Ձեր վստահելի աղբյուրը

ԼՂՀ-ում երեկ տեղի ունեցած նախագահական ընտրությունների ընթացքը Panorama.am-ին մեկնաբանում է ՀՀ ԿԸՀ նախագահ, ԼՂՀ-ում Հայաստանի ԿԸՀ պատվիրակության ղեկավար Տիգրան Մուկուչյանը:

-Պարոն Մուկուչյան, ինչպե՞ս կբնութագրեք ԼՂ-ում կայացած ընտրական գործընթացը:
-Ես վստահաբար կարող եմ ասել, որ ընտրությունները կազմակերպված էին ամենաբարձր մակարդակով, և որ ամենակարևորն է` Ընտրական օրենսգրքի պահանջներին համապատասխան: Պետք է փաստել մի կարևորագույն հանգամանք` քաղաքակիրթ հանրության կողմից միջազգայնորեն ընդունված և արդեն արմատավորված ընտրական իրավունքի սկզբունքները, մասնավորապես` ընտրական գործընթացի թափանցիկությունը, հրապարակայնությունը, այդ գործընթացի նկատմամբ հասարակական վերահսկողությունը լիարժեք և ամբողջական ծավալով ապահովված էր:
Մենք պետք է ընտրական գործընթացը բաժանենք մի քանի փուլերի` նախընտրական քարոզչության փուլ, քվեարկություն, արդյունքների ամփոփում: Նախընտրական քարոզչության փուլում մենք լրատվական կայքերում զետեղված տեղեկությունների միջոցով, իհարկե, հետևել ենք ամբողջ գործընթացին և կարող ենք փաստել, որ ընտրական ամբողջ գործընթացը լիարժեք ծավալով ընթացել է Ընտրական օրենսգրքի պահանջներին համահունչ: Այսինքն` բոլոր թեկնածուներն ունեցել են լիարժեք հավասար հնարավորություններ` հասարակությանը ներկայացնելու իրենց տեսակետները, գաղափարները և մոտեցումները: ԿԸՀ-ում մեզ հավաստիացրին, որ այդ ընթացքում որևէ դիմում բողոք չի եղել` կապված նախընտրական քարոզչության ընթացքում իրավունքների ոտնահարման հետ, ինչը նշանակում է, որ կարող ենք հստակ փաստել հետևյալը` այդ ամբողջ գործընթացն ընթացել է շատ քաղաքակիրթ և Ընտրական օրենսգրքի պահանջներին համահունչ:

-Իսկ ի՞նչ կասեք բուն քվեարկության գործընթացի վերաբերյալ:
-Ինչ վերաբերում է քվեարկության կազմակերպմանը, մենք ԿԸՀ պատվիրակությամբ ԼՂՀ այցելել ենք ընտրություններից մեկ օր առաջ, եղել ենք որոշ տեղամասերում, հետևել ենք քվեաթերթիկների ստորագրման գործընթացին, ինչպես նաև տեղամասերի կահավորմանը: Երեկ առավոտյան արդեն այցելել ենք ընտրական տեղամասեր ինչպես Ստեփանակերտ քաղաքում, այնպես էլ Շուշիում: Եղել ենք մոտ երկու տասնյակ տեղամասերում: Այցելության ընթացքում հնարավորություն ենք ունեցել հանդիպելու նաև թեկնածուների վստահված անձանց հետ: Պետք է նկատել, որ մեր այցելած բոլոր ընտրատեղամասերում եղել են վստահված անձինք բոլոր թեկնածուների կողմից: Զրուցել ենք հանձնաժողովի անդամների հետ: Տպավորությունն այնպիսին էր, որ հանձնաժողովի անդամները լիարժեք ծավալով տիրապետում էին իրենց իրավունքներին և գործում էին բավականին պրոֆեսիոնալ: Իսկ թեկնածուների վստահված անձինք փաստում էին մի բան, որ քվեարկության օրվա ընթացքում, այսինքն մինչև այն պահը, երբ մենք այցելել ենք տվյալ ընտրատեղամաս, իրենց կողմից որևէ խախտման փաստ ոչ արձանագրվել է, ոչ էլ դրա վերաբերյալ ինչ-որ դիտողություններ ունեին: Ընտրատեղամասերում, որոնք մենք այցելել ենք, չենք հայտնաբերել որևէ մի բան, որը կարող էր որակվել որպես ընտրական գործընթացի խախտում: Այսինքն` ընտրական գործընթացը պատշաճ կազմակերպված էր բոլոր ընտրատեղամասերում:

- Այս ընտրություններին բավական մեծ թիվ էին կազմում նաև միջազգային դիտորդները, ի՞նչ կասեք այս առնչությամբ:
- Այո, ուրախությամբ պետք է փաստեմ նաև, որ այս անգամ բավականին շատ էին նաև միջազգային դիտորդները և օրվա ընթացում մենք կարողացանք բազմաթիվ դիտորդների հետ հանդիպել, կիսվել մեր տեսակետներով, խոսել մեր այցելած տեղամասերի մասին, և պետք է նկատել մեկ հանգամանք, որ համենայնդեպս նրանց դիտարկումները մերինից ոչնչով չէին տարբերվում և դա ևս փաստում է, որ բուն քվեարկության գործընթացն իրականացվում է օրենքի պահանջներին համապատասխան, ամենակարևորը` թափանցիկ, հրապարակային և բնականաբար լիարժեք վերահսկելի ընտրական գործընթացի թերևս բոլոր մասնակիցների` դիտորդների, վստահված անձանց, ԶԼՄ-ների ներկայացուցիչների համար: Արդեն գիտենք, որ բավականին մեծ ակտիվություն է գրանցվել: Կարծում եմ, ձայների հաշվարկը ևս հանձնաժողովների կողմից կիրականացվի բոլորի համար շատ թափանցիկ և հրապարակային:

- Իսկ կա՞ն փաստեր քվեարկության օրը տեղի ունեցած խախտումների հետ կապված:
- ԿԸՀ-ում մեզ տեղեկացրեցին, որ ամբողջ քվեարկության օրվա ընթացքում ստացվել է ընդամենը մեկ դիմում, որտեղ խոսվում են երկու փաստի մասին, որոնք ընդամենը առանձին դեպքեր են: Մեկը վերաբերում է այն հանգամանքին, որ գյուղական բնակավայրերից մեկում միանգամից երկու անձիք մտել են քվեախցիկ և երկրորդ դեպքը վերաբերում է թեկնածուի վստահված անձի նկատմամբ բռնություն կիրառելու դեպքի: ԿԸՀ-ն շատ արագ, օպերատիվ և բավականին պրոֆեսիոնալ արձագանքել էր այդ երկու բողոքներին, մասնավորապես առաջինի հետ կապված համապատասխան ահազանգ էին հնչեցրել ոստիկանությանը, տեղեկությունները ճշգրտվել էին: Մեզ ԿԸՀ-ում տեղեկացրեցին, որ ձեռնարկված միջոցառումների ընթացքում հնարավոր է եղել պարզել, որ դիմումում ընդգրկված տեղեկություններն, ըստ էության, հերքվել են և չեն համապատասխանում իրականությանը: Բայց, այնուամենայնիվ, կա դիմում, ԿԸՀ-ն կքննարկի այդ դիմումը, դրա վերաբերյալ բոլոր ապացույցները ծանրութեթև կանի, և բնականաբար, դրանցով պայմանավորված հետևություններ կանի:
Մի բան կարելի է հստակ փաստել, որ ընտրական գործընթացի ընթացքում առկա այս դիմումը սոսկ պարունակում է մեկ-երկու մասնավոր դեպք և որևէ պարագայում, ամենաանընկալելի ցանկություններով ու իղձերով պայմանավորված լինելու դեպքում անգամ չի կարող ոչ միայն ազդել, այլև ընդհանրապես ստվերել կամ բիծ թողնել ամբողջ ընտրական գործընթացի վրա: