Ձեր վստահելի աղբյուրը

Նախընտրական իրադարձությունների շուրջ Արցախի Հանրապետության գործող Նախագահ Բակո Սահակյանի հարցազրույցը «Panorama.am» լրատվական գործակալությանը.

-Պարոն նախագահ, ո՞րն եք համարում Ձեր նախընտրական ծրագրի 3 ամենակարևոր կետերը, որոնք Ձեր վերընտրության պարագայում առաջինն եք իրականացնելու:

-Անելիքներ, իհարկե, շատ ունենք: Սակայն, բոլոր ծրագրերի իրականացումը և առկա խնդիրների լուծումը անմիջականորեն կապված են մեր պետականաշինության հիմքում ընկած սկզբունքներին անշեղորեն հետևելու հետ: Իսկ այդ սկզբունքները հետևյալն են. ազատ, անկախ և սոցիալական պետություն, ժողովրդավարական կառավարման համակարգ, երկրի և ժողովրդի անվտանգության ապահովում բոլոր հարթություններում: Այս հիմնարար սկզբունքներից որևէ մեկի խախտումը կարող է անկանխատեսելի հետևանքներ ունենալ Արցախի Հանրապետության ապագայի համար: Հետևաբար, այս արժեքներին հետևելը ես համարում եմ մեր պետականության գերխնդիրը, որից էլ կախված է մնացած բոլոր հարցերի արդյունավետ լուծումը:

-Հաշվի առնելով այն փաստը, որ ղարաբաղա-ադրբեջանական հարաբերությունների կարգավորումը Ձեր հանրապետության առաջնային խնդիրն է, ասացեք, խնդրեմ, ո՞րն է խնդրի լուծման Ձեր տեսլականը:

-Մեր տեսլականի հիմքում ընկած է երեք սկզբունք: Նախ, Արցախը կողմնակից է Ադրբեջանի հետ բոլոր առկա խնդիրների խաղաղ կարգավորմանը` բանակցային սեղանի շուրջ: Դա ամենևին էլ չի նշանակում, թե մենք պատրաստ չենք և հաստատակամ հարկ եղած դեպքում պաշտպանել մեր անկախությունն ու անվտանգությունը: ԼՂՀ պաշտպանության բանակն ի վիճակի է կասեցնել մեր պետականությանը և ժողովրդի անվտանգությանը սպառնացող ցանկացած փորձ: Բայց մենք անցել ենք պատերազմի միջով և համոզված ենք, որ այն չպետք է հանդիսանա հարաբերությունների կարգավորման միջոց:
Երկրորդ, բանակցային լիարժեք ձևաչափի վերականգնումը: Պաշտոնական Ստեփանակերտը միշտ նշել է, որ առանց բանակցային գործընթացին ԼՂՀ ուղղակի և լիարժեք մասնակցության անհնար կլինի կարգավորել ադրբեջանա-ղարաբաղյան հակամարտությունը: Մենք հասկանում ենք, որ լիարժեք ձևաչափի վերականգնման համար կպահանջվի ժամանակ, հատկապես` հաշվի առնելով Բաքվի որդեգրած խիստ ապակառուցողական կեցվածքը, որը, դժբախտաբար, գնալով դառնում է ավելի ծայրահեղական: Այնուամենայնիվ, Հայաստանի Հանրապետության հետ միասին մենք կշարունակենք աշխատել բանակցային գործընթացի լիարժեք ձևաչափի վերականգնման ուղղությամբ:
Եվ երրորդը, խոսք անգամ լինել չի կարող Արցախի անկախության և անվտանգության չնչին իսկ թուլացման մասին: Մեր ժողովրդի համար դրանք բացառիկ արժեքներ են և ենթակա չեն սակարկության: Անհնարին է վերադարձ անցյալին` թե կարգավիճակի և թե վարչատարածքային առումով:
Վերը նշված մոտեցումները պրագմատիկ են, և նրանց հիմքում ընկած են մեր անցած դժվարին ուղին, միջազգային փորձը և իրավունքը, ինչպես նաև արդարության գաղափարը:

-Պարոն Սահակյան, ինչպիսի՞ն եք տեսնում Արցախի տնտեսության զարգացումը, ո՞րն է ձեր երկրի զարգացման մոդելը, գերակա ոլորտները:

-Մեր հանրապետության տնտեսական զարգացման հիմքում ընկած են շուկայական տնտեսության և հզոր սոցիալական համակարգի գաղափարները: Դա հնարավորություն է տալիս ավելի դինամիկ և ճկուն դարձնել մեր տնտեսությունը` միաժամանակ պաշտպանելով հասարակության խոցելի խավերին:
Մեր տնտեսական զարգացման մյուս առանցքային բաղադրամասը հանդիսանում է Հայաստանի և Սփյուռքի հետ տնտեսական կապերի շարունակական ընդլայնումը և խորացումը: Դա նաև մեր պետականաշինության հիմնաքարերից է: Հենց Հայաստան-Արցախ-Սփյուռք եռամիասնության շնորհիվ է մեզ հաջողվել և հաջողվում հաղթահարել նույնիսկ անհաղթահարելի թվացող դժվարությունները: