Ձեր վստահելի աղբյուրը

ՀՀԿ փոխնախագահ Գալուստ Սահակյանն այն կարծիքին չէ, որ իր կուսակից պատգամավոր Նահապետ Գևորգյանին արժե ճնշումների տակ դնել, մանդատազուրկ անել` միայն այն բանի համար, որ վերջինիս որդին անընդհատ աղմկոտ պատմությունների մեջ է հայտնվում և իրավական պատասխանատվության չի ենթարկվում:
Ավելին, Գալուստ Սահակյանն անկեղծորեն կասկածում է, որ Նովոյի որդին կարող է իրեն նման բան թույլ տալ՝ զենքի սպառնալիքով ավտոմեքենա առևանգել:

Հիշեցնենք, որ ըստ շրջանառվող լուրերի Նահապետ Գևորգյանի որդին Արմավիրի մարզում միշտ աչքի է ընկել իր հակահասարակական ևհակաօրինական վարքագծով, սակայն միշտ ջրից չոր է դուրս եկել: Հետք հրապարակման համաձայն ՝ վերջինիս մասնակցությամբ այս տարվա ապրիլի 6-ին առևանգվեց ևդաժան ծեծի ենթարկվեց Արմավիրի մարզի թիվ 21 ընտրատարածքի պատգամավորության թեկնածու Մերուժան Մխոյանը, էլ չենք խոսում մայիսի 6-ի խորհրդարանական ընտրությունների ժամանակ Արտակ Գևորգյանի պահվածքի մասին, որն «աննկատ» էր մնում ոստիկանների աչքին:

-Կարելի՞ է նթադրել, որ հանրապետական պատգամավոր Նահապետ Գևորգյանի (Նավո )որդու գործողությունները կարող են պատճառ հանդիսանալ, որպեսզի պատգամավորը կուսակցության ճնշման տակ մանդատը վայր դնի և 21-րդ ընտրատարածքում նորից ընտրություններ նշանակվեն:
- Ես անգամ տեղեկություն չունեմ նրա որդու ձերբակալության վերբերյալ: Տեսնենք՝ համապատասխան լիազորված մարմիններն ինչ են ասում, ըստ այդմ համապատասխան բնութագիր կամ գնահատական մենք կտանք դրան:

- Իսկ կո՞շտ կլինի Հանրապետականի գնահատականը, ինչ եք կարծում, մանավանդ, եթե հաշվի առնենք այն, որ շրջառավող լուրերի համաձայն՝ նույն պատգամավորի որդին մշտապես աչքի է ընկել իր խուլիգանական գործողություններով , մասնավորապես, վերջին դեպքը եղել է ԱԺ ընտրությունների նախօրեին հոր մրցակցին՝ թիվ 21 ընտրատարածքի պատգամավորության թեկնածու Մերուժան Մխոյանին առևանգելն ու ծեծի ենթարկելը:
- Ես, կարծում եմ, որ շատ հեղեղուկ տրամաբանություն է դա, ով կատարել է հանցագործություն, նա էլ պիտի պատժվի՝ անկախ նրանից ով է, ում որդին է: Նույն տրամաբանությունից ելնելով, եթե այդ տղան հանցագործությունը կատարել է, ինչու՞ հենց ձեզ չպատժել (նկատի ունի թղթակցին), ինչու ոչ ձեզ , այլ մեկ ուրիշին պատժել (նկատի ունի ձերբակալվածի հորը՝ Նավոյին):Նախ Նահապետ Գևորգյանի որդին վաղուց արդեն չափահաս է և ինքնուրույն անձնավորություն է, երկրորդը ՝ լիազոր մարմինը ինքը կպատասխանի ձեզ հետաքրքրող հարցեին՝ երբ ժամանակը գա:
Ստացվում է, եթե Եվրոպայում ասենք որևէ հայ հանցագործություն անի , ուրեմն ի՞նձ պիտի պատժեն դրա համար: Դուք և Նահապետ Գևորգյանը քաղաքացիներ եք, հետևաբար ունեք համարժեք իրավունքներն ու պարտականությունները:

-Նախկին բնապահպանության նախարարը տարիներ առաջ այդ պաշտոնից հրաժարականով հեռացավ իր որդու հետ առնչվող «Տրիումֆ» սրճարանի աղմկոտ միջադեպի պատճառով : Արդյո՞ք Նահապետ Գևորգյանն այս պարագայում նույն հարթության վրա չէ:
- Բայց դա չի նշանակում, որ բնապահպանության նախկին նախարարը հանցագործ էր: Դա բխում է մարդու իրավունքներից և յուրաքանչյուր անձ ինքն է որոշում իր գործողությունները: Ամեն մարդ ինքն է իր մոտեցումը ցույց տալիս այս կամ այն երևույթի նկատմամբ:

-Մի՞թե ՀՀԿ-ին ձեռնտու են այնպիսի մարդիկ, ովքեր հաճախ են հայտնվում աղմկոտ միջադեպերի կենտրոնում՝ որդու կամ թիկնապահի պատճառով:
-Մեզ ընդհանրապես ձեռնտու չեն այն մարդիկ, ովքեր հասարակության մեջ հանցագործություն են կատարում: Կուսակցությունները աղանդ չեն. դրանք ժողովրդի կամ ազգի բաղկացուցիչ մասն են, և չեմ կարծում, որ յուրաքանչյուր դեպքի համար պետք է վերագրումներ արվի՝ ով ինչպես ցանկանա:

-Եթե Նահապետ Գևորգյանը չլիներ ՀՀԿ-ական, ինչ եք կարծում , կպատժվե՞ր նրա որդին թեկուզ միայն վերջին դեպքի՝ հոր մրցակցին առևանգելու և ծեծելու համար:
-Այդ միջադեպն էլ, ըստ երևույթին, մի հորինվածք էր, որ փորձ էր արվում նախընտրական շրջանում ֆոն ստեղծել: Դրա համար էլ չեմ ուզում անմիջապես հավատալ, որ դա իրողություն է: Այս դեպքում էլ, դեռ պետք է սպասել քննչական գերծողությունների ավարտին:

-Այսինքն` Դուք խոր կասկածներ ունեք , որ Նահապետ Գևորգյանի որդին իսկապես հանցագործություն է կատարել և ձերբակալվել է:
-Ես որևէ մեկին չեմ երաշխավորում, որ ինչ որ բան կանի, թե ոչ: Դրանք հասարակական պրոցեսներ են:

- Իսկ բացառու՞մ եք, որ այս թեման հանրապետականի ներսում առհասարակ քննարկման առիթ կարող է դառնալ:
- Կուսակցությունը հետաքննող մարմին չէ, ոչ էլ քննչական մարմին է, որ այսպիսի դեպքերը քննի -տեսնի հանցագործությու՞ն է, թե՞ չէ:Քննչական գործողությունները կլինեն, դատական պրոցեսները կավարտվեն, և այդ ծամանակ ոչ միայն այս դեպքի համար՝ այլ առհասարակ յուրաքանչյուր դեպքի մասով, մենք պատրաստ ենք մեր գնահատականները տալ: