Ձեր վստահելի աղբյուրը

Մի քանի օր առաջ լրատվամիջոցները տեղեկություններ տարածեցին այն մասին, որ թուրքական կործանիչը հատել է սիրական սահմանը, ինչիչ հետո սիրական ՀՕՊ ուժերի կողմից ոչնչացվել: Միջադեպից անմիջապես հետո թուրք-սիրիական հարաբերություններն առավել են լարվել:

Թուրքագետ, ՀՀ ԳԱԱ Արևելագիտության ինստիտուտի գիտաշխատող Լևոն Հովսեփյանը Panorama.am-ի հետ զրույցում նշեց, թե անհերքելի է, որ Սիրիայի հակաօդային ուժերի կողմից խոցված թուրքական ռազմաօդային ուժերի F-4 կործանիչը խախտել է սիրիական օդային սահմանը, և դա ուղղակի սադրանք էր Թուրքիայի կողմից:

Նրա խոսքերով` դա միգուցե հատուկ իրավիճակը լարելուն ուղղված քայլ էր, որը համաձայնեցված էր արևմտյան ուժային կենտրոնների հետ, քանի որ Սիրիայում իրավիճակի կարգավորման միջազգային նախաձեռնությունները հայտնվել էին փակուղում, և դրանով իրավիճակը ի վնաս Սիրիայի փոխելուն միտված քայլ էր:

«Հարկ է նշել, որ պարբերաբար թուրքական օդուժը խախտել է Սիրիայի օդային սահմանը, սակայն միշտ Սիրիայի կողմից դրանց խոցելու քայլեր չեն ձեռնարկվել, և նման քայլը ներկա պահին ամենևին էլ ձեռնտու չէր սիրիական կողմին: Սա ուղղակի թուրքական սադրանք էր, որն ուղղված էր իրավիճակն ավելի ապակայունացնելու և միգուցե ռազմական գործողությունների համար հիմքեր ստեղծելու համար: Ռազմական միջամտության մեջ շահագրագռված է հենց Թուրքիան և հիմա պաշտոնական Անկարան այդ ուղղությամբ է փորձում նախաձեռնություններ սկսել նաև միջազգային մակարդակով` ՆԱՏՕ-ի ձևաչափով»,-նշեց Լ. Հովսեփյանը:

Արաբագետ Արմեն Պետրոսյանի կարծիքով, Սիրիայի օդային տարածք թուրքական հետախուզական օդանավի ներխուժումը և Դամասկոսի կողմից իրականացված նման գործողությունը պայմանավորված է վերջին շրջանում Սիրիայում և նրա շուրջ ստեղծված փակուղային իրավիճակով:

«Առաջին հերթին, ՍԱՀ-ի նման քայլը, հատկապես երկրի շուրջ ստեղծված անբարենպաստ իրավիճակային պայմաններում, ուղղված էր սիրիական իշխանությունների դեմ Անկարայի կողմից իրականացվող պաշտոնական և ոչ պաշտոնական գործողությունների դեմ: Սրանով, Դամասկոսը ցանկացավ ցույց տալ, որ եթե մինչ այժմ աչք է փակել սիրիական վարչակարգի ընդդիմադիրներին Թուրքիայի ցուցաբերած համակողմանի աջակցության, միջազգային տարբեր հարթակներում թուրքական տարբեր աստիճանի պաշտոնյաների թշնամական և անհանդուրժողական արշավի հարցերում, ապա այլևս չի կարող ձեռնպահ մնալ թուրքական իշխանությունների կողմից Սիրիայի ինքնիշխանությանն ուղղված նման գործողություններում. և արդեն հունիսի 25-ին սիրիական ՀՕՊ համակարգի կողմից առանց սիրիական կողմին նախազգուշացնելու և իբր խոցված օդանավի անձնակազմին փնտրելու նպատակով Սիրիայի օդային տարածք ներխուժած երկրորդ օդանավի ուղղությամբ արձակած կրակը խոսում է սիրիական իշխանությունների վճռականության մասին:

Մյուս կողմից, թուրքական կողմի այսօրինակ գործողությունները կարելի է դիտարկել որպես ուղղակի սադրանք, որոնք ունեն կոնկրետ նպատակներ: Սա ևս մեկ առիթ էր` Բաշար Ալ-Ասադին և նրա գլխավորած վարչակարգի դեմ միջազգային իրավունքի նորմերը խախտելու և տարածաշրջանում ապակայունացնող գործողություններ իրականացնելու հարցում միջազգային հանրության քննադատության տարափն ուղղելու հարցում: Բացի այդ, պետք է նշել, որ նման գործողությունները ազդակ էին` ուղղված թե սիրիական իշխանություններին և թե նրանց արտաքին հովանավորներին առ այն, որ Արևմուտքը կարող է ներխուժել Սիրիա առանց ՄԱԿ-ի ԱԽ-ի համապատսխան բանաձևի` կիրառելով ՆԱՏՕ-ի կանոնդրության 5-րդ հոդվածը: Ի դեպ, ՆԱՏՕ-ին սիրիական հակամարտության մեջ ներքաշելուն ուղղված թուրքական իշխանությունների սա արդեն երկրորդ փորձն էր, և նման սադրանքների, համոզված եմ, ականատես կլինենք նաև հետագայում»,- եզրափակեց Ա. Պետրոսյանը: