Ձեր վստահելի աղբյուրը

Հուլիսի 19-ին Լեռնային Ղարաբաղի Հանրապետությունում տեղի են ունենալու նախագահական ընտրություններ: Ընտրություններին իր մասնակցության և առաջարկած նախընտրական ծրագրի վերաբերյալ Panorama.am-ը զրուցեց նախագահի թեկնածու Վիտալի Բալասանյանի հետ:

- Պարոն Բալասանյան, երկար տարիներ Դուք բավականին առանցքային պաշտոններ եք զբաղեցրել ու աշխատել Արցախի իշխանությունների ներկայիս թիմի հետ: Ի՞նչը Ձեզ ստիպվեց առաջադրվել ու մասնակցել նախագահական ընտրություններին:
- Պատերազմը սկսելուն պես ես հրամանատարական պաշտոններ եմ զբաղեցրել Պաշտպանության բանակում, եղել Ասկերանի գնդի հրամանատար, ապա` զորամիավորման հրամանատար, եղել ՊԲ հրամանատարի տեղակալ, ապա` պաշտպանության փոխնախարար: 2005թ. Արցախի իշխանությունների հետ սկզբունքային տարաձայնությունների պատճառով ինձ զորացրել են Պաշտպանության բանակի շարքերից: 2005թ.-ից ես զբաղվում եմ ակտիվ քաղաքականությամբ, «Դաշնակցություն-Շարժում-88» ընդդիմադիր դաշինքի կազմում դարձել եմ պատգամավոր, մինչ այսօր ԼՂՀ ԱԺ պատգամավոր եմ: 2007թ. ես պաշտպանել եմ նախագահի թեկնածու Բակո Սահակյանի ծրագիրը, մինչև 2010թ. եղել նրա խորհրդականը: Սակայն ժամանակը ցույց տվեց, որ իշխանությունները շատ հարցերում հեռու են իրենց իսկ հռչակած սկզբունքներից և ծրագրերից: Լինելով խորհրդական` ներսից եմ տեղյակ համակարգի անարդյունավետությանը և անկարողությանը, խորհուրդներ ու առաջարկներ լսելու ունակության բացակայությանը: Նախագահական ընտրություններում թեկնածությունս առաջադրելու հիմնական պատճառը երկրի ծանր սոցիալ-տնտեսական վիճակն է, Արցախյան խնդրի հայանպաստ լուծմանը սպառնացող վտանգը:

- Կխնդրեի նշեք ձեր նախընտրական ծրագրի երեք հիմնական կետերը, որոնց իրականացումը համարում եք առաջնային:
- Գլխավոր նպատակը մեր հասարակության առողջ ու կարող ուժերի հետ բոլոր ոլորտներում բովանդակային բարեփոխումների իրականացնումն է, մեր քաղաքացիների ներուժի համար առավելագույնս արտահայտվելու և իրացվելու պայմանների ստեղծումը:
Իմ ծրագրի առանցքային կետերն են` Արցախի անվտանգությունն ու պաշտպանությունը առնվազն ներկայիս սահմաններում, երկրի համաչափ զարգացումը, գյուղական ենթակառուցվածքների վերականգնումը, բիզնեսի համար նպաստավոր պայմանների ստեղծումը, այդ թվում` իշխանության և բիզնեսի հստակ տարանջատումը, արտաքին ակտիվ քաղաքականության վարումը:
Արցախյան հարցի կարգավորման ոլորտում մենք առաջարկում ենք ԼՂՀ և ՀՀ միջև լիազորությունների և պատասխանատվության ոլորտների հստակ սահմանում, ՀՀ և ԼՂՀ միջև ռազմավարական դաշինքի կնքում, որտեղ ՀՀ հանդես կգա որպես Արցախի Հանրապետության և նրա բնակիչների անվտանգության երաշխավոր:

- Ո՞ր քաղաքական ուժերն ու ոչ կառավարական կազմակերպություններն են, որ աջակցում են Ձեզ: Հետագայում որ քաղաքական ուժերի հետ եք հնարավոր համարում Ձեր համագործակցությունը և ում հետ եք բացառում:
- Խորհրդարանում ներկայացված երեք կուսակցություններից ոչ մեկը պաշտոնապես ինձ չի աջակցում: Պետք է նշել, որ Արցախում բնակչության չնչին մասն է կուսակցականացված, կուսակցություններն էական դեր չունեն երկրի կյանքում, ինչի ապացույցը նաև կուսակցությունների կողմից առաջադրված թեկնածուների բացակայությունն է: Ինձ աջակցում են ԼՂՀ ԱԺ գործող և նախկին պատգամավորներ, նախկին նախարարներ և փոխնախարարներ, համայնքապետեր: Ընտրարշավի ընթացքում ինձ օգնում է Ստեփանակերտի նախկին քաղաքապետ Էդուարդ Աղաբեկյանը, իր աջակցության մասին է հայտնել ԼՂՀ ԱԳ նախկին փոխնախարար, 2007թ. նախագահի թեկնածու Մասիս Մայիլյանը, տարբեր շրջաններում մեր կողքին կանգնած են անձինք, ովքեր էական ներդրում են ունեցել Արցախի կայացման և պաշտպանության մեջ:
Օրերս «Շարժում-88» կուսակցությունը ևս կոչ արեց արցախցիներին իրենց ձայները տալ ինձ:

- Ինչո՞վ է ձեր նախընտրական ծրագիրը տարբերվում Ձեր առանցքային մրցակից՝ Բակո Սահակյանի ծրագրից:
- Սկզբունքային տարբերությունը իրավիճակի գնահատականն է և դրանից դուրս գալու ելքերը: Հեռացող նախագահը շեշտը դնում է իր սկսածը շարունակելու վրա, իսկ մենք առաջարկում ենք փոփոխություններ, քանզի ներկայիս վիճակը սոցիալ-տնտեսական, արտաքին քաղաքականության, պաշտպանության, կրթության, առողջապահության և այլ ոլորտներում սպառնում է Արցախի առաջընթացին, բերում է երկրի թուլացմանը, հիասթափության ու անտարբերության աճին: Եթե Արցախի ժողովուրդը թույլ տա այս վիճակի շարունակությունը, ապա հինգ տարի անց մենք կհայտնվենք արդեն անդունդի մեջ:

- Դուք բազմիցս խոսել եք բանակում իրականացվելիք բարեփոխումների մասին, մասնավորապես, առաջնային գծի ինժիներական կառույցների կատարելագործման ու ամրացման մասին: Ինչպես եք պատկերացնում դրանց արդիականացումը և ինչ միջոցներով:
- Միջոցներ գտնելը խնդիր չի, հաշվի առնելով, որ մեր բյուջեում այսօր էլ բավականին միջոցներ կան, որոնք անարդյունավետ են ծախսվում: Կարևորը մեր զինվորի կյանքն է, որն ամենաթանկն է և չափելի չէ ոչ մի նյութական արժեքով: