Ձեր վստահելի աղբյուրը

Սիրիայում ընթանում են լայնածավալ մարտական գործողություններ սիրիական կառավարական ուժերի և ըդդիմադիրների միջև: Վերջինիս շարքերում մեծ է նաև իսլամական ծայրահեղականների թիվը: Վերջին օրերին ինտենսիվ ռազմական բախումների թատերաբեմի վերածվեցին մայրաքաղաք Դամասկոսը և իր մեծությամբ երկրորդ քաղաքը` Հալեպը:

Սիրիայում ահագնացող ծավալների հասնող ռազմական հակամարտության առկայությունը կարող է ստեղծել մի իրավիճակ, որ Սիրիայի սպառազինության մեջ առկա քիմիական զենքը հայտնվի արմատականների ձեռքում, ինչը վաղուց ընդգրկված է Ալ-Կաիդայի և նրան հարող իսլամական ծայրահեղ արմատական կառույցների ծրագրային գործողությունների օրակարգում: Հարկ է նշել, որ միայն Ալ-Կաիդային է բնորոշ նմանատիպ զենք ձեռք բերելու կամ ստեղծելու համար երկարատև ու ծրագրային մոտեցումը, որի օգտագործումը, հատկապես 2001 թ-ի սեպտեմբերի 11-ից հետո, ռազմավարական տեսանկյունից ևս կապահովի զանգվածային սպանություններ: 1998 թվականին Օսամա Բեն-Լադենի կողմից հայտարարված այն միտքը, որ զանգվածային ոչնչացման զենքի ձեռքբերումը համարվում է նրա` որպես մուսուլմանի պարտականությունը, դարձավ ապացույց, որ այդ պարտականության իրականացումը կվերածվի իր հետևորդների համար երկար տարիների խնդրի, որին նրանք փորձում են լուծում գտնել նաև այսօր: Այս համատեքստում 2011 թ-ի օգոստոսին լուրեր տարածվեցին, որ Ալ-Կաիդան փորձում է ստեղծել քիմիական զենք իր ահաբեկչական գործողություններում օգտագործելու համար:

Սիրիայում տեղի ունեցող գործընթացներում հենց ամենասկզբից նկատվեց Ալ-Կաիդայի և նրան հարող արմատական խմբավորումների ներգրավվածությունը, իսկ 2012 թ-ի ձմռանը Ալ-Կաիդայի առաջնորդ Աիման Ազ-Զաուահիրին հայտարարեց, որ Ալ-Կաիդան ակտիվորեն մասնակցելու է Սիրիայում ընթացող հակամարտությանը` պայքարելով Բաշար Ալ-Ասադի վարչակարգի դեմ:

Սիրիան իր ռազմական պոտենցիալում ունի նյարդակաթվածահար ներգործության նյութեր և փոքր հեռահարության «ՍԿԱԴ» բալիստիկ հրթիռներ, որոնք ընդունակ են այդ մահացու քիմիական նյութերը հասցնել նշանակետին: Բացի այդ, Սիրիան հանդիսանում է քիմիական զենքի խոշոր արտադրող: Սիրիայում 4 գործարաններ (Հալեպում, Հոմսում, Համմայում, Լաթաքիայում) զբաղված են քիմիական զենքի արտադրությամբ: Քիմիական զենքի հսկայական պահեստներ կան Դամասկոսի մերձակայքում և Հոմսում: Երբեք նման քիմիական սպառազինություն ունեցող երկիր չի ընկել քազաքացիական պատերազմի հորձանուտի մեջ, և ամեն զարգացում սպասելի է այդ թվում այն, որ քիմիական զենքը կարող է հայտնվել ծայրահեղականների ձեռքում: Այս հանգամանքը օրերս ակտիվ քննարկումների առիթ է դարձել Բաշար Ալ-Ասադին ընդդիմադիր որոշ արտաքին ուժերի կողմից` նպատակ ունենալով նաև ապագայում արդարացնել Սիրիա հնարավոր ռազմական ներխուժումը: Սիրիական կողմը անմիջապես արձագանքեց` հայտնելով, որ սիրիական կառավարական ուժերը չեն կիրառի քիմիական զենք ներքին բախումների ժամանակ` ավելացնելով, որ այն կկիրառվի միայն Սիրիայի վրա արտաքին հարձակման դեպքում:

Փաստ է, որ քիմիական զենքի գործածումը, հատկապես վերջինիս հայտնվելը ծայրահեղականների ձեռքում, ոչ միայն էլ ավելի կխորացնի ճգնաժամը Սիրիայում, այլև պայթյունավտանգ կդարձնի տարածաշրջանը մասնավորապես, իսկ համաշխարհային գործընթացներն ընդհանրապես: