Ձեր վստահելի աղբյուրը

Միայն այս տարվա ընթացքում Մարդու իրավունքների եվրոպական դատարանը (ՄԻԵԴ) Հայաստանի դեմ կայացրել է 9 վճիռ: Բոլոր այդ վճիռներով մեր երկիրը պարտավորվում է պետական բյուջեից որպես վնասի փոխհատուցում ՄԻԵԴ դիմած հայցվորին վճարել 100 հազարից ավել եվրո գումար: Պատասխանելով Panorama.am-ի թղթակցի հարցերին, Արդարադատության փոխնախարար Ռուբեն Մելիքյանն ասաց, որ ընդհանուր առմամբ Հայաստանի դեմ Եվրոպական դատարանը կայացրել է շուրջ 40 վճիռ:

Այս տարվա ցուցանիշն հատկապես, ցույց է տվել, որ ՄԻԵԴ-ում Հայաստանի դեմ վճիռների թվաքանակը աճում է: Մելիքյանը դա բացատրում է նրանով, որ վաղուց ստացված գործերը հիմա են քննվում, և այն ժամանակների իրավական խնդիրների մեծ մասը «այժմ լուծում են ստացել»: Բացի այդ, պարոն Մելիքյանը ՄԻԵԴ ստացվող գործերի աճը կապում է նաև հայ փաստաբանների մասնագիտական բարձր որակի հետ:

«Մեր փաստաբանությունն այնպիսի արագ տեմպերով է աճում, որ որակյալ բողոքների քանակը էապես մեծանում է: Այո, իսկապես, մեր փաստաբանները չեն զիջում եվրոպական բարձրակարգ փաստաբաններին», -հավելեց Մելիքյանը:

Փաստաբան Վահե Գրիգորյանի գործը` շրջադարձայի՞ն

Մարդու իրավունքների եվրոպական դատարանի` ընդդեմ Հայաստանի կառավարության փաստաբան Վահե Գրիգորյանի վերաբերյալ գործով վճիռը ստիպել է Հայաստանի իշխանություններին վճռական քայլեր իրականացնել ռեգրեսային պարտավորության իրականացման հարցում:

«Եվրոպական դատարանում Հայաստանի կառավարության ներկայացուցիչ Գևորգ Կոստանյանը Վահե Գրիգորյանի վերաբերյալ վճռից հետո հայտարարեց, որ մենք պատրաստվում ենք մանրամասն ուսումնասիրել այդ և ընդհանրապես, բոլոր գործերը, որպեսզի որոշակի գործողություններ անենք կոնկրետ պաշտոնատար անձանց պատասխանատվության ենթարկելու և դրա տեսակի ընտրության մասով: Եվ մենք ամենայն հավանականությամբ պատասխանատվության տեսակների մեջ կընդգրկենք նաև ռեգրեսային կարգով գումարների վերադարձումը», -մեր հարցին ի պատասխան, նկատեց Ռուբեն Մելիքյանը` նկատելով, որ իշխանությունները որոշել են սկսել հենց այդ վճռից:

Խնդրի արագ լուծման մասին այս պահին հնարավոր չէ խոսել, քանի որ վճիռը դեռևս օրինական ուժի մեջ չի մտել: Նշենք, որ ՄԻԵԴ կայացրած վճիռները օրինական ուժի մեջ մտնում են դրանք հրապարակելուց 3 ամիս հետո և նոր միայն կառավարության որոշմամբ գումարները փոխանցվում են հասցեատիրոջը:

«Ռեգրեսային կարգով գումարները հետ գանձելու հարցը փորձում ենք դարձնել մեզ համար օրակարգային. մեկ տարի հետո Հայաստանը ստանձնելու է Եվրոպայի խորհրդի նախագահությունը և այդ ժամանակահատվածում մենք ունենալու ենք օրակարգ ձևավորելու հնարավորություն: Եվ մենք պատրաստվում ենք օրակարգի ձևավորման ժամանակ հաշվի առնել նաև այս հարցը», -նկատեց ԱՆ փոխնախարարը:

Հարցին, թե ովքե՞ր են թիրախում հայտնվելու, Մելիքյանը պատասխանեց, որ դրանք կարող են  լինել դատավորներ, դատախազներ, իրավապահ այլ մարմինների ներկայացուցիչներ:

Այլ անդրադարձներ`

Վահե Գրիգորյանն ընդդեմ ՀՀ կառավարության. Հերթական հաղթանակը ՄԻԵԴ-ում

Հայաստանի կառավարությունը պարտվում է ՄԻԵԴ-ում. Փաստաբանները պահանջում են պատժել մեղավորներին

«Ախր, դաս չի լինում սրանց». Մալխասյանը գոհ է Եվրադատարանի կայացրած որոշումից