Ձեր վստահելի աղբյուրը

Վարդան Պետրոսյանը ասուլիսին ներկայացավ բարձր տրամադրությամբ (ինչն անբաժան է այս արվեստագետից) և մի մեծ ծաղկեփնջով: Դա բացատրեց` այսօր Սահմանադրության օրն է, տոն է և այդ ծաղկեփունջը նվիրում է բոլոր կանանց, ովքեր ներկա են ասուլիսին: Ծաղկեփունջն էլ տեղադրելով սեղանին ու դրա հետագա գործածությունը ներկա կանանց բացատրելու համար մի անեկդոտ պատմեց. «Վանեցիների ընտանիքը նստած թեյ է խմում, սեղանի վրա դրված է ընդամենը մեկ հատ շաքար: Վանեցիները մի-մի հատ նայում են շաքարին` թեյը խմում են, նայում` խմում են, մեկ էլ երեխան երկու անգամ է նայում շաքարին ու հորից հարված ստանում վզակոթին. «Տո այ շան տղա, խի՞ երկու հատ նայեցիր»»:

Անեկդոտից անցում կատարելով օրվա խորհրդին ու ավելի լուրջ թեմաներին, Վարդան Պետրոսյանը նախևառաջ նշեց, որ բոլորն ու ինքը նույնպես ուզում են ապրել մի երկրում, որում Սահմանադրությունը իրագործվում է: Իսկ որպեսզի իր հանդիսատեսը ևս այս օրով չմնա առանց նվերի` տեղեկացրեց, որ հուլիսի վերջին տեղի է ունենալու իր նոր` «Պարոնայք. 50/50» ներկայացման պրեմիերան, որում նա խոսելու է երկու ընտրությունների արանքում Հայաստանի ներկայիս առօրյայից:

Ներկայացման մեջ անդրադարձ է լինելու է նաև այն անպատժելիության մթնոլորտին, որ առկա է այսօր Հայաստանում և վերջին ողբերգական դեպքերին ևս, հավաստիացրեց բանախոսը, իրենց արտացոլանքը անպայման կգտնեն դրանում: Վ.Պետրոսյանը նշեց, որ «Հարսնաքարի» դեպքն ամենաթողության հետևանք է, սակայն իր համար այն սպասելի էր. «Ես չեմ ասում «Հարսնաքարի» դեպքն էր կոնկրետ սպասելի, բայց հասկանալի է, որ դեպքը ոչ թե պատահականության, հիմարության կամ բթության արդյունք էր: Ըստ իս` այստեղ արդեն համակարգային երևույթի հետ գործ ունենք` ինչ-որ բան արդեն արատավորված է մեր համակարգում և մենք պետք է վերացնենք այդ արատները»,- նշեց նա ու ավելացրեց, որ Հայաստանում այսօր ձևավորվել է մի մթնոլորտ, որում անպատժելի արարքները տեղի են ունենում և որ ամենացավալին է` այդ ամենը կարծես դառնում է սովորական ինչ-որ բան. «Մեր պարագայում այս վերջին իրողությունները բերեցին նրան, որ մարդիկ հասկացան, որ դանակը, ինչպես ասում են, ոսկորին է հասել և սա անպայման, համոզված եմ, կունենա զարգացումներ»,- հավելեց նա:

Վարդան Պետրոսյանը ուշադրությունը սևեռեց նաև նրան, որ չափն ու սահմանը, ինչպես ասում են, արդեն անցել են. եթե այսօր սպայի վրա են ձեռք բարձրացրել, ապա վաղն էլ նույն հաջողությամբ կարող են ձեռք բարձրացնել նաև երկրի ղեկավարի վրա. «Լավ, այսօրվա նախագահին ծեծել չեն կարող, հասկացանք: Բայց վաղը կարող է, այսպես ձեռքի հետ Բաղրամյանով անցնելիս մտնեն նախագահական, մի երկու հատ չափալախեն նախագահին…. Սա տանում է այդտեղ և մարդիկ անմիջապես բորբոքվեցին, որովհետև նաև բժշկի մասնագիտությունն է հարգված մեզ մոտ»,- իրեն բնորոշ տոնայնությամբ ներկայացրեց ամենաթողության մթնոլորտում հավանական զարգացումները արվեստագետը ու հավելեց, որ մենք խոսում ենք Վահե Ավետյանի մասին, ով սպանվեց, բայց նրա ընկերները դեռ հիվանդանոցում են ու լավ վիճակում չեն. «Սարսափելի բան է տեղի ունեցել և ժողովուրդն այլևս չի ուզում դա հանդուրժի: Սա միայն մեր համակարգում գործող ինչ-որ երևույթ է, որը գրեթե անհնար է զարգացած երկրներում»:

Ինչ վերաբերում է համակարգին, ապա Վ.Պետրոսյանը զերծ չմնաց էքսպրոմտից` վերափոխելով Շեքսպիրի «Համլետը» ու այդպիսով հավելելով իր խոսքը.

«Դանմարկը արդեն դարձրել են Դանիա,
Համլետի հոր վրեժը արդեն դարձել է մանիա,
Եսլի տի немец ` տի իդի վ Германия,
Так что братец, давай-давай до свидания»….