Ձեր վստահելի աղբյուրը

Հայաստանի բնապահպանության նախարար Արամ Հարությունյանը և Իրանի փոխնախագահ, բնապահպանական կազմակերպության նախագահ պարոն Մոհամմադ Ջավադ Մոհամմադիզադեհը ստորագրեցին Սյունիքի մարզում Անդրսահմանային պահպանվող տարածքում Խաղաղության այգու կառուցման հետ կապված հուշագիր:

Դեռևս 2011 թ. դեկտեմբերին երկու երկրների միջև ստորագրվել էր «Բնապահպանական համագործակցության վերաբերյալ Փոխըմբռնման հուշագիր», քննարկվել և ձեռք էր բերվել համաձայնություն երկու երկրների ընդհանուր սահմանում ստեղծել Անդրսահմանային պահպանվող տարածք` բարեկամության և խաղաղության այգի կառուցելու նպատակով:


Հուշագրի ստորագրումից հետո Ա. Հարությունյանն ասաց, որ տարածքը համապատասխանելու է միջազգային չափանիշներին: Ըստ նախարարի, Իրանի փոխնախագահի հետ մեկնելու են Սյունիքի մարզ, նաև Մեղրիի տարածաշրջան, որպեսզի տեղում ծանոթանան այն տարածքներին, որոնք նախատեսվում է համատեղ պահպանել: Հայկական կողմից տրամադրվելու «Արևիկ» ազգային պարկի տարածքը, որը կազմում է մոտ 34 հազար հետկար:

Մոհամմադ Ջավադ Մոհամմադիզադեհն ասաց, որ ծրագրի շրջանակներում իրանական կողմը հատկացնելու է շուրջ 30 հազար հեկտար տարածք, որտեղ գոյություն ունեն շուրջ 2500 բուսատեսակներ և 230 կենդանատեսակներ:

«Իհարկե, երկու երկրների սահմանները, աշխարհագրությունը չի փոխվում, ամեն երկիր իր տարածքում պահպանվող տարածքի պահպանություն է իրականացնելու, բայց իրականացվելու է համատեղ կառավարում»,- ասաց իրանցի պաշտոնյան ու նշեց, որ պետք է ջանքեր գործադրեն, որ տարածքը միջազգային ատյանների կողմից ճանաչվի որպես անդրսահմանային պահպանվող տարածք: Ըստ նրա, պետք է համատեղ պայքարեն տարածքում վերացող կենդանատեսկաների, բուսատեսակների դեմ, այն հիվանդությունների, որոնք վտանգ են սպառնում կենդանիներին ու բույսերին, տարածքում իրականացվելու է համատեղ գիտական հետազոտություններ:

Իրանի փոխնախագահի խոսքով, եթե պահպանվող տարածքի շրջանակներում գոյություն ունեն գյուղատնտեսական տարածքներ կամ ենթակառուցվածքներ, շարունակելու են իրենց բնականոն գործունեությունը:

Նշենք, որ նախքան հուշագրի ստորագրումը Հայաստանի բնապահպանության նախարարությունում նախարար Արամ Հարությունյանն ընդունել է ԻԻՀ փոխնախագահ, բնապահպանական կազմակերպության նախագահ պարոն Մոհամմադ Ջավադ Մոհամմադիզադեհի գլխավորած պատվիրակությանը:

Հանդիպման ընթացքում քննարկվել են Հայ-իրանական փորձագիտական խմբի կողմից իրականացրած աշխատանքները, ինչպես նաև այդ աշխատանքների արդյունքում կազմած արձանագրությունը, որի առանցքային կետերն են. առաջին` արդեն վերը նշված Անդրսահմանային պահպանվող տարածքում «Բարեկամության և խաղաղության այգու» ստեղծման հարցերը` քարտեզագրումը, տվյալների հավաքագրումը, գիտական ուսումնասիրությունները և նշված այգու ծրագրի համատեղ մշակումը, որպես Անդրսահմանային կենսոլորտային պահպանավայր, երկրորդ` Արաքս գետի ջրի համատեղ մոնիթորինգի իրականացման խնդիրները և այդ աշխատանքները հետագայում առավել ընդլայնելու հնարավորությունները, երրորդ`փոխադարձ աջակցություն ցուցաբերել ուսումնական, գիտատեխնիկական, տեղեկատվական մոնիթորինգային տեխնոլոգիաների բնագավառում:

ՀՀ բնապահպանության նախարար Արամ Հարությունյանը ողջունելով հյուրերին նշեց, որ յուրաքանչյուր հանդիպում նոր հնարավորություններ է ստեղծում առավել արդյունավետ համագործակցության, և որ աշխատանքային խմբերի կատարած աշխատանքը դրական է գնահատվում, ինչի արդյունքում կստորագրվի Հայ- իրանական փորձագիտական խմբի համատեղ կազմած արձանագրությունը:

ԻԻՀ փոխնախագահ, բնապահպանական կազմակերպության նախագահ Մոհամմադ Ջավադ Մոհամմադիզադեհը շնորհակալություն հայտնեց ինտենսիվ աշխատանքի համար և նշեց, որ Իրանի Իսլամական Հանրապետությունը պատրաստակամ է համագործակցել Հայաստանի Հանրապետության հետ, հատկապես բնապահպանության բնագավառում և կյանքի կոչել ձեռք բերված պայմանավորվածությունները: Նա նշեց նաև, որ վեց ամսվա ընթացքում արդեն 2-րդ անգամն է այցելում Հայաստան և յուրաքանչյուր այցի ժամանակ համատեղ համագործակցության նոր հորիզոններ են բացվում: