Ձեր վստահելի աղբյուրը

Երբ եռանախագահները հայտարարում են, որ պետք է զերծ մնալ մաքսիմալիստ դիրքորոշումներից` ի պատասխան դրան մենք լսում ենք ադրբեջանական ղեկավարության կողմից, որ ոչ մի զիջում չեն անելու: Այս մասին, անդրադառնալով Ադրբեջանի նախագահի վերջին հայտարարությանը, թե ոչ մի զիջում չի արվելու, ԵԱՀԿ գլխավոր քարտուղար Լամբերտո Զանյեի հետ համատեղ ասուլիսում հայտարարեց ՀՀ արտգործնախարար Էդվարդ Նալբանդյանը:

Նա հիշեցրեց, որ վերջին` Լաս Կաբոսի հայտարարության մեջ ասվում է, որ բանակցությունների ճանապարհով խնդրի կարգավորմանն այլընտրանք չկա և ուժի որևէ գործածում չի բերի կարգավորմանը: Բայց. «Եվ մեկ շաբաթ անց Ադրբեջանն ամենաբարձր մակարդակով հայտարարում է, որ առել է, առնում է և ավելի զենք կգնի հարցի լուծման համար: Եռանախագահները առաջարկում են միջադեպերի հետաքննության, դիպուկահարների դուրս բերման, հրադադարի ռեժիմն ամրապնդելու մեխանիզմ ստեղծել, որպեսզի պայմաններ ստեղծվեն խնդրի կարգավորման համար: Իսկ ադրբեջանցիներն ասում են` մենք կարիք չունենք ոչ մեխանիզմի ստեղծման, ոչ դիպուկահարի դուրս բերման և ոչ էլ հրադադարի ռեժիմի ամրապնդման, որովհետև երբ կարգավորումը լինի` այդ ամենի կարիքը չի լինի…մեկնաբանությունից վեր է»,- հայտարարեց Էդվարդ Նալբանդյանը:

Ու թեև այդ ամենը իրականություն է, շարունակեց նա, բայց բանակցություններին այլընտրանք չկա և Հայաստանը շարունակելու է բանակցությունները, ջանքերը ուղղված հիմնախնդրի շուտափույտ կարգավորմանը:

«Հայաստանը ի տարբերություն Ադրբեջանի ռազմատենչ հայտարարություններ չի անում և չի ասում, որ մենք վերջին հինգ տարում 20 անգամ ավելացրել ենք ռազմական բյուջեն և չի մերժում միջազգային հանրության առաջարկները: Ադրբեջանը վերցնում է միջազգային հայտարարություններից մի դրույթ ու հարմարեցնելով իրեն հայտարարում, թե միջազգային հանրությունն այս կարծիքն ունի կամ այն: Բայց միջազգային հանրությունը հստակ կարծիք ունի, որ ուժի կիրառումը չի բերելու կարգավորմանը և ուժի նոր կիրառումը խստորեն դատապարտվելու է միջազգային հանրության կողմից»,- նշեց Հայաստանի արտգործնախարարն ու ավելացրեց` հենց սա է բերում այն իրավիճակին, որ գոյություն ունի Ադրբեջանում այսօր, երբ հանրային կարծիքի մեծ մասը տրված է պատերազմին: Մինչդեռ դժվար է պատկերացնել, որ հայաստանցիների մեծ մասը տրամադրված է պատերազմին. «Հայաստանում ջախջախիչ մեծամասնությունը խաղաղության է տրամադրված»:

Իր հերթին ԵԱՀԿ գլխավոր քարտուղարը նշեց, որ կարգավորման միակ ուղին բանակցությունների ուղին է. «Միայն քաղաքական մակարդակով կարելի է անդրադառնալ այս հարցին, մենք ուզում ենք հորդորել կողմերին շարունակել այդ բանակցությունները: Իդեալական կլիներ, եթե այդ աշխատանքը ինտենսիվացվեր»,- նշեց նա:

Նախքան Երևան ժամանելը պարոն Զանյեն եղել է Բաքվում և հանդիպել նախագահ Ալիևի հետ. «Նախագահ Ալիևի հետ քաղաքական այս հարցերը շոշափվեցին: Ես տեսնում եմ խնդիրը, ես տեսնում եմ տարբերությունները: Նա մասնակցեց այդ քննարկմանը և դա արդեն համարում եմ դրական, այս միտումը կշարունակվի և հուսով եմ հնարավոր այլ նկատառումների կգերակշռի»,- իր խոսքը հավելեց եվրոպացի պաշտոնյան:

Նա նաև ընդգծեց, որ կարևոր է, որպեսզի կողմերը ցուցադրեն իրենց նվիրումը և պատրաստեն սեփական հանրությանը ի վերջո կնքվելիք համաձայնության: