Ձեր վստահելի աղբյուրը

«Քանաքեռ-Զեյթուն» բժշկական կենտրոնում, որը ստեղծվել է 8-րդ բուժմիավորման հենքի վրա, բուժաշխատողների մի մասի շրջանում խուճապ է: Pamorama.am-ը դժգոհություն էր ստացել բուժաշխատողներից այն մասին, որ բուժմիավորման գինեկոլոգիայի բաժանմունքը ընդհանրապես փակվելու է, իսկ աշխատողների ճակատագիրն անհայտ է:

Այս բողոքի հետքերով պարզեցինք, որ իսկապես, 8-րդ բուժմիավորման կազմից գինեկոլոգիայի բաժանմունքը փակվելու է և ընդգրկվելու է նոր ստեղծվելիք «Դավիթ Անհաղթ» կոչվող բժշկական կենտրոնի կազմում: Սակայն այս դեպքում էլ նույն բաժանմունքի աշխատողների հետագա ճակատագիրն անհայտ է մնալու:

5-6-րդ դարերում ստեղծագործած հայ հին փիլիսոփա, նեոպլատոնականության հետևորդ Դավիթ Անհաղթի անունով կոչվող այս բժշկական կենտրոնն իր կազմում ընդգրկելու է մինչ այդ «Քանաքեռ-Զեյթուն» բժշկական կենտրոնի կազմում գործող ծննդատունը, պոլիկլինիկան և այստեղ կտեղափոխվի նաև նույն կենտրոնի գինեկոլոգիայի բաժանմունքը:

«Դավիթ Անհաղթ» անվանումով կենտրոնի փաստաթղթերը ներկայացվել են պետռեգիստր պետական գրանցում ստանալու համար: Այժմ կենտրոնն ունի տնօրենի ժամանակավոր պաշտոնակատար` Աննա Սիսոյանն է, որը միաժամանակ պոլիկլինիկայի տնօրենն է:
Այն, որ մի հիմնարկից մյուս հիմնարկ տեղափոխվող գինեկոլոգիայի բաժանմունքի որոշ աշխատակիցներ կարող են կրճատվել, չի բացառում նաև նոր կենտրոնի ժամանակավոր պաշտոնակատար Աննա Սիսոյանը:

«Վերակազմավորման արդյունքում, եթե լինում են ավելորդ աշխատակիցներ, կարող է հեռացվեն, որովհետև նոր հիմնարկ է կազմավորվում, պետք է լինեն նոր կադրեր, կարող է որոշ մարդիկ կրճատվեն: Դեռևս հնարավոր չէ ասել, թե ովքեր կամ քանիսը կկրճատվեն, որովհետև պետք է հաստատվի հաստիքացուցակ», -մեզ հետ զրույցում ասաց Սիսոյանը:

Նկատենք, որ 1957 թվականից հիմնադրված այս պոլիկլինիկան հավանաբար հիմնադրման օրվանից չի վերանորոգվել, այստեղ անբարեկարգ վիճակ է, նստարանների կաշվեպատ հատվածները պատռված են, իսկ փայտե նստարաններն էլ` քանդված: Փոխարենը եվրանորոգված էր ու  տնօրենի լուսավոր աշխատասենյակը: Պոլիկլինիկան սպասարկում է շուրջ 50 հազար քաղաքացու:






Տնօրենից հետաքրքրվեցինք, թե նոր կենտրոնի ստեղծումը ենթադրո՞ւմ է պոլիկլինիկայի պայմանների բարելավում:

-Այո

Ի՞նչ միջոցների հաշվին:

-Տարբեր միջոցների` պետական միջոցների, բարերարների օգնության, ինչ հնարավոր լինի:

-Մինչ այժմ այդ միջոցները չկայի՞ն պոլիկլինկայի պայմանները բարելավելու համար:

-Չեմ կարող ասել: Մենք զարգացման պլան ենք գրել և ըստ այդ պլանի ուզում ենք կատարել մեր ծրագիրը: Մինչև էդ չեմ կարող ասել ինչ է եղել, ոնց է եղել:

Նշենք, որ նախկինում պոլիկլինիկան ղեկավարել է Գարեգին Սարգսյանը: