Ձեր վստահելի աղբյուրը

Էթիկայի հանձնաժողովի գործունեությունը դեռ չսկսած հնարավոր է ԱԺ կանոնակարգ օրենքում խորհրդարանի աշնանային նստաշրջանի մեկնարկին փոփոխություններ կատարվեն: Այդ մասին այսօր լրագրողների հետ հանդիպմանը խոսելով Հայաստանի Ազգային ժողովում նորաստեղծ Էթիկայի հանձնաժողովի մասին հայտարարեց հանձնաժողովի անդամ, դաշնակցական Արծվիկ Մինասյանը:

Հանձնաժողովի ձևավորման կարգը Մինասյանի մոտ մտահոգություններ է առաջացրել, և նա կարծում է, որ հանձնաժողովի նախագահի ու փոխնախագահի պաշտոնները պետք է ռոտացիոն կարգով փոխանցվեն խորհրդարանի բոլոր խմբակցություններին, այլ ոչ թե մեծաթիվ ընդդիմադիր և ոչ ընդդիմադիր խմբակցություններին, ինչպես այժմ է:

Պատգամավորի մյուս մտահոգությունը վերաբերում էր տեղեկության ստացման ձևին. ըստ օրենքի Էթիկայի հանձնաժողովը կարող է տվյալ պատգամավորի կամ նրա գործունեության մասին տեղեկություն իմանալ միայն պետական կամ տեղական ինքնակառավարման մարմիններին դիմելով: «Մինչդեռ մի շարք տեղեկություններ, որոնք օրենքով պարտադիր կերպով ներկայացվում են, վերապահված չեն պետական մարմիններին` դրանք ոչ պետական մարմիններ են կամ ուղղակի մասնավոր ընկերություններ: Սրանց մոտից տեղեկություն ստանալը բարդացնելու հանձնաժողովի գործունեությունը», -ասաց Մինասյանը` մատնանշելով այս պարագայում միակ ելքը` դիմել դատարան պարտադրել տեղեկություն տրամադրել:

Էթիկայի հանձնաժողովից ընդհանուր առմամբ, պատգամավորը մեծ ակնկալիքներ ունի. «Երեք ընդդիմադիր և երեք ոչ ընդդիմադիր խմբակցությունների անդամներից ձևավորված հանձնաժողովը  հնարավորություն կտա իրականացնելու իմ կարծիքով, նախադեպային որոշումներ»:

Էթիկայի հանձնաժողով դիմումներով կարող է դիմել ցանկացած քաղաքացի, այդ թվում պատգամավորներն իրենք: Այդպիսով, խորհրդարանում հայտնի գործարար պատգամավորները և նրանք, ովքեր այս կամ այն առիթով դրսևորել են պատգամավորին ոչ վայել վարքագիծ, հայտնվելու են հանձնաժողովականների թիրախում:

Ի՞նչ է լինելու այն պատգամավորի ճակատագրի հետ, երբ Հանձնաժողովը պարզեց, որ նա ունի նաև բիզնես:

Պատգամավորի ներկայացմամբ, եթե հանձնաժողովը որոշեց, որ որևէ պատգամավոր զբաղվել է ձեռնարկատիրական գործունեությամբ և շահերի բախում կարող է առաջանալ, եզրակացություն է կազմում և ներկայացնում խորհրդարանի դատին: Հարցն ընդգրկվում է ԱԺ լիագումար նիստի օրակարգ, որտեղ քննարկում ու քվեարկում են: «Եթե քվեարկությամբ ընդունվեց Էթիկայի հանձնաժողովի եզրակացությունը, համարվում է պատգամավորի լիազորությունները դադարեցված, եթե չընդունվեց, ապա համրվում է, որ պատգամավորը բիզնեսով չի զբաղվում: Ես համոզված եմ, որ եթե հստակ փաստեր լինեն լիագումար նիստը դրական որոշում կկայացնի», -նկատեց Արծվիկ Մինասյանը:

Սակայն այլ է հարցը, երբ պատգամավորը էթիկան է խախտում, այսինքն, խախտում կատարած պատգամավորը իրավական պատասխանատվության չի ենթարկվում: Ուղղակի հանձնաժողովը արձանագրում է, որ այս կամ այն պատգամավորը թույլ է տվել էթիկայի խախտում, քվեարկել է այլ անձի փոխարեն և իրեն պատգամավորին վայել վարքագիծ չի դրսևորել:

Հիշեցնենք, որ նման մի դեպք եղավ նախորդ գումարման Ազգային ժողովում, երբ քննարկումներից մեկի ժամանակ Հանրապետական պատգամավորներից Առաքել Մովսիսյանը, որը առավել հայտնի է Շմայս մականունով, «Ժառանգություն» խմբակցության նախկին պատգամավոր Արմեն Մարտիրոսյանին անվանել էր «հայվան»: Առաքել Մովսիսյանը հրապարակային ներողություն չխնդրեց Մարտիրոսյանից: Էթիկայի հանձնաժողովը, փաստորեն, այս և նման այլ որակումներ տալու դեպքում,  որևէ պատիժ չի սահմանվում պատգամավորի համար:

«Բնականաբար, «հայվան» բառը էթիկայի խախտում է. ոչ մի պատգամավորի համար հաճելի չէ, երբ իրեն հայվան են անվանում», -նկատեց Արծվիկ Մինասյանը:

Էթիկայի հանձնաժողովը Ազգային ժողովում նորություն է: Հանձնաժողովի կազմը ձևավորվել է ԱԺ նախագահի հուլիսի 2-ի կարգադրությամբ: ԱԺ այս նստաշրջանում Հանձնաժողովի նախագահն է Դավիթ Հարությունյանը, իսկ փոխնախագահն է Նիկոլ Փաշինյանը: Սակայն վերջինը հայտարարել էր, որ չի ստանձնի փոխնախագահի պաշտոնը և կբավարարվի անդամի կարգավիճակով: