսանելի արդյունքներ և մոտ ապագայում Ավստրիայի ներկայությունը Հայաստանում առավել զգալի կդառնա»,- տեղեկացրեց ՀՀ նախագահը:

Երկու նախագահների հանդիպմանը քննարկվել է նաև ԵՄ շրջանակներում համագործակցության հնարավորությունները ու մասնավորապես Հայաստանի մասնակցությունը Արևելյան գործընկերության ծրագրին: Այս իմաստով ավստրիական կողմը վերահաստատել է իր լիակատար պատրաստակամությունը աջակցելու Հայաստանի եվրամերձեցման ջանքերին ու մեր երկրում իրականացվող բարեփոխումներին:

Անդրադարձ է եղել նաև Արցախյան հիմնախնդրին` դրա արդի փուլը նախագահ Սարգսյանը ներկայացրել է իր ավստրիացի պաշտոնակցին. «Մենք բարձր ենք գնահատում Ավստրիայի ցուցաբերած հավասարակշռված դիրքորոշումը Արցախյան հիմնախնդրի կարգավորման հարցում և այն հաստատակամությունը, որով Ավստրիան աջակցում է տարածաշրջանային հակամարտությունները բացառապես խաղաղ ճանապարհով կարգավորելու մեր ձգտմանը»,- այս առնչությամբ հայտարարեց երկրի ղեկավարը:

Սերժ Սարգսյանը տեղեկացրեց նաև, որ բարձրաստիճան հյուրը իրեն Ավստրիա պաշտոնական այցի հրավեր է արել. «Ինձ համար դա մեծ պատիվ է, և ես այն հաճույքով ընդունում եմ»:

Նշենք, որ մինչ մամուլի ասուլիսը Հայաստանի և Ավստրիայի նախագահների մասնակցությամբ ՀՀ ֆինանսների նախարարը և ՀՀ-ում Ավստրիայի արտակարգ և լիազոր դեսպանը զարգացմանն ուղղված համագործակցության մասին համաձայնագիր են ստորագրել ՀՀ կառավարության և Ավստրիայի Հանրապետության կառավարության միջև: