Ձեր վստահելի աղբյուրը

Հանրապետական ընդունող հանձնաժողովը գումարել է իր անդրանիկ նիստը, որը վարել է հանձնաժողովի նախագահ, ՀՀ կրթության և գիտության նախարար Արմեն Աշոտյանը:

ԿԳՆ հասարակայնության հետ կապերի վարչության հաղորդմամբ, նիստի ընթացքում հիմնականում քննարկվել են պետական և ոչ պետական բարձրագույն ուսումնական հաստատությունների ընդունելության գործընթացին առնչվող հարցեր` մասնավորապես կապված ուսանողների հրամանագրման և նախատեսվող զորակոչի հետ: Անդրադառնալով միասնական քննություններին` նախարարը նշել է, որ նախորդ տարիների համեմատ այս տարի դրանք անցել են աննախադեպ հանդարտ մթնոլորտում. արձանագրվել են եզակի դժգոհություններ, և այդ առումով, ըստ Արմեն Աշոտյանի, գործընթացը մի քայլ առաջ էր: Նախարարը տեղեկացրել է, որ հաջորդ տարի «Հայոց լեզու և գրականություն» և «Մաթեմատիկա» առարկաների հարցաշարերը կհամալրվեն նոր առաջադրանքներով, իսկ մյուս բոլոր առարկաներով անցկացվող միասնական քննությունները ևս կանցկացվեն շտեմարանային եղանակով, որն այս տարի արդարացրել է իրեն: Նախարարը հիշեցրել է, որ համաձայն կարգի` անվճար և վճարովի տեղերի մրցույթը պետք է ամփոփվի մինչև հուլիսի 15-ը, ուստի ընդունող հանձնաժողովը պետք է անի հնարավորը` գործընթացը ժամանակին և առանց խոչընդոտների ավարտելու համար:

Նիստի ընթացքում պետական և ոչ պետական բուհերի ռեկտորները ներկայացրել են քննարկվող հարցերի շուրջ իրենց առաջարկությունները և դիտողությունները:

Հաշվի առնելով, որ արական սեռի դիմորդների մի մասն ընդունվելուց հետո զորակոչվելու է ՀՀ ազգային բանակ, հանձնաժողովը որոշել է բուհերում լավագույնս կազմակերպել նշված դիմորդների կցագրման աշխատանքներն ու հաշվառումը և սովորողների համար ստեղծել նպաստավոր պայմաններ, մասնավորապես, ուսանողներին առաջարկել ուսման վարձավճարի մուծման երկու տարբերակ` մինչև զորակոչվելը վճարել 2012-2013 թվականների ընթացիկ տարվա համար արդեն սահմանված վարձավճարը, որը հնարավորություն կտա նրան ծառայությունն ավարտելուց հետո սովորել տվյալ վարձավճարով կամ բանակից զորացրվելուց հետո վճարել 2014-2015 թվականների ուսումնական տարվա համար սահմանված վարձավճարով:

Ընդունող հանձնաժողովի հաջորդ նիստը կկայանա մայիսի 10-ին, որի ընթացքում նախատեսվում է քննարկել ՀՀ բարձրագույն ուսումնական հաստատությունների ընդունելության քննությունների նախնական արդյունքների ներկայացման, ինչպես նաև ազգային փոքրամասնություններին, միջազգային օլիմպիադաների հաղթողներին և զորակոչիկներին առնչվող այլ խնդիրներ: