Զորահանդեսում ցուցադրվել է Ղարաբաղի սպառազինության ընդամենը 5 տոկոսը. ԼՂՀ ՊԲ հրամանատար
«Ադրբեջանական լրատվամիջոցների հայտարարությունները, թե զորահանդեսում ցուցադրված տեխնիկան Հայաստանինն է եղել և վերադարձվել է Հայաստան, սուտ է, ոչ մի բան Հայաստանից չի բերվել, բացառությամբ ուղղաթիռների և այն ինչ, որ տեսել եք զորահանդեսում, դա մեր սպառազինության ընդամենը հինգ տոկոսն է: Մնացածը մարտական խնդիր է կատարել », -Լեռնային Ղարաբաղի զորամասերից մեկում լրագրողների հետ օրերս տեղի ունեցած հանդիպման ժամանակ հայտարարեց ԼՂՀ Պաշտպանության նախարար, պաշտպանության բանակի հրամանատար, գեներալ-լեյտենանտ Մովսես Հակոբյանը:
Հիշեցնենք, որ մայիսի 9-ին Արցախում կազմակերպվել էր Շուշիի ազատագրման և պաշտպանության բանակի կազմավորման տարեդարձերին նվիրված զորահանդես:
ՊԲ հրամանատարը կարծում է, որ ղարաբաղյան զորահանդեսը իր կազմակերպվածությամբ առանձնացել է մինչ այդ Ադրբեջանում և նույնիսկ Հայաստանում կազմակերպված զորահանդեսներից:
Հակոբյանի խոսքով, զորահանդեսում ցուցադրված անօդաչու սարքերը լինելու են Պաշտպանության բանակի հաստիքում: Նա վստահեցրեց, որ զորահանդեսի ժամանակ իրենք չեն փորձել որևէ մեկին խաբել, և զորահանդեսի նպատակն է եղել նախ` ժողովրդին ցույց տալ զինված ուժերի մարտական պատրաստվածության աստիճանը, իսկ հակառակորդն էլ հասկանա, թե պատերազմ վերսկսելու դեպքում ինչ ուժեր են դիմակայելու նրանց: «Մեր զորահանդեսը ցույց տվեց, որ պաշտպանության բանակն ի վիճակի է լուծել իր առջև դրված խնդիրները», -հայտարարեց Հակոբյանը:
Հարցին, թե սուղ բյուջեի պարագայում կարևո՞ր էր զորահանդես կազմակերպելը և մի՞թե հնարավոր չէր գումարներն ուղղել ավելի կարևոր խնդիրների լուծմանը, ԼՂՀ պբ հրամանատարը պատասխանեց. «Պաշտպանության բանակի բյուջեն սուղ չէ, միայն անցյալ տարի մենք ներմուծել ենք այնքան զինամթերք, ինչքան Ադրբեջանի ռազմական բյուջեն է, ռազմական մեր հնարավորությունները նաև պայմանավորված են Ռուսաստանի հետ ունեցած Հայաստանի հարաբերություններով»:
Ավելին, Ղարաբաղի կառավարության ներկայացուցչի պնդմամբ, ինչպես անցյալ տարի, այս տարի ևս շարունակվել է բանակը նոր սպառազինությամբ ու ռազմական տեխնիկայով զինելու գործընթացը: «Այս տարի պաշտպանության բանակ ենք ներկրել մեծ քանակությամբ տանկեր, և այսօր մեր տանկային ստորաբաժանումները, ըստ հաստիքի, ամբողջությամբ տանկերով համալրված են: Կազմավորված են ևս երկու ստորաբաժանումներ տանկային ստորաբաժանումների բազայի վրա»,-հայտարարեց Հակոբյանը` ընդգծելով, որ արդիական հրետանային սարքերով է համալրվել երկու զորամասերի հրետանին: Ղարաբաղյան բանակը համալրվել է նաև նոր տիպի 35 «Ուրալներով» և բացի այդ, հրամանատարական կազմի համար են մեքենաներ ներկրվել:
«Հայկական բանակի համալրումն իրականացվում է Ադրբեջանի կողմից մեզ նետված մարտահրավերների համար և պահելու է այն աստիճանը, որ պաշտպանության բանակը կարողանակ զսպողի դերում լինել», -հավելեց պաշտոնյան:
ԼՂՀ ՊԲ հրամանատարը տեղեկացրեց նաև, որ բանակը շարունակվում է համալրվել ինչպես պարտադիր զինվորական ծառայության զինվորներով, այնպես էլ` պայմանագրային: Նրա խոսքով, բանակը հիմնականում համալրված է նաև սպայական կազմով: «Ի ուրախություն մեզ, պետք է ասեմ, որ Վազգեն Սարգսյանի անվան ռազմական ինստիտուտը լրիվությամբ ապահովում է հրաձգային, մոտոհրաձգային և հետախուզական ստորաբաժանումների հրամանատարների պաշտոնները», -նկատեց Մովսես Հակոբյանը:
Վճռական ենք, որ առաջին գծում իշխողի դերակատարությունը երբեք չզիջենք հակառակորդին. ԼՂՀ ՊԲ հրամանատար
Ռազմական արդյունաբերություն ղարաբաղյան իշխանությունների ծրագրերում չկա. Մովսես Հակոբյան
Լրահոս
Տեսանյութեր
Թովմասյանը՝ Նանուշյանին. Նշել եք՝ ծրագրի իրականացումը պայմանավորված է օրենքով, բայց օրենքը չկա
