Ձեր վստահելի աղբյուրը

Արցախը հնարավորինս զերծ պետք է մնա սեփական ընդերքի օգտագործումից, շեշտը պետք է դրվի գյուղատնտեսության զարգացման, էկոլոգիապես մաքուր այլ ճյուղերի զարգացման վրա: Պատասխանելով ֆեյսբուքյան օգտատերերից մեկի` Արցախում նոր հանքավայրերի շահագործման վերաբերյալ հարցին, նման պատասխանէ թողել Վիտալի Բալասանյանը, ով Արցախի նախագահի չորս թեկնածուներից մեկն է:

«Իմ դիրքորոշումն այս հարցում, հստակ է` ես դեմ եմ Արցախի` հանքաարդյուանբերական երկիր դառնալուն: Արցախի բնակիչները հայտնի էին իրենց երկարակեցությամբ և ամուր առողջությամբ: Սակայն վերջին տարիների անցուդարձը, որակյալ սննդի պակասը, առողջապահության անբավարար վիճակը բերել են կյանքի տևողության կրճատման: Այսօր այս ամենին ավելանում է նոր մարտահրավեր` բնապահապանական խնդիրները»,-նշել է Բալասանյանը:

Նրա խոսքով, շեշտը պետք է դրվի գյուղատնտեսության զարգացման, էկոլոգիապես մաքուր այլ ճյուղերի զարգացման վրա:
«Հարկավոր է ամրագրել ԼՂՀ տնտեսության բնապահպանական ուղղվածությունը` որպես տնտեսության զարգացման հիմնական ուղղություններից մեկը` էկոլոգիապես մաքուր ապրանքների արտադրության և իրացման, հանգստյան գոտիների և զբոսաշրջության խրախուսման ձևով»,-պատասխանել է թեկնածուն:

Հիշեցնենք, որ Արցախում նախագահական ընտրությունները նշանակված են հուլիսի 19-ին: Հունիսի 20-ին մեկնարկած քարոզարշավը կավարտվի հուլիսի 17-ի կեսգիշերին:

Երկրի ղեկը ստանձնելու համար պայքարում են չորս թեկնածուներ` պատգամավոր, պաշտպանության նախկին փոխնախարար Վիտալի Բալասանյանը, թոշակառու Վալերի Խաչատրյանը, ԼՂՀ գործող նախագահ Բակո Սահակյանը, Հայաստանի պետական ագրարային համալսարանի Ստեփանակերտի մասնաճյուղի ուսումնագիտական աշխատանքների գծով փոխտնօրեն Արկադի Սողոմոնյանը: Նրանք բոլորն էլ անկուսակցական են և ինքնաառաջադրվել են:

Կազմավորվել է 274 ընտրական տեղամաս, որից մեկը Հայաստանի Հանրապեությունում Լեռնային Ղարաբաղի Հանրապետության ներկայացուցչությունում` Հայաստանի Հանրապետությունում ժամանակավորապես գտնվող կամ բնակվող Լեռնային Ղարաբաղի Հանրապետության քաղաքացիների ընտրական իրավունքի իրականացումն ապահովելու համար: