Ձեր վստահելի աղբյուրը

«Ոստիկաններին ապօրինի հրաման տված հրամանատարները և նրանց կամակատարները պետք է քաջ գիտակցեն, որ լցվում է քաղաքացիների համբերության բաժակը, և մոտենում է այն օրը, երբ իրենք պետք է պատասխան տան իրենց այս և այլ նախորդող անիրավաչափ գործողությունների համար և հանրությունը դեռ հիշեցնելու է Վահե Ավետյանի հիշատակի մոմավառության օրը նրանց գռեհիկ հայհոյանքներով ուղեկցվող ծեծի տեսագրված պատկերները և օրենքի ողջ ուժով պատասխանատվության է կանչելու»,- սա մի հատված է «Վահե Ավետյան» հասարակական շարժման նախաձեռնող խմբի հայտարարությունից, որը լրագրողների հետ հանդիպման ժամանակ կարդաց նախաձեռնող խմբի անդամ համակարգային վերլուծաբան Գարեգին Չուգասզյանը` անդրադառնալով հայոց բանակի սպա, զինվորական բժիշկ Վահե Ավետյանի մահվան յոթնօրեքին մոմավառության ժամանակ ոստիկանների ու մասնակիցների միջև տեղի ունեցած բախմանը:

Նա նաև հայտարարեց, որ Վահե Ավետյանի մահվան քառասունքի օրը համահայկական մոմավառություն է կազմակերպվելու:
Խոսելով «Հարսնաքարի» գործով ընթացող քննության մասին, նախաձեռնության անդամ, ՀՀ մարդու իրավունքների առաջին պաշտպան Լարիսա Ալավերդյանն ասաց, որ ընթանում է նախապես ուղղորդված գործի քննություն ու փորձում են այնպես անել, որ այն անձինք, որոնց դաժան ծեծի պատճառով սպանվել է մայոր Վահե Ավետյանը, դատապարտեն 5-10 տարով ազատազրկման: «Արսեն Այվազյանի (Ոստիկանության քննչական գլխավոր վարչության հատկապես կարևորագույն գործերով բաժնի պետ) արտահայտած բոլոր նախադասությունները բերում են դրան` ևս մեկ անգամ նսեմացնելով ժողովրդի արժանապատվությունը»,- ասաց Լ. Ալավերդյանը` ընդգծելով, որ քաղաքական ուժերը փորձում են կոծկել իրականությունը ու նմանեցնեն Պողոս Պողոսյանի սպանության գործին:

Նրա խոսքով, հասարակության օգնությամբ պետք է հասնել հստակ արդյունքների` համաչափ պատժելիության սկզբունքի իրականացմանը: «Մեր պահանջն իր մեջ դաժանություն չի պարունակում»,- ընդգծեց Լ. Ալավերդյանը:

Հունիսի 17-ին ՊՆ զինվորական հոսպիտալի քիթ-կոկորդ-ականջ բաժանմունքի վարիչ Վահե Ավետյանը նույն հոսպիտալի վիրաբուժության բաժնի բժիշկ Արտակ Բայադյանը, նրա գործընկերներ կլինիկական օրդինատոր Գարիկ Սողոմոնյանը, Էդգար Նիկոյանը, ինչպես նաև Արկադի Աղաջանյանը մեկնել են Արզնու ձոր նշելու Աղաջանյանի ծննդյան օրը: Որոշ ժամանակ այնտեղ անցկացնելուց հետո ընկերներով Վահե Ավետյանի առաջարկով գնացել են «Հարսնաքար» ռեստորանային համալիրի բացօթյա սրահ շարունակելու խնջույքը և երաժշտություն լսելու: Մատուցողներից Դավիթ Ադամյանը դիտողություն է արել Վահե Ավետյանին` ասելով, որ սպորտային համազգեստով մուտքն արգելվում է: Վահե Ավետյանը մեկնել է տուն փոխել հագուստը և վերադարձել:

Երբ մատուցողը մոտեցել է իրենց Ավետյանը հարցրել է` «կարո՞ղ է գլխարկով էլ է արգելվում մուտքը ռեստորանային համալիր»: Այս հարցի շուրջ վիճաբանություն է առաջացել մատուցողի ու Վահե Ավետյանի միջև, որը շարունակվել է ռեստորանի բակում, և մատուցողը բռունցքով հարվածել է Ավետյանի դեմքին, նրան պատճառելով մարմնական վնասվածք: Դրան հաջորդել է ռեստորանային համալիրի մի խումբ աշխատակիցների կողմից Վահե Ավետյանին ու նրա ընկերներին ծեծի ենթարկելը: Արդյունքում Վահե Ավետյանը, նրա ընկերներ Գարիկ Սողոմոնյանը և Արտակ Բայադյանը տարբեր աստիճանի մարմնական վնասվածքներով տեղափոխվել են Զինվորական հոսպիտալ: Հունիսի 29-ին գիտակցության չգալով Վահե Ավետյանը մահացել է:

Հունիսի 18-ին հարուցվում է քրեական գործ ՀՀ Քր. Օր-ի 112 հոդվածի 2-րդ մասի հատկանիշներով` «Անձի առողջությանը դիտավորությամբ ծանր մարմնական վնաս պատճառելը»:

Հարուցված քրեական գործի շրջանակներում Վահե Ավետյանը, Արտակ Բայադյանը, Գարիկ Սողոմոնյանը, Էդգար Նիկոյանը և Արկադի Աղաջանյանը ճանաչվել են որպես տուժողներ: Դատաբժշկական փորձաքննության տվյալներով, Վահե Ավետյանի առողջությանը պատճառվել է ծանր վնաս, որը կազմվել է նրա կենդանության օրոք, մյուս երկուսին` պատճառվել է միջին ծանրության վնաս:
Այժմ կալանավորված են ռեստորանային համալիրի յոթ աշխատակիցներ: Նրանք են` «Հարսնաքար» ռեստորանային համալիրի անվտանգության աշխատակիցներ Գարիկ Մարգարյանը, Արման Խաչատրյանը, Արման Բաղդասարյանը, Նորայր Հայրապետյանը, վարորդ-առաքիչ Արթուր Բաբլոյանը մատուցող Դավիթ Ադամյան և մենեջեր Դավիթ Հայրյան: Վերջինը սակայն, ազատ է արձակվել, քանի որ տուժողներն ասել են, որ իրենց ծեծողների մեջ Հայրյանը չի եղել:

Վահե Ավետյանի մահվանից հետո դարձյալ նշանակվել է դատաբժշկական փորձաքննություն` պարզելու նրան պատճառված մարմնական վնասվածքների և մահվան միջև անմիջական պատճառահետևանքային կապը: Այս փորձաքննության եզրակացությունից հետո միայն հնարավոր կլինի պատասխանել հարցին` Վահե Ավետյանի մահվանից հետո քրեական գործով առաջադրված մեղադրանքը կվերաորակավորվի՞, թե՞ ոչ: