Ձեր վստահելի աղբյուրը

Լեռնային Ղարաբաղի նախագահի թեկնածու Արկադի Սողոմոնյանն այսօր քվեարկելիս առավել քան երբևէ հուզված էր. նախագահական ընտրությունների արդյունքներից բացի նա նաև թոռնիկի ծնունդին է սպասում, ով մի քանի ժամից լույս աշխարհ կգա: Այս մասին հայտնում է «Ազատություն» ռադիոկայանը:

Սողոմոնյանը հայտարարեց, որ չընտրվելու դեպքում ևս քաղաքական պայքարը շարունակելու է:

«Ես միշտ լինելու եմ պետականամետ գործիչ. ես չեմ ընդունում, որ մարդ ընտրություններում պարտվում է, միանգամից անցնում է ընդդիմության շարքերը, կամ երբ մարդուն պետական պաշտոն են տալիս, անցնում է դիմության կողմը: Կարծում եմ` այն հարցերի լուծման հարցում, որոնք սխալ են դրված երկրում, ես ընդդիմություն եմ լինում, իսկ բոլոր այն հարցերը, որոնք վերաբերում է մեր պետականության ամրապնդմանը, ես պաշտպանելու եմ», - աղբյուրի փոխանցմամբ, Ստեփանակերտի ընտրատեղամասերից մեկում քվեարկելուց հետո հայտարարել է Սողոմոնյանը:

Սողոմոնյան Արկադի Իվանի

Ծնվել է 1962 թվականի սեպտեմբերի 24-ին, ԼՂՀ Մարտունու շրջանի Ղզղալա (Բերդաշեն) գյուղում:
Հայրենի գյուղի միջնակարգ դպրոցն ավարտել է գերազանցությամբ:
1980-1985թ.թ. սովորել է Ստեփանակերտի Պետական մանկավարժական ինստիտուտի ֆիզիկամաթեմատիկական ֆակուլտետում:
1985-1991թ.թ. աշխատել է Բերդաշենի միջնակարգ դպրոցում` որպես ուսուցիչ:
1985-1986թ.թ. համատեղությամբ դասախոսական աշխատանք է կատարել Ստեփանակերտի Պետական մանկավարժական ինստիտուտի ընդհանուր տեխնիկական առարկաների ամբիոնում:
1986թ. ընդունվել և 1990թ. ավարտել է ՀՍՍՀ ԳԱ ֆիզիկայի կիրառական պրոբլեմների ինստիտուտի ասպիրանտուրան, 1991թ. ստացել ֆիզիկամաթեմատիկական գիտությունների թեկնածուի գիտական աստիճան: Հեղինակ է տասնյակ գիտական թեզիսների և հոդվածների:
1992թ. աշխատանքի է անցել Հայկական պետական ճարտարագիտական համալսարանի Ստեփանակերտի մասնաճյուղում, այնուհետև Լեռնային Ղարաբաղի պետական համալսարանի ֆիզիկայի ամբիոնում` որպես ֆիզիկայի լաբորատորիայի վարիչ:
1992-1995թ.թ. ծառայել է ԼՂՀ Պաշտպանության բանակում: 1993թ. սեպտեմբերին նշանակվել է ԼՂՀ Պաշտպանության բանակի հակաօդային պաշտպանության զորքերի վարչության շտաբի պետ:
1995-2000թ.թ. եղել է ԼՂՀ 2-րդ գումարման Գերագույն խորհրդի պատգամավոր, սոցիալական ոլորտի հարցերի մշտական հանձնաժողովի նախագահ:
1999թ. ապրիլին ընտրվել է Արցախի սոցիալ-դեմոկրատական կուսակցության նախագահ: 2005թ. հունվարին հայտարարվել է ԱՍԴԿ և ԱԺԿ միաձուլման մասին:
2000-2005թ.թ. եղել է ԼՂՀ 3-րդ գումարման Ազգային ժողովի պատգամավոր` սոցիալական ոլորտի մշտական հանձնաժողովի անդամ ոչ մշտական հիմունքներով:
2001թ. որպես դոցենտ աշխատել է ԱրՊՀ մաթեմատիկայի ամբիոնում:
2002թ. հոկտեմբերին ընտրվել է ԼՂՀ Ազգային ժողովի վերահսկիչ պալատի առաջին նախագահ, միաժամանակ համատեղությամբ դասավանդել է ԱրՊՀ մաթեմատիկայի ամբիոնում` մինչև 2004թ.:
2005թ. հոկտեմբերին ազատվել է ԼՂՀ Ազգային ժողովի վերահսկիչ պալատի նախագահի պաշտոնից` լիազորությունների ժամկետն ավարտվելու կապակցությամբ: 2005-2008 թ.թ. եղել է ԱԺԿ գրասենյակի ղեկավար:
2008թ. մայիսին ընտրվել է ԼՂՀ 4-րդ գումարման Ազգային ժողովի պատգամավոր` համամասնական ընտրակարգով, նույն թվականի հունիսից` պետական-իրավական հարցերի մշտական հանձնաժողովի անդամ ոչ մշտական հիմունքներով:
2008թ. հոկտեմբերին ընտրվել է ԼՂՀ Ազգային ժողովի պետական-իրավական հարցերի մշտական հանձնաժողովի փոխնախագահ: 2010թ. հունիսին ավարտվել են նրա պատգամավորական լիազորությունները: 2010 թվականի մայիսից անկուսակցական է:
2011թ. հոկտեմբերից աշխատում է Հայաստանի պետական ագրարային համալսարանի Ստեփանակերտի մասնաճյուղում որպես ուսումնագիտական աշխատանքների գծով փոխտնօրեն:
Անկուսակցական է: Ամուսնացած է, ունի երկու որդի: