Ձեր վստահելի աղբյուրը

Հայաստանի Հելսիկյան ասոցիացիայի նախագահ Ավետիք Իշխանյանը մեծ հույսեր չի կապում դատաիրավական բարեփոխումների նոր ընդունված ծրագրի հետ և ասում է` բոլոր ժամանակներում էլ Հայաստանի իշխանությունները ցանկացել են վերացնել կոռուպցիան դատաիրավական համակարգից, ստեղծել արդար դատական համակարգ:

«Որևէ իշխանություն չի ասել, որ իրենք որևէ բան չեն փոխում, սակայն համակարգում վիճակը շարունակում է մնալ նույնը», -Panorama.am-ի թղթակցի հետ զրույցում 2012-2014 թթ դատաիրավական բարեփոխումների ռազմավարական ծրագրի ներկայացման ժամանակ մեկնաբանելով արդարադատության նախարարի հայտարարությունը, ասաց Ավետիք Իշխանյանը:

Նրա համոզմամբ, դատաիրավական համակարգում տարատեսակ բարեփոխումների արդյունքում, միևնույն է, գլխավոր հարցը լուծում չի ստանում` պետք է ունենալ դատական իշխանություն այլ ոչ թե` համակարգ:

«Հենց դատական իշխանությունն է անկախ, դատական համակարգը անկախ չի լինում: Դատական իշխանությունը պետք է անկախ լինի գործադիրից և այս տեսակետից այս բարեփոխումների փաթեթում չեմ տեսել դրույթ, որ նախատեսվում է նախագահի դե-յուրե ազդեցությունը վերացնել այս բարեփոխումների ժամանակ», -նկատեց Իշխանյանը:

Բանն այն է, որ Դատական օրենսգրքով նախագահը արդարադատության խորհրդի կողմից ներկայացված դատավորների ցուցակից իր նախընտրությամբ նշանակում է դատավորներ: Այսինքն, ըստ Իշխանյանի, արդարադատության խորհրդի և նախագահի միջև ամեն ինչ համաձայնեցված է: «Հետևաբար այդ ազդեցությունը վերացնելուն միտված որևէ փորձ ես չեմ տեսել այստեղ, մնացածը ուղղակի գեղեցիկ խոսքեր են ու կոսմետիկ փոփոխություններ: Այս ծրագրի հետ ես մեծ հույսեր չեմ կապում», -նկատեց Ավետիք Իշխանյանը:

Արդարադատության փոխնախարար Ռուբեն Մելիքյանն էլ կարծում է, որ անկախության բավարար մակարդակ Հայաստանի դատական համակարգը չունի: «Եթե բավարար մակարդակ լիներ, այս ծրագրի անհրաժեշտությունը չէր լինի», -արձագանքելով Ավետիք Իշխանյանի դիտարկմանը` նկատեց նա: Բայց նաև նշում է` այնպես էլ չէ, որ ոլորտում հաջողություններ չեն եղել:

Ավելի վաղ Panorama.am-ը տեղեկացրել էր, որ արդարադատության նախարար Հրայր Թովմասյանը հույս էր հայտնել, որ 2012-2014 թթ դատաիրավական բարեփոխումների ծրագրի իրականացման արդյունքում կլինի արդար, կոռուպցիայից և քաշքշուքներից զերծ դատական համակարգ:

«Անելու ենք ամեն հնարավորը, որ համակարգը զերծ պահենք կոռուպցիայից և բյուրոկրատական քաշքշուկներից: Այս ծրագրի գլխավոր պատասխանատուն Հայաստանի իշխանությունն է և դրա իրականացումը մեզ համար պատվի հարց է: Ծրագրի իրականացման արդյունքում ես տեսնում եմ Հայաստանի վաղվա օրը, որտեղ լինելու է արդար դատական համակարգ», - ասել էր Հրայր Թովմասյանը: