Աշոտյան. «Այս տարվա քննությունները մեր պատմության մեջ կմնան որպես «ամենաարդար, ամենահանգիստ, ամենաօբյեկտիվ քննություններից մեկը»
Երեկ ռուսաց լեզվի քննությամբ մեկնարկած պետական ավարտական և միասնական քննությունների երկրոդ փուլն այսօր շարունակվեց հայոց լեզու և հայ գրականության քննությամբ։ Այս քննության համար դիմում հայտ է ներկայացրել 269 դիմորդ։ Քննությանը չէր ներկայացել նրանցից 18-ը։
Քննության մեկնարկին ներկա էր նաև ՀՀ կրթության և գիտության նախարար Արմեն Աշոտյանը։ Մինչ քննության սկսվելը նախարարը շրջեց քննասենյակներում, խոսեց դիմորդների հետ։ Դիմորդներից մեկին` Շուշանին մոտենալով, նախարարը նախ հետաքրքվեց, թե ինչ տրամադրություն ունի, նախորդ քննություններից ինչ միավոր է ստացել: Դիմորդն ասաց, որ դիմել է տնտեսագիտական համալսարան, նախորդ քննություններից` մաթեմատիկայից ու անգլերենից 18 ու 16 միավոր է ստացել։ Շուշանը վստահեցրեց, որ լավ է պատրաստվել նաև այս քննությանը և հույս ունի, որ հայոց լեզու և գրականություն առարկայի քննությունից էլ բարձր գնահատական կստանա։
Մինչ քննության մեկնարկը Արմեն Աշոտյանը դիմորդներին հորդորեց հանգիստ ու կենտրոնացած աշխատել: «Այս քննությունները առիթ չեն շատ նեղսրտելու, լարվելու, այլ առիթ են Ձեր գիտելիքները ցույց տալու և հաղթահարելու կյանքում ամենափոքր պատնեշներից մեկը»,- ասաց ԿԳ նախարարը։
Լրագրողների հետ ունեցած ճեպազրույցում անդրադառնալով միասնական քննություններին Ա.Աշոտյանը նշեց, որ ինքը գոհ է այս տարվա քննությունների ընթացքից։ «Քննություններն անցել են շատ հանգիստ ու հանդարտ մթնոլորտում, դժգոհությունները, քննություններում լարվածության չափը կտրուկ նվազել է։ Ես չեմ ասում, որ անց են կացվել իդեալական քննություններ, սակայն նախորդ տարիների համեմատությամբ քննություններն ավելի հանդարտ են անցել։ Դիմորդի համար հանգիստ միջավայր է ստեղծված նախ և առաջ Շտեմարաններով»,-ընդգծեց ԿԳ նախարարը:
Նրա խոսքերով` այս տարի հիմնական դժգոհությունը եղել է անգլերենի թեստերի բարդության վերաբերյալ։ Ու որպեսզի նման դեպքեր այլևս չլինեն, մյուս տարի բոլոր քննություններն անց են կացվելու Շտեմարանային եղանակով։ «Հետևաբար «Հայոց լեզու» և «Մաթեմատիկա» առարկաների այս տարվա փորձը համարում եմ հաջողված, և այս փորձը պետք է կիրառվի նաև այլ առարկաների համար, որպեսզի երեխան գա քննության հանգիստ լինելով, որ որևէ մի կատու, որևէ մի պարկի մեջ չի գտնելու»,- ասաց Արմեն Աշոտյանը և հույս հայտնեց, որ այս տարվա քննությունները մեր պատմության մեջ կմնան որպես «ամենաարդար, ամենահանգիստ, ամենաօբյեկտիվ քննություններից մեկը»:
Նա նշեց, որ իր նախարար նշանակվելու առաջին իսկ օրվանից երազել է` ընդունելության քննությունները լինեն սովորական երևույթ մեր կյանքում, որ հասարակությունը երկուսուկես ամիս չապրի քննություններով, որ քննությունները չստվերեն քաղաքական գործընթացները, ինչու չէ` «ֆուտբոլի Եվրոպայի առաջնությանը»:
Նախարարը տեղեկացրեց նաև, որ այս տարի քննությունների ընթացքից բողոքներ համարյա չկան, որ ի տարբերություն նախորդ տարիների՝ դրանք հատուկենտ են։
ՀՀ Կառավարությանը կից գնահատման և թեստավորման կենտրոնի (ԳԹԿ) մամուլի պատասխանատու Գայանե Մանուկյանը մեզ տեղեկացրեց, որ միասնական քննությունների 2-րդ փուլին մասնակցելու համար ներկայացվել է 703 դիմում հայտ։ Դիմորդներից 61-ը Վրաստանի, 20-ը ՌԴ, 1-ը ԱՄՆ, 1-ը Ուկրաինայի, 1-ը Գերմանիայի, 3-ը Թուրքմենստանի, 4-ը Իրանի քաղաքացիներ են։
Լրահոս
Տեսանյութեր
Մեր հետ քննարկում չի եղել, հարկերը բարձրացրել են. Ոսկու շուկայի աշխատակիցները կառավարության մոտ են
