Ձեր վստահելի աղբյուրը

Ռուսաստանի Դաշնության վարչապետ Դմիտրի Մեդվեդևը լրագրողների հետ հանդիպման ժամանակ հայտարարել է, թե Կունաշիր կղզի կատարած իր այցին Ճապոնիայի արձագանքը իրեն «բացարձակապես չի հետաքրքրում»: Այս մասին հաղորդում է Իտառ-Տասս գործակալությունը:

«Ինչ վերաբերում է մեր ճապոնացի գործընկերների արձագանքին, ապա այն ինձ բացարձակ չի հետաքրքրում: Այնքան չի հետաքրքրում, որ նույնիսկ չեմ ուզում ժամանակ ծախսել պատասխանելու այդ հարցին՝ ինչ է նշանակում քննարկել նրանց հետ ՌԴ կառավարության ղեկավարի այցը սեփական պետության տարածքներ», - ասել է Մեդվեդևը:

Ավելին, ՌԴ կառավարության ղեկավարը խոստացել է հաջորդ այցին իր հետ վերցնել որքան հնարավոր է շատ ցանկացողների, քանի որ կղզիներում բավական հետաքրքիր վայրեր կան և Կուրիլներ պետք է այցելեն ոչ միայն պետության ղեկավարները, այլև կառավարության ներկայացուցիչներն ու լրագրողները:

Հիշեցնենք, նախօրեին Ճապոնիայի կառավարության գլխավոր քարտուղար Օսամու Ֆուձիմուրան հայտարարել էր, թե Ռուսաստանի Դաշնության վարչապետ Դմիտրի Մեդվեդևի այցը Կունաշիր կղզիներ «չի համընկնում Ճապոնիայի դիրքորոշման հետ և խորը ափսոսանք է առաջացնում»:

Ավելի վաղ, Ճապոնիայում Ռուսաստանի դեսպան Եվգենի Աֆանասեֆը կանչվել էր ԱԳ գերատեսչություն, որտեղ նրան բողոքի նոտա էին փոխանցել ՌԴ վարչապետ Դմիտրի Մեդվեդևի հուլիսի 3-ին Կուրիլյան կղզիներ կատարած այցի առնչությամբ:

Ճապոնիան վիճարկում է Կուրիլյան չորս կղզիների՝ Իտուրուպի, Կունաշիրի, Շիկոտանի և Հաբոմայի պատկանելիությունը Ռուսաստանի հետ, հղում անելով 1855 թ-ին կնքված «Սահմանների ու առևտրի վերաբերյալ համաձայնագրին»: Կղզիների վերադարձը Ռուսաստանի կողմից Ճապոնիան դիտարկում է միակ նախապայման Մոսկվայի հետ խաղաղության պայմանագիր կնքելու համար, որը Երկրորդ համաշխարհային պատերազմից հետո այդպես էլ չի կնքվել երկու պետությունների միջև: Ռուսաստանն, իր հերթին, պնդում է, թե Հարավային Կուրիլները ԽՍՀՄ-ին են անցել համաշխարհային պատերազմի արդյունքում, և ռուսական ինքնիշխանությունը հիմնավորված է համապատասխան միջազգային իրավական փաստաթղթերով: