Ձեր վստահելի աղբյուրը

ՀՀԿ-ական Ռուբեն Հայրապետյանի պատգամավորական մանդատը վայր դնելուց հետո թիվ 1 ընտրատարածքում նշանակվելու են նոր ընտրություններ, քանի որ Հայրապետյանը մեծամասնական ընտրակարգով ընտրված պատգամավոր է: Մայիսի 6-ի խորհրդարանական ընտրություններում Ռ.Հայրապետյանը հաղթել էր «Ժառանգության» ներկայացուցիչ, ԱԺ նախկին պատգամավոր Ստյոպա Սաֆարյանին, այդ իսկ պատճառով Ռ.Հայրապետյանի մտադրությունը լսելուն պես /դրան հաջորդեց հայտարարությունը/ Ս.Սաֆարյանից հետաքրքրվեցինք՝թե արդյոք նա կմասնակցի հիշյալ ընտրատարածքում արտահերթ այս ընտրություններին՝ Ազգային Ժողովում հայտնվելու ակնկալիքով:

-Պարոն Սաֆարյան, ինչպիսի՞ն կլինի Ձեր որոշումը այս ամենից հետո, հնարավո՞ր է, որ նորից պայքարեք մանդատի համար:

-Այս պահին ես դեռևս չունեմ այդ հարցի պատասխանը… առանց այդ էլ նախորդ ընտրություններին մասնակցելու համար ես բավականին երկար ժամանակ քննարկել եմ բոլոր հարցերը ու մասնակցությանս վերաբերյալ արագ չէի կայացրել առաջադրվելու որոշումս: Իհարկե ես չափազանց ուրախ եմ, որ շուրջ տասը հազար քաղաքացի իր ձայնը այդ ընտրություններում ինձ էր տվել: Բայց գիտակցել եմ, որ մեծամասնական ընտրակարգով պայքարը ոչ թե թեկնածուի, այլ պետության դեմ է և այս իմաստով իմ մրցակիցը իրականում եղել է ոչ թե Ռուբեն Հայրապետյանը, այլ պետությունն իր կառույցներով: Հետևաբար, երկրորդ անգամ պետության դեմ կռիվ տալու համար հարցը պետք է քննարկվի… առաջին հերթին իմ հարազատների, նաև կուսակցության հետ քննարկելու խնդիր կա: Այս պահին ես չեմ կարող ոչ ասել այո, ոչ էլ ասել ոչ:

-Բայց Ձեզ համար սպասելի էր, որ ի վերջո Ռուբեն Հայրապետյանը վայր կդնի մանդատը:

-Ճիշտն ասած մի երկու օր առաջ որոշ ուղերձներ, որ լսում էի հասարակական շրջանակներից «Հարսնաքարի» գործով արդեն իսկ տեսանելի էին դարձնում որոշակի բաներ: Ռուբեն Հայրապետյանի մանդատից զրկելու ուղերձը որոշակի ժամանակ է առկա էր, բայց, բնականաբար, իրավիճակը առավել սրվեց Վահե Ավետյանի մահից հետո: Այլ ուղերձներ ևս ուշագրավ էին, մասնավորապես Հայաստանից հեռանալու մասին և այլն, բայց տեսանելի էր, որ բոլոր ուղերձները ուղղակիորեն կապվում էին պատգամավորությունից հրաժարվելու հետ: Հասարակական ճնշումը բավականին կարևոր դեր խաղաց:

-Պարոն Սաֆարյան, իսկ կարող եք մոտավոր ասել, թե դեպքերի նման զարգացումը ե՞րբ կուսակցությունում առաջ կքաշի հարցը քննարկելու և որոշում կայացնելու խնդիրը:

-Դե, բնականաբար, կքննարկվի, բայց կրկնում եմ՝ որոշում կայացնողը ես եմ և ոչ կուսակցությունը և որևէ մեկը չի կարող իմ փոխարեն որոշում կայացնել…

-Իսկ Դուք զգո՞ւմ եք, որ Ձեր պակասը զգացվում է այս խորհրդարանում:

-Միայն այն փաստը, որ ես առաջադրված էի երկու ընտրակարգով էլ խոսում է այն մասին, որ ես երբեք չեմ կարող ասել, թե չէի ուզում լինել խորհրդարանում: Իսկ թե ինչ կորոշեմ…. Ազատված տեղը, որի համար ես մրցակցում էի և որի համար պայքարում ես երկրորդն էի թեկնածուներից ևս չի կարող ինձ գայթակղել որոշում կայացնելու առումով: Երբ Ռուբեն Հայրապետյանի մանդատից հրաժարվելու ընթացակարգը անցնի, այդ ժամանակ ես որոշմանս մասին կհայտարարեմ:
Հիշեցնեմ, որ ԱԺ նախագահը պատգամավորի մտադրության մասին ընթերցում է նիստում և եթե 15 օրվա ընթացքում որոշումը չի փոխվում, ապա ԱԺ նախագահը հրաժարականը համարում է ընդունված:

-ԱԺ-ն արձակուրդում է, նշանակում է պետք է սպասենք աշնանային նստաշրջանի մեկնարկի՞ն ու ըստ այդմ ընթացակարգի կյանքի կոչմանը:

-Այո. Մինչև աշուն Ռուբեն Հայրապետյանը շարունակում է լինել պատգամավոր: