Ձեր վստահելի աղբյուրը

Կառավարության հուլիսի 12-ի նիստի օրակարգում ընդգրկված ՀՀ ընտանեկան օրենսգրքում փոփոխություններ կատարելու մասին օրինագծի շուրջ աղմուկ է բարձրացել հասարակության շրջանում: Մասնավորապես շրջանառվում են կարծիքներ, թե օրինագիծը կնպաստի արտագաղթին, ծնելիության նվազմանը:

ՀՀ արդարադատության նախարարության Միջազգային իրավական հարաբերությունների վարչության պետ Վահե Դեմիրճյանը «Փաստինֆո» գործակալությանն ասել է, թե հասարակության շրջանում տարածված կարծիքները չունեն որևէ հիմք: «Օրինագիծը չի կարող ազդեցություն ունենալ ոչ արտագաղթի, ոչ ծնելիության մակարդակի վրա: Չեմ էլ պատկերացնում՝ ինչպես կարող է նպաստել դրանց. եթե աղջկան արգելում ենք ամուսնանալ 17 տարեկանում, պետք է Հայաստանից մեկնի այլ երկիր, որպեսզի մեկ տարի շուտ ամուսնանա՞»,- զարմանք է հայտնե’ Վահե Դեմիրճյանը:

Հիշեցնենք, որ ՀՀ ընտանեկան օրենսգրքում փոփոխություններ կատարելու մասին օրինագծով առաջարկվում է գործող օրենսգրքում ամրագրել, որ ամուսնության կնքման համար անհրաժեշտ են ամուսնացող տղամարդու և կնոջ փոխադարձ կամավոր համաձայնությունը և նրանց ամուսնական` տասնութ տարեկան տարիքի հասնելը:

Մինչդեռ մամուլում կա տեղեկատվություն, թե օրինագիծն արգելում է աղջիկների՝ մինչև 19 տարեկան ամուսնությունը: «Փաստինֆո» գործակալության թղթակցի հետ զրույցում Վ. Դեմիրճյանը նշել է, որ դա ապատեղեկատվություն է, թյուրիմացության արդյունք:

«Եթե գործող օրենսդրությունը սահմանում է, որ ամուսնության կնքման համար անհրաժեշտ է, որ աղջիկը լինի տասնյոթ, իսկ տղան՝ տասնութ տարեկան, ապա այս օրինագծով առաջարկվում է վերացնել ամուսնություն կնքելու համար կանանց և տղամարդկանց համար սահմանված տարիքային տարբերությունը: Այսինքն և՛ աղջիկը, և՛ տղան պետք է լինեն 18 տարեկան, որպեսզի գրանցվի օրինական ամուսնություն»,- պարզաբանել է Վ. Դեմիրճյանը:

Վարչության պետի խոսքով՝ առաջարկվող փոփոխությունները նախևառաջ պայմանավորված են միջազգային այն կոնվենցիաներով, որոնց անդամակցում է ՀՀ-ն: «Երկու բավականին հիմնարար փաստաթղթերով՝ «Երեխաների իրավունքների մասին» և «Կանանց նկատմամբ խտրականության բոլոր ձևերի վերացման մասին» կոնվենցիաներով Հայաստանի առջև դրվել է աղջիկների և տղաների ամուսնական տարիքը հավասարեցնելու խնդիրը»,-նշել է Վահե Դեմիրճյանը՝ հավելելով նաև, որ թե ՀՀ համապատասխան օրենքով, թե կոնվենցիայով երեխա համարվում է 18 տարին չլրացած անձը, իսկ երեխայի իրավունքների մասին կոնվենցիայի 16-րդ հոդվածով արգելվում է երեխաների ամուսնության գրանցումը:

Վ. Դեմիրճյանը նաև տեղեկացրել է, որ ՀՀ առողջապահության նախարարությունը համապատասխան եզրակացություն է տվել նախագծի վերաբերյալ, որտեղ նշվում է, որ փոփոխությունները բարենպաստ ազդեցություն կունենան կանանց վերարտադրողական առողջության վրա:

Նախորդող հրապարակում`
Պետք է ամուսնանալ 18 տարին լրանալուց հետո. Փոփոխության առաջարկ