Ձեր վստահելի աղբյուրը

ԱԺ Էթիկայի հանձնաժողովի կազմը հաստատելու մասին Ազգային ժողովի նախագահ Հովիկ Աբրահամյանի կողմից հունիսի 2-ին ստորագրած կարգադրությունը ստիպել է ԱԺ Հայ Ազգային կոնգրես խմբակցության անդամ Նիկոլ Փաշինյանին հանդես գալ հայտարարությամբ.

«Հովիկ Աբրահամյանը հուլիսի 2-ին կարգադրություն է ստորագրել Հինգերորդ գումարման ԱԺ առաջին նստաշրջանի էթիկայի հանձնաժողովի կազմը հաստատելու մասին, որով հանձնաժողովի նախագահ է նշանակել ՀՀԿ խմբակցության անդամ, Դավիթ Հարությունյանին, իսկ նախագահի տեղակալի կարգավիճակը վերապահել է տողերիս հեղինակին’ առանց Հայ ազգային կոնգրեսի խմբակցության ներկայացման, ինչը «ԱԺ կանոնակարգ» օրենքի 24.1 հոդվածի 3-րդ կետի կոպիտ խախտում է: Աբրահամյանի ստորագրած կարգադրության մասին տեղեկացել եմ մամուլից և իմ նշանակումը Էթիկայի հանձնաժողովի նախագահի տեղակալ’ համարում եմ ապօրինի և անընդունելի: Սույնով հայտարարում եմ, որ չեմ ստանձնի էթիկայի հանձնաժողովի նախագահի տեղակալի պաշտոնը: Նաև մտադիր եմ ակտիվ մասնակցություն ունենալ էթիկայի հանձնաժողովի աշխատանքներին, որպես առաջնահերթություն ունենալով իրենց օրենքից վեր դասող օլիգարխ-պատգամավորների վարքուբարքի հարցերը սույն հանձնաժողովի շրջանակներում քննության առնելու օրենսդրական արգելքները վերացնելը, բացերը լրացնելը»:

Էթիկայի հանձնաժողովի գործունեությունը կարգավորվում է ԱԺ կանոնակարգ օրենքով: Ըստ այդմ, սա ԱԺ միակ հանձնաժողովն է, որը մշտական չէ. այն կազմավորվում է խորհրդարանի յուրաքանչյուր հերթական նստաշրջանում` խմբակցությունների կողմից մեկական թեկնածուների ներկայացմամբ: Հանձնաժողովի նախագահի պաշտոնը հաջորդաբար զբաղեցնելու իրավունքը պատկանում է ամենաշատ ընդդիմադիր և ոչ ընդդիմադիր խմբակցություններին: 5-րդ գումարման խորհրդարանում Էթիկայի հանձնաժողովը կղեկավարեն Հայ Ազգային կոնգրես և Հանրապետական խմբակցությունները:

Այս նստաշրջանում Էթիկայի հանձնաժողովը ղեկավարելու է Հանրապետական խմբակցության անդամ Դավիթ Հարությունյանը, իսկ աշնանը մեկնարկող ԱԺ հաջորդ նստաշրջանում Էթիկայի հանձնաժողովը կղեկավարի Նիկոլ Փաշինյանը: