Ձեր վստահելի աղբյուրը

«Չէի ցանկանա կենտրոնանալ Գյումրիի քաղաքապետի մամուլի պատասխանատուի  ոչ պրոֆեսիոնալ մեկնաբանությունների վրա, պարզապես նշեմ, որ նրա անմիջական ղեկավարը կուսակցական է, ավելին՝ մարզային խորհրդի ղեկավարը: Իսկ կուսակցության անդամները՝ ղեկավար կազմից մինչև շարքային կուսակցականներ, ՀՀԿ-ական լինելով, պարտավոր են հետևել կուսակցության կանոնադրական և ծրագրային պահանջներին»,- Panorama.am-ի հարցին, թե ինչպես կմեկնաբանեք Գյումրիի քաղաքապետ Վարդան Ղուկասյանի մամուլի պատասխանատուի այն հայտարարությանը, թե Գյումրիի քաղաքապետը երբեք կուսակցական որոշումներով չի առաջնորդվել, նա ունի իր ծրագիրը, առաջադրվելու է, ասաց ՀՀԿ մամուլի խոսնակ Էդուարդ Շարմազանովը:

Հիշեցնենք, որ News.am-ի հարցին, եթե ՀՀԿ-ն որոշի, որ Վարդան Ղուկասյանը չի առաջադրում իր թեկնածությունը, ի՞նչ պետք է անեն, Գյումրիի քաղաքապետի մամուլի պատասխանատու Լիլիթ Աղեկյանը պատասխանել է. «Գյումրիի քաղաքապետը երբեք կուսակցական որոշումներով չի առաջնորդվել: Գյումրիի քաղաքապետը ունի իր ծրագիրը, առաջադրվելու է, իսկ իր կուսակցության «եթե»-ները դուք եք ասում»:

Հարցին, թե արդյո՞ք կուսակցությունը քննարկել կամ որոշում է ընդունել, թե ում է առաջադրելու Գյումրիի քաղաքապետի պաշտոնում, Է. Շարմազանովը նշեց. «Կուսակցությունում Գյումրիի քաղաքապետի թեկնածության հարցը դեռևս չի քննարկվել»:

Եթե կուսակցականները չեն ենթարկվում կուսակցական որոշումներին, ապա դա ինչ է ենթադրում հարցին, ԱԺ փոխխոսնակը պատասխանեց. «Հանրապետականը դասական քաղաքական կուսակցություն է, որտեղ կարգապահությունը շատ կարևոր տեղում է:
Անկարգապահ կուսակցականների համար ՀՀԿ կանոնադրությունը համապատասխան միջոցառումներ է նախատեսում»:

Նշենք, որ ըստ ՀՀԿ կանոնադրության 3.7 կետի՝ կուսակցության անդամը պարտավոր է`
• գործել կուսակցության կանոնադրության շրջանակներում.
• կատարել կուսակցության համագումարի, վերադաս մարմինների որոշումները և
ծրագրային դրույթները.
• մասնակցել սկզμնական կազմակերպության ժողովներին և միջոցառումներին.
• կատարել օրենքով և սույն կանոնադրությամμ նախատեսված այլ
պարտականություններ:

Իսկ նույն կանոնադրության 3.10 կետը սահմանում է, որ կուսակցության կանոնադրությամμ նախատեսված պարտականությունները կամ վերադաս
մարմինների որոշումները չկատարելու դեպքում կուսակցականը կարող է ենթարկվել կարգապահական պատասխանատվության`
• նկատողություն.
• խիստ նկատողություն.
• հեռացում կուսակցության շարքերից:

Կուսակցության անդամներին կարգապահական պատասխանատվության կարող է
ենթարկել սկզբնական կազմակերպության ժողովը կամ կազմակերպչական հանձնաժողովը:

Տարածքային և շրջանային խորհուրդների անդամներին կարգապահական պատասխանատվության կարող է ենթարկել համապատասխան խորհուրդը կամ կազմակերպչական հանձնաժողովը, իսկ ներկայացուցչական և ղեկավար մարմինների անդամներին կարգապահական պատասխանատվության կարող է ենթարկել միայն գործադիր մարմինը: