Ձեր վստահելի աղբյուրը

Ինչպես հայտնի է, հուլիսի 19-ին Արցախում կայանալու են նախագահական ընտրություններ, որին մասնակցելու հայտ են ներկայացրել 3 թեկնածուներ (մեկ թեկնածու ավել վաղ ինքնաբացարկ էր հայտնել): Նախընտրական պրոցեսների ու նոր ծրագրերի շուրջ Panorama.am-ը զրուցեց ԼՂՀ վարչապետ, նախագահի թեկնածու Բակո Սահակյանի նախընտրական շտաբի պետ Արա Հարությունյանի հետ:

-Պարոն Հարությունյան, դուք հանդիսանում եք ԼՂՀ գործող նախագահ, նախագահի թեկնածու Բակո Սահակյանի նախընտրական շտաբի պետը, ինչպես եք գնահատում նախընտրական արշավի սկիզբը և ընթացքը:
-Նախընտրական արշավի ինչպես սկիզբը, այնպես էլ ընթացքը չեն տարբերվում իրարից, այն ընթանում է կառուցողական մթնոլորտում, թեկնածուները հանդիպում են ընտրողների հետ, ներկայացնում իրենց ծրագրերը և որևէ բողոք դեռևս չի եղել:

-Գործող նախագահը հանդիպումների է մեկնում գրեթե մենակ, առանց իշխանական թիմի, անգամ դուք այդ հանդիպումներին չեք ուղեկցում նրան. Ինչպե՞ս կմեկնաբանեք դա, արդյո՞ք սա նոր ոճ է:
-Առանց իշխանական թիմի հանդիպումների մեկնումը, դա նախ և առաջ վկայում է, որ Բակո Սահակյանը ժողովրդի վրա որևէ արհեստական ազդեցություն չի ցանկանում գործել, հավասար պայմաններ ստեղծելով մնացած թեկնածուների համար, և ներկայանում է որպես նախագահի թեկնածու, ներկայացնելով իր նախընտրական ծրագիրը, իսկ անձամբ` որպես շտաբի պետ, կանոնակարգում եմ շտաբային աշխատանքները: Արդյոք նոր ոճ է, թե ոչ, կարող եմ ասել, որ ավելի շատ նոր քաղաքական մշակույթ է Արցախյան նախագահական ընտրությունների համար:

-Նախընտրական շրջանում Բակո Սահակյանը լինելով որպես ԼՂՀ նախագահի թեկնածու, նաև հանդիսանում է գործող նախագահ և պատասխանատու է ընտրությունների ազատ և ժողովրդավար անցնելու կազմակերպման համար, Ձեր կարծիքով, հաջողվում է այսօր այս ուղղությամբ ևս հաջողություններ արձանագրել:
-Իհարկե, անձամբ հանդիպել եմ մնացած թեկնածուների շտաբի պետերի հետ, պայմանավորվել ենք միասին աշխատել այս ուղղությամբ, տեղեկացնել միմյանց բոլոր ծագող թերությունների մասին` բոլորի համար ապահովելու հավասար պայմաններ, և որևէ բողոք դեռևս չի եղել:

-Նախագահի թեկնածու Արկադի Սողոմոնյանը վերջերս հայտարարել է, որ ԼՂՀ վարչապետը պետք է լինի այնպիսի անձ, ով միջազգային ճանաչում ունի, հաշվի առնելով այն փաստը, որ դուք եք գործող վարչապետը, ինչպե՞ս եք վերաբերվում այս կարծիքին:
-Թեկնածուն ուղակի ներկայացրել է իր պատկերացումը այդ հարցի վերաբերյալ:

-Նախագահի մյուս թեկնածու Վիտալի Բալասանյանը հայտարարել է, որ երկրի տնտեսությունը գտնվում է մի քանի հոգու ձեռքերում, առհասարակ, ինչ մակարդակի վրա է գտնվում այսօր ԼՂՀ տնտեսությունը:
-Միանշանակ համամիտ չեմ: Նախ, եթե մեր շրջապատում կան մարդիկ, որոնք զբաղվում են գործարարությամբ, պետք է ասել, որ նրանք միայն վերջերս չեն սկսել զբաղվել դրանով, և ընդհանրապես, Արցախում գործարարությամբ զբաղվելու համար նպաստավոր պայմաններ են, և այս ոլորտը ունի պետական աջակցություն` ինչպես նաև Վիտալի Բալասանյանի ընտանիքի և մերձավորների համար, կարծում եմ, ոչ մեկը որևէ խոչընդոտ չի ունեցել:

-Այսօր քաղաքական գովազդի լավ հարթակ են դարձել նաև սոցիալական ցանցերը, այս շրջանում չեք ուզում օգտվել դրանցից:
-Ընդհանրապես այս անցած հինգ տարիներին մենք զերծ ենք մնացել մեր աշխատանքները գովազդելուց, անգամ չգովազդելը երբեմն խնդիրներ է առաջացրել, որպես ԼՂՀ վարչապետ համացանցում բավարարվել եմ միայն հարց ու պատասխանի ձևաչափը պահպանելով, այսօր էլ մենք հեռու ենք մնում տարբեր միջոցներով ձայներ շեղելուց, տպավորություն, հատկապես արհեստական մթնոլորտ ստեղծելուց, մեզ համար նախ և առաջ թանկ են սոցցանցերում տարբեր քննարկումների մասնակցող այն քաղաքացիների կարծիքները, որոնք հավատում են այս թիմին, իրենց վստահությունն են հայտնում Բակո Սահակյանին և նրա կողմից ներկայացրած նախընտրական ծրագրին: Վստահ եմ, որ սա ամենաարդար և արդյունավետ մասնակցությունն է այդ դաշտում:

-Եթե մեկ նախադասությամբ փորձեք բնութագրել անցած 5 տարիները, ինչպես կբնութագրեիք:
-Այս անցած 5 տարիները իրենց մեջ ներառել են տարբեր կարևոր ծրագրեր, որոնք առաջին անգամ են սկսել իրականացվել Արցախում և որոնք էլ պահանջում են շարունակություն: Չնայած  կատարված մեծ աշխատանքին` մենք զերծ ենք մնացել ինքնագովազդից, մեր մասին բարձրաձայնելուց, կատարել ենք մեր աշխատանքը լուռ, առանց բարձրաձայնելու, այս պարագայում կարող եմ անվանել անցած 5 տարիները տքնաջան և լուռ աշխատանքի տարիներ:

-Պարոն Հարությունյան, ինչպես 2007թ.-ին, այնպես էլ հիմա, անձամբ տպավորություն ունեմ, որ Արցախում նախագահական ընտրությունները անցնում են քաղաքակիրթ մթնոլորոտում, բայց ինչպես 2007-ին, այնպես էլ հիմա թեկնածուների և նրանց թիմակիցների կողմից երբեմն հնչում են ինչպես քննադատություններ, այնպես էլ վիրավորանքներ, գործող իշխանությունների և նախագահի հանդեպ, չեք պատրաստվում պատասխանել նրանց:
-Ինչպես 2007-ին, այնպես էլ հիմա, վստահ ենք, որ այդ քննադատությունների և առավել ևս վիրավորանքների պատասխանը կտա Արցախի ժողովուրդը՝ հուլիսի 19 ին կատարելով իրենց ընտրությունը:

-Նախագահի թեկնածու Բակո Սահակյանի նախընտրական ծրագրում նաև ներկայացված են անցած 5 տարիներին ձերք բերված հաջողությունները, սոցիալական ոլորտում, ընդհանուր տնտեսության զարգացման գործում, իրավական համակարգում և այլն: Իսկ մյուս թեկնածուների կողմից նշվում է սոցիալական բևեռացման առկայություն, տնտեսության կենտրոնացում մի քանի մարդկանց ձեռքերում և այլն: Երկու հակառակ մոտեցումներ են առաջ գալիս, որ մոտեցումն է վերջապես համապատասխանում իրականությանը:
-Իրականությունը կարելի է գնահատել փաստերով, սոցիալական ոլորոտում սոցվճարները 10 միլիարդ դրամից հասել են 18 միլիարդ դրամի` այսինքն աճել են 80 տոկոսով, տնտեսության զարգացման տեսանկյունից այս տարիներին ապահովել ենք ՀՆԱ-ի 8-10 տոկոս աճ, անգամ համաշխարհային ճգնաժամի ժամանակ ապահովել ենք 5 տոկոս տնտեսական աճ, հանցագործությունների թիվը նվազել է, միայն 2011 թվականին նախորդ տարվա համեմատ այն նվազել է ավելի քան 21 տոկոսով: Իսկ արդյոք բավարար են այս ցուցանիշները. իհարկե, ոչ, հենց սրանով է պայմանավորված, որ անհրաժեշտ է շարունակել :

-Պարոն Հարությունյան, Ձեր թույլտվությամբ, ևս մեկ հարց: Հետևում ե՞ք մնացած թեկնածուների շտաբի կողմից ծավալվող քարոզչությանը, ինչպիսի՞ գնահատական կտաք նրանց աշխատանքներին:
-Քանի որ հանդիսանում եմ որպես ԼՂՀ նախագահի թեկնածու Բակո Սահակյանի նախընտրական շտաբի պետը, զերծ կմնամ այլ շտաբերի գործունեությունը գնահատելուց, բայց օգտվելով առիթից կոչ եմ անում բոլորին այս ընթացքում հրաժարվել քարոզչության այնպիսի տեսակներից, որոնք բացասաբար կանդրադառնան մեր երկրում տիրող բարոյահոգեբանական իրավիճակի վրա` բազմակարծության փոխարեն ստեղծելով առճակատում և վնասելով բոլորիս համար միակ գերակա արժեքը` պետական շահը:
Շնորհակալություն, մաղթում եմ բոլորին հաջողություն: