Ձեր վստահելի աղբյուրը

Մարդու իրավունքների եվրոպական դատարանում մշակվում է դատարան դիմելու կարգը խստացնելուն ուղղված բարեփոխումների նոր փաթեթ, որը դեռևս չի ընդունվել: Հայտնելով այս մասին «Փաստինֆո» գործակալության թղթակցին՝ «Արնի Քնսալթ» փաստաբանական գրասենյակի ղեկավար, փաստաբան Արա Ղազարյանը հերքել է rus.azattyq.org կայքէջի տարածած տեղեկությունը, թե ՄԻԵԴ-ն արդեն խստացրել է դատարան դիմելու կարգը:
 
Նա պարզաբանել է, որ միշտ էլ Եվրոդատարանում տենդենց կա բարեփոխումներ անցկացնել գանգատների մեծ հոսքը ինչ-որ չափով զսպելու համար՝ մասնավորապես, առաջարկվում է գանգատով դիմելու համար սահմանել տուրք, գանգատներ գրել միայն անգլերեն կամ ֆրանսերեն լեզուներով և այլն:

Ըստ Արա Ղազարյանի, դատարան դիմելու չափանիշների խստացումը սահմանափակում են մարդու իրավունքները, սակայն Եվրոդատարանը ստիպված է դա անել, որովհետև 47 երկիր՝ 800 մլն ընդհանուր բնակչությամբ, սպասարկող դատարանն ուղղակի չի կարող դիմագրավել գանգատների հոսքին: Հատկապես որ 200 հազարից անցնող գանգատների մեծ մասն ակնհայտ անհիմն գանգատներ են: «Փակ շրջան է ստացվում. որքան ավելացվում են Եվրոդատարանի ռեսուրսները, այնքան գանգատների թիվն ավելանում է»,- ասել է Ա. Ղազարյանը:

Փաստաբանը վստահ է, որ գանգատների ընդունելության խստացումներն այնպես չեն լինի, որ անհատական գանգատ ներկայացնելու իրավունքը լուրջ խախտվի, դրա նպատակն է կարգավորել և զսպել, մասնավորապես, ակնհայտ անհիմն գանգատների հոսքը:

Արա Ղազարյանը նշել է, որ Հայաստանի դեմ բազմաթիվ գործեր կան, որոնց քննության բոլոր փուլերն ավարտվել են և պատրաստ են վճռի, բայց ոչ մի քայլ չի կատարվել: Այդ թվում՝ 2008թ. Երևանում մարտի 1-ի դեպքերին առնչվող ընդամենը մի քանի գործ է գտնվում քննության փուլում, դեռ շատ վճիռներ կան, որ սպասում են իրենց հերթին: Ըստ Արա Ղազարյանի՝ ձգձգումները պայմանավորված են միմիայն դատարանի ծանրաբեռնվածությամբ: