Ձեր վստահելի աղբյուրը

Կառավարության շենքի առջև ուշագնաց եղած և Երևանի 2-րդ բուժմիավորում տեղափոխված Գոհար Չիֆլիկյանի առողջական վիճակը նորմալ է.նա  գտնվում է բժիշկների հսկողության տակ: Այդ մասին Panorama.am-ի թղթակցի հետ զրույցում տեղեկացրին բուժմիավորումից: Տիկին Չիֆլիկյանը, որն այսօր առավոտյան կառավարության շենքի առջև բողոքում էր իր զինծառայող թոռան` Ռուբեն Միքայելյանի հարցով, բուժմիավորման նյարդաբանական բաժանմունքից տեղափոխվել է ինտենսիվ թերապիայի բաժանմունք: Նրա մոտ, ըստ շտապօգնության բժիշկների բրիգադի, եղել է «նևրոտիկ ֆոն»:

Panorama.am-ը ներկայացրել էր զինծառայողի հետ կապված խնդիրը, որի մայրը` Շամիրամ Միքայելյանը այսօր առավոտից շարունակում է հացադուլը` պահանջելով հիվանդ որդուն ազատել բանակի ծառայությունից: Հուսահատ կնոջ մայրը` Գոհար Չիֆլիկյանը, կառավարության նիստն սկսելուց առաջ մոտեցել էր կառավարության շենք մտնող արդարադատության նախարար Հրայր Թովմասյանին և նրան փոխանցել իր թոռան` զինծառայող Ռուբեն Միքայելյանի հիվանդության մասին վկայող տեղեկանքը: Նախարարը վերցրել էր տեղեկանքը և խոստացել խնդիրը ներկայացնել Հանրապետության զինդատախազին: Դրանից որոշ ժամանակ անց տիկին Չիֆլիկյանը վատ զգաց, ուշագնաց եղավ: Մինչև շտապօգնության ծառայության ժամանումը, ոստիկանները ջուր էին ցանում կնոջ դեմքին` ուշքի բերելու համար: Այնուհետև կինը շտապօգնության մեքենայով տեղափոխվեց 2-րդ բուժմիավորում:

Զինծառայողի մայրը` տիկին Շամիրամը, փորձում էր հասկանալ` ինչ եղավ որդու հիվանդության մասին վկայող բժշկական տեղեկանքը, որը, նրա խոսքով, «անօրինականության մասին խոսող միակ փաստն է»: Կառավարության նիստից հետո, սակայն, երբ Հրայր Թովմասյանը դուրս եկավ շենքից, տիկին Շամիրամն ու տեղում բողոքող խաղաղ պայմաններում մահացած զինվորների մայրերը վազեցին դեպի նախարարը: «Ձեր փաստաթուղթն իմ մոտ է, ես խոստացել էի այն տալ զինդատախազին»,- ասաց Թովմասյանն ու այն հանձնեց զինծառայողի մորը: «Ինչ կլինի տվեք, ես քսերոքս կանեմ, կտամ ձեզ, էս իմ միակ փաստն ա». –արձագանքեց տիկին Միքայելյանը:

Կառավարության շենք ելումուտ անող պաշտոնյաների մեջ Պաշտպանության նախարար Սեյրան Օհանյանին փնտրող և արդեն մի քանի օր հացադուլ հայտարարած կինը մեկ պահանջ ունի` իր հիվանդ տղան չպետք է ծառայի բանակում:

Մայրն ասում է, որ Սիսիանի զորամասում ծառայած և այժմ Երևանի «Մալաթիայի զորամաս» տեղափոխված իր տղան երեք հիվանդություն ունի` «սրտի բնածին արատ, երիկամների հիվանդություն և ոտքի խնձորակն է կոտրված»: Տղայի վիճակը վատացել է նախորդ տարվա հոկտեմբերին, երբ նույն զորամասում զինվորները ծեծել են մի տղայի ու իր որդուն հարուցված քրեական գործի շրջանակներում ներգրավել որպես վկա: Վերջինն էլ, մոր խոսքով, պատմել է այն ամենն, ինչ տեսել է:

«Զորամասում հրամանատար Ալբերտ Խաչատրյանը ու մյուսը` կրտսեր սերժանտ Մխիթարյանը էնպես են ծեծում իմ երեխուն, դաժանաբար, անվայել բառերով, ասելով` գործ տվող բ…, դե պատկերացրեք: Մի քանի ամիս իմ երեխուն ճնշած պահել են», -պատմեց մայրը և ասաց, որ էդ ճնշումներին չդիմանալով որդին դիմել է ինքնասպանության:

Այնուհետև հարուցվում է քրեական գործ ՀՀ Քրեական օրենսգրքի 363 հոդվածի 1-ին մասի հատկանիշներով` «Իրեն որևէ վնասվածք պատճառելու (անդամախեղելու), հիվանդության սիմուլյացիայի, կեղծ փաստաթղթեր օգտագործելու կամ խաբեության այլ միջոցով կամ ապօրինի այլ եղանակով զինծառայողի կողմից զինվորական ծառայության պարտականությունները կատարելուց ժամանակավորապես խուսափելը»: Panorama.am-ի թղթակցի հետ զրույցում ՊՆ քննչական ծառայության լրատվական բաժնի սպա Մերի Սարգսյանը տեղեկացրել էր, որ ՊՆ 8-րդ կայազորային քննչական ծառայությունում հարուցված նույն քրեական գործն ուղարկվել է Եղեգնաձորի զինվորական դատախազություն մեղադրանքը հաստատելու և Սյունիքի մարզի դատարան ուղարկելու համար:

«Իմ երեխեն հիվանդ ա, սրտի արատ ունի, բայց տարել են շարային ծառայության, տարել են զինավարժության», -ասաց շարքային Միքայելյանի մայրը:

Կառավարության շենքի դիմաց հացադուլի նստած կնոջը Պաշտպանության նախարարության մի պաշտոնյա մոտեցավ (նա կտրականապես հրաժարվեց ներկայանալ-հեղ.) և ասաց, որ նախարարությունում պատրաստ են իրեն ընդունել, հասկանալ խնդիրը: Սակայն տիկին Միքայելյանն ասաց, որ այլևս չի հավատում նրանց բոլորին, քանի որ «երեկ էլ ասիք` գնացեք, տուն հարցը կլուծենք, բայց ոչ մի հարց էլ չլուծվեց»: