Ձեր վստահելի աղբյուրը

Երևանի ոստիկանապետ Ներսիկ Նազարյանը քմծիծաղով է արձագանքում իր պաշտոնանկության վերաբերյալ ժամանակ առ ժամանակ շրջանառության մեջ դրվող խոսակցություններին և կռահում է, թե որտեղից կարող են այդ խոսակցությունները շրջանառության մեջ դրվել ու ինչ միտումով:

Նշենք, որ այսօրվա հրապարակումներից մեկի համաձայն, Ոստիկանության կոլեգիայի նիստին Ներսիկ Նազարյանն իբր պիտի ենթարկվեր սուր քննադատության և ազատվեր զբաղեցրած պաշտոնից:

Ներսիկ Նազարյանը մասնակցել է կոլեգիայի նիստին, որը վարում էր ՀՀ նախագահ Սերժ Սարգսյանը, բայց, քանի որ նա չէր մնացել` մասնակցելու փոխոստիկանապետերի հետ լրագրողների հանդիպմանը, այդ փաստը դարձել էր քննարկման լուրջ առարկա:

«Ես այսօրվանից արձակուրդի մեջ եմ, և այդ պատճառով չմնացի մասնակցելու լրագրողների հետ հանդիպմանը: Իսկ կոլեգիայի նիստին, իհարկե, ներկա եմ եղել, բա Հանարպետության նախագահն էր գալիս, ինչպես կարող էի նչմասնակցել»,-Panorama.am-ի հետ զրույցում պարզաբանեց Ներսիկ Նազարյանը՝ ավելացնելով,-10 օրով մեկնում եմ հանգստի, կլինեմ Իտալիայում, այնուհետ կվերադառնամ Երևան ու միանգամից կանցնեմ աշխատանքային բնականոն ռիթմին»:

Այդուհանդերձ, անդրադառնալով իր պաշտոնանկության մասին գոնե տարին մեկ անգամ շրջանառության մեջ դրվող կեղծ լուրերին` կարծիք հայտնեց, թե դրանք իրականում իր աշխատանքից սրտնեղողների մարմաջն են.

«Ութ ու կես տարի է պաշտոնավարում եմ, այնքան մարդիկ կան, որ դժգոհ է դրանից: Ես չեմ կարողանում պատկերացնել, թե ինչ են դրանով ուզում ասել: Երևի դրանք մարդիկ են, որոնց ձեռ չի տալիս, որ ամեն ինչ նորմալ է ստացվում: Մանվանդ, վերջին ժամանակներում, երբ ոստիկանություն-հասարակություն հարաբերություններն այլևս ուրիշ են, ամեն ինչ ցիվիլ է ընթանում: Նույիսկ ամենածայրահեղ լարված միջոցառումներն անցնում են առանց միջադեպերի: Ինչ ասեմ, դե երևի ինչ-որ տեղ դա շատ ներվայնացնում է մարդկանց: Պատկերացրեք՝ ես որևէ մեկին չեմ էլ ուզում մեղադրել, քանի որ դա ինձ ավելի է ոգեշնչում, մարդիկ, ովքեր «անհանգստանում են» էդ մեր հաջողությունների պատճառով են «անհանգստանում», մեր աշխատելաոճից: Ամեն դեպքում, երբ իմ անձով այդքան «անհանգստացած են», դա նշանակում է, որ ես, իրոք, շատ եմ խանգարում»:

 Իր և ՀՀ ոստիկանապետ ՎլադիմիրԳասպարյանի հարաբերություններին անդրադառնալով՝ Ն. Նազարյանն ասաց.

«Վովա Գասպարյանը իր մարդկային էությամբ մեղմ անձավորություն է, համակարգի յուրաքանչյուր աշխատողի՝ կլինի Նազարյանը, թե մեկ ուրիշը, ինքն էն մարդկանցից է, որ բոլորի հաջողությունը համարում է իրենը, իսկ դա ինձ համար ամենամեծ գնահատականն է: Ես ինքս շատ ուրախ եմ, երբ իմ ոստիկանապետերը ուղեղ են ունենում և կարողանում են ինքնուրույն հարցեր լուծել, դա իմն ա: Եվ այսօր քաղաքի լավ աշախատանքը, Նազարյանի աշխատանքն ա: Այնպես որ` Վ. Գասպարյանն այն մարդկանց թվին ա պատկանում, որ երբեք խանդով չի վերաբերում»:

Հարցին, թե որքանով են իրականությանը համապատասխանում այն տեղեկությունները, որ վերջերս Վլադիմիր Գասպարյանը խիստ դժգոհել է իր ենթակա Ներսիկ Նազարյանի կատարած աշխատանքից, ոստիկանապետը պատասխանեց.

 «Դժգոհություն կլիներ, իհարկե, սպանության փաստ էին քննարկել. Էրեբունիում կատարված սպանություն, որը հետևանք էր 2008 թ չբացահայտված մի գործի: Եվ այդ ժամանակ իհարկե քննադատություն հնչեց, ինչպես որ ես եմ մինչ այդ եկել- քննդատել իմ բաժնին, թե էն ժամանակ լավ չեք աշխատել՝ շարունակություն ա եղել:
Դեպքը Երևան քաղաքում է եղել հետևաբար մեզ պիտի քննդատեր, ես էլ ղեկավարն եմ էդ կառույցի: Առաջին քննադատություն ինձ ուղղված պետք է լինի, դա բնական է, բայց դրանից պետք չէ չգիտեմ ինչ եզրակացություններ անել: Դրանք բնականոն աշխատանքային գործընթացներ են՝ ընդհանուր օպերատիվ իրավիճակի հետ կապված:

Այդ օրը Երևանում կատարված սպանությունների հարցն էր քննարկվում, որոնք դեռ չեն բացահայտվել և, բնականաբար, պետք է լիներ քննդատություն: Ես չեմ տեսնում, որ միտում կա: Մարդիկ ուզում են ինչ-որ լարվածություն ստեղծեն, ինչ որ հարաբերություններ սրեն, անիմաստ է: Թերթերն ուղղակի հետաքրքրություն համար գրում են»: