Ձեր վստահելի աղբյուրը

«Այն ինչ տեղի ունեցավ Դամասկոսում, ծանր հարված էր` ուղղված Բաշար Ալ-Ասադին և նրա մերձավոր շրջապատին. ահաբեկչական գործողության հետևանքով «գլխատվեց» Սիրիայի ռազմական վերնախավը»,- այս մասին, Panorama.am-ի հետ զրույցում նշեց արաբագետ Արմեն Պետրոսյանը` մեկնաբանելով Դամասկոսում տեղի ունեցած ահաբեկչական գործողությունը, որի հետևանքով զոհվել և վիրավորվել են Սիրիայի պաշտպանական և անվտանգության ոլորտի մի շարք բարձրաստիճան պաշտոնյաներ:

Ըստ արաբագետի` «Դա մանրակրկիտ կերպով ծրագրված գործողություն էր, որը հնարավոր է` իրականացվել է սիրիական ընդդիմության կողմից`արտաքին ուժերի գործուն աջակցությամբ, կամ էլ, հավանական է` պետական հեղաշրջման փորձ էր: Որպես ասվածի ապացույց դիտարկենք հենց գործողությունը. այսինքն մահապարտ ահաբեկիչը գործի է դրել ռումբը հենց այն ժամանակ և այն վայրում, որտեղ տեղի էր ունենում Հակաճգնաժամային շտաբի հերթական նիստն` այս անգամ արդեն առավել ընդլայնված կազմով, նաև կառավարության որոշ ներկայացուցիչների մասնակցությամբ, ինչը հավանաբար պայմանավորված էր վերջին օրերին մայրաքաղաք Դամասկոսում զինված խմբավորումների գործունեության ակտիվացմամբ և զինված բախումների աճով»:

Ա.Պետրոսյանի կարծիքով` վերոնշյալ պաշտոնյաների նկատմամբ անվտանգության միջոցառումները չափազանց բարձր մակարդակի էին հասցվել այն բանից հետո, երբ դեռ այս տարվա մայիսի վերջին իսրայելական և արևմտյան մի շարք ԶԼՄ-ներում տեղեկատվություն տարածվեց` իբր թունավորման միջոցով մահափորձ է իրականացվել վերոնշյալ խմբի ներկայացուցիչների դեմ, և նույնիսկ նշվում էին անուններ` նույն ՍԱՀ ՆԳ, Պաշտպանության նախարարները, Բ.Ալ-Ասադի փեսան` Ասեֆ Շաուքաթը և այլք, իսկ որպես մահափորձի իրականացնող նշվում էր Սիրիայի նախագահի` կուսակցական հարցերով տեղակալ Սայիդ Բախտիյանի խոհարարի անունը:

«Այս պարագայում ևս, կասկած չկա, որ իրականացնողը «յուրայիններից» էր, քանի որ զինված ճեղքել նման անվտանգության շղթան, գրեթե անհնարին է»,- հավելեց արաբագետը:

Խոսելով հետևանքների մասին`արաբագետը նշեց, որ սա ծանր հարված է` ուղղված սիրիական վարչակարգի դեմ, որը թոթափելու համար Սիրիայի նախագահին ժամանակ է պետք: «Ժամանակ, ինչը չունի Բաշար Ալ-Ասադը: Միանշանակ է, որ այս գործողությունից հետո կարելի է ակնկալել ռազմական գործողությունների երկկողմանի աճ. մի կողմից նախագահի մերձավոր շրջապատը կպահանջի համարժեք հաշվեհարդար` Արևելքի սովորույթներին բնորոշ «արյան վրեժի» տրամաբանության տիրույթում, մյուս կողմից` զինված ընդդիմությունը, ոգևորված նման հաջողություններից, կդառնա առավել ագրեսիվ և անկառավարելի և կակտիվացնի զինված գործողությունները երկրի ողջ տարածքում»,- եզրափակեց Արմեն Պետրոսյանը:

Արաբագետ Սարգիս Գրիգորյանի կարծիքով`ռազմական գործողությունները Սիրիայում, իսկ այս վերջին հինգ օրվա ընթացքում արդեն մայրաքաղաք Դամասկոսում և նրա արվարձաններում նոր թափով են շարունակվում Բաշար Ալ-Ասադի վարչակարգի դեմ ընդդիմադիր ուժերի կողմից հայտարարված «Հրաբուխ Դամասկոսում, երկրաշարժ Սիրիայում» ռազմական օպերացիայի համատեքստում:

Սիրիական զարգացումներում նկատվեց շրջադարձ, երբ Դամասկոսում` Սիրիայի ազգային անվտանգության շենքում, տեղի ունեցած պայթյունի հետևանքով սպանվեցին և վիրավորվեցին Սիրիայի մի շարք առանցքային բարձրաստիճան պաշտոնյաներ:
Թեպետ պայթյունի պատասխանատվությունը միաժամանակ ստանձնեցին երկու կազմակերպություններ` «Սիրիական ազատ բանակը» և «Լիուա Ալ-Իսլամ» իսլամական արմատական կազմակերպությունը, այնուամենայնիվ, ըստ Ս. Գրիգորյանի` «Այս գործողություններում իսլամական արմատական կազմակերպությունների մասնակցությունը չափազանցված է, և այստեղ ավելի շատ անհատական նախաձեռնության գործոնն է նկատելի, առավել ևս` պայթյունը տեղի է ունեցել Դամասկոսի ամենապաշտպանված թաղամասերից մեկում, և, ըստ ստացված տեղեկությունների, այն իրականացրել է անվտանգության համակարգի աշխատակիցներից մեկը»:

Խոսելով հետևանքների մասին` Ս. Գրիգորյանը նշեց. «Փաստ է, որ ռազմական գործողությունները շարունակվելու են էլ ավելի մեծ թափով և դաժանությամբ: Դա է վկայում այն, որ անմիջապես նորանշանակ պաշտպանության նախարարը` Ֆահդ Ջասեմ Ֆրեյջը, և այլ պաշտոնատար անձիք, ելույթ ունենալով սիրիական հեռուստատեսությամբ, հայտարարեցին սիրիական իշխանությունների վճռականության մասին` պայքարելու մինչև վերջ: Պետք է նշել նաև, որ ընդդիմադիրների կողմից նույնպես տեսանյութեր սկսեցին տարածվել Դամասկոսի արվարձաններից, որտեղ նշում էին իրենց հաղթանակը` սիրիական բարձրաստիճան պաշտոնյաների սպանության կապակցությամբ, ինչը վկայում է հակամարտող կողմերի վճռականության մասին:

«Հատկանշական է, որ պայթյունի օրը ՄԱԿ-ի Անվտանգության խորհրդում նախապատրաստվում էր սիրիական հակամարտության կարգավորման վերաբերյալ երկու բանաձևերի քվեարկությունը: Մինչդեռ Դամասկոսում տեղի ունեցած պայթյունից անմիջապես հետո, Ռուսաստանի արտգործնախարար Սերգեյ Լավրովը հանդես եկավ հայտարարությամբ` անընդունելի համարելով նման պայմաններում որևիցե բանաձևի ընդունման նպատակահարմարությունը, շեշտելով`«եթե դա հեղափոխություն է, ՄԱԿ-ն անելիք չունի այդտեղ»:

Սա վկայում է այն մասին, որ չկա այլևս որևէ սահմանափակում սիրիական իշխանությունների գործողություններում, որոնք կանաչ լույս ստացան ռազմական գործողությունները առավել վճռական ճանապարհով շարունակելու կապակցությամբ»-նշեց Սարգիս Գրիգորյանը:

Հիշեցնենք, որ հուլիսի 18-ի Դամասկոսում տեղի ունեցած պայթյունի հետևանքով զոհվել են Սիրիայի պաշտպանության նախարարը` Դաուդ Աբդալլահ Ռաջհան, պաշտպանության փոխնախարար Ասիֆ Շաուքաթը, ով նաև Բաշար Ալ-Ասադի փեսան էր, ռազմական հարցերով փոխնախագահի օգնական, նախկին պաշտպանության նախարար Հասան Թուրքմանին: Ահաբեկչության հետևանքով վիրավորվել էր ՆԳ նախարար Մուհամադ Աշ-Շաարան և այլ բարձրաստիճան պաշտոնյաներ: Պայթյունն իրականացրել էր մահապարտ ահաբեկիչը: Վերջինս կարողացել էր մուտք գործել անվտանգության ծառայության շենք, որտեղ ընթանում էր ուժային նախարարությունների և գերատեսչությունների ղեկավարների հանդիպումը և գործի դրել պայթուցիկը: