Ձեր վստահելի աղբյուրը

Խորհրդարանական ընտրություններից հետո Կրթության և գիտության նախարար Արմեն Աշոտյանը «Ժառանգություն» խմբակցության արդեն նախկին անդամ Անահիտ Բախշյանի վերաբերյալ ասել էր. «Ինչ վերաբերում է տիկին Անահիտին, ես պատրաստ եմ իր աշխատանքային ունակություններին, կենսափորձին, մասնագիտական փորձին, աշխատասիրությանը համարժեք ուշադրություն ցուցաբերել: Մենք կարիք ունենք կրթության ոլորտի լավ մասնագետների, նվիրյալ մարդկանց համախմբման՝ հանուն մեր ապագայի, և սա մաշված արտահայտություն չէ»:

Թե ի՞նչ էր այն իրականում նշանակում և արդյո՞ք հավաստի են այն տեղեկությունները, որ տիկին Բախշյանը այսուհետ ներկայացված կլինի կրթական համակարգում  Panorama.am-ը զրուցեց նախկին պատգամավորի հետ:

-Տիկին Բախշյան, վերջերս նախարար Աշոտյանը հրապարակավ անդրադարձել էր Ձեր անձին, ինչը ենթադրել տվեց, որ առարկայական առաջարկ եք ստանալու: Անցել է ավելի քան մեկ ամիս, խոսքերից գործի անցում եղե՞լ է:

-Միանշանակ, և ես շնորհակալ եմ այդ գնահատականների համար, որոնք իսկապես պարտավորեցնող են և սրանք նույնպես հերթապահ խոսքեր չեն: Ես ծառայել ու ծառայելու եմ մեր պետությանը և ուրախ եմ, որ այս հարցում նախարարի և իմ տեսակետներն ու մոտեցումները զուգամիտվում են: Կրթության խնդիրների լուծման գործընթացում մենք լուրջ ջանքեր ենք ներդնում միմյանց լրացնելու համար՝ մնալով մեր քաղաքական ընդդիմադիր դիրքերում:

Ի դեպ այսօր պարոն Աշոտյանի ծննդյան օրն է և ես նրան սրտանց շնորհավորելով՝ մաղթում եմ ամուր առողջություն, իմաստություն և երկարատև ծառայություն` կրթության ոլորտում:

-Այդ դեպքում ե՞րբ և որտե՞ղ ենք այսուհետ տեսնելու նախկին պատգամավոր Անահիտ Բախշյանին:

-Արդեն կարող եմ հրապարակել իմ նորությունը՝ օգոստոսի 6-ից աշխատելու եմ Կրթության ազգային ինստիտուտում՝ փոխտնօրեն: Իսկ այս պահին դեռևս հանգստանում եմ Ջերմուկում:

-Ո՞րն է լինելու այն ոլորտը, որ հանձնվելու է Ձեր տնօրինությանը, ի՞նչ նախաձեռնություններով եք պատրաստվում հանդես գալ և եթե աևդեն ուրվագծել եք, ապա՝ ո՞րն է լինելու Ձեր առաջին քայլը:

-Սկսեմ վերջին հարցից: Այստեղ՝ Ջերմուկում որոշվեց առաջին քայլս, երբ ինձ մոտեցան Հայաստանի տարբեր մարզերից և Երևանից հանգստացող ուսուցիչներ: Նախ, շատ հաճելի էր այս տարի այդքան շատ ուսուցիչների հանդիպել Ջերմուկում: Պարզվեց, որ նրանք արդեն օգտվում են իրենց հասանելի սոցիալական փաթեթից, որին սկզբից չէին հավատացել, սակայն այսօր փաստ էր նրանց հանգստանալը: Ես նույնպես ուրախ եմ իրենց համար: Այնուհետև նրանք բարձրացրեցին մի խնդիր, որի լուծման ուղղությամբ պետք է աշխատել ԿԱԻ-ում:

Բանը նրանում է, որ ուսուցիչների վերապատրաստման դասընթացներն իրականացնող որոշ ընկերություններ դրանք կազմակերպում են ուսուցիչների արձակուրդների օրերին, որի իրավունքը չունեն: Ուսուցչի արձակուրդի օրերի հաշվին իրականացված վերապատրաստումը կոպտորեն խախտում է նրա հանգստի իրավունքը: Մասնավորապես, Ջերմուկում հանգստացող ուսուցիչների մեջ կային մարդիկ, ովքեր կիսատ էին թողել վերապատրաստման դասընթացը, որովհետև նախապես ունեցել են հանգստի ուղեգիր, որը ձեռք էին բերել սոցիալական փաթեթով: Ստացվում է, որ ուսուցչին անպայման հանգստանալու համար պետությունը մի կողմից նպաստում ու ֆինանսապես օգնում է, մյուս կողմից խոչընդոտվում է այդ իրավունքը: Ու այդ ուսուցիչներն իրավամբ հարցնում էին, թե ինչպե՞ս է լուծվելու այս խնդիրը: Քանի որ ինձ համար նոր էր այն, ես ուսուցիչներին խոստացա ԿԱԻ-ում աշխատանքի անցնելու առաջին օրն իսկ ուսումնասիրել վերապատրաստման գործընթացի մանրամասները, պարզել պատճառներն ու աշխատակազմի հետ համատեղ գտնել լուծումները: Իսկ որ պետք է գտնել ելք և ուսուցչի արձակուրդի օրերին նրան չաշխատեցնել, երկու տեսակետ չի կարող լինել:

Եվ որպեսզի իմ ուսուցիչ գործընկերները վստահ լինեն, որ այս հարցն իսկապես բարձրացվելու է ԿԱԻ-ում, օգտագործելով այս հարցազրույցի առիթը, հրապարակում եմ այն: Խնդրի լուծման ընթացքի մասին ուսուցիչներն անպայման կտեղեկացվեն:

Հիմա գամ առաջին ու երկրորդ հարցերին: Դպրոցի տնօրենի պաշտոնում ութամյա և խորհրդարանական հնգամյա գործունեության ընթացքում համոզվեցի, որ ցանկացած ոլորտում ԱԺ–ում ընդունված օրենքների ու Կառավարության կողմից դրանցից բխող որոշումների, իրավական փաստաթղթերի միջև հաճախ հանդիպում են, մեղմ ասած, տարաձայնություններ, որոնք կարող են նույնիսկ հակասել տվյալ ոլորտի պետական քաղաքականությանը: Այս տեսակետից, կարծում եմ կրթության ոլորտի օրենսդրական և ենթաօրենսդրական ակտերի կայացման գործընթացում պետք է բարձրացնել ԿԱԻ-ի դերակատարումը՝ որպես կրթության բովանդակության պատասխանատու կարևոր մարմին, նա պետք է այդ գործընթացի վրա մշտապես վերահսկող գործառույթ իրականացնի: Այնուհետև ԿԱԻ-ի իմ գործընկերների հետ համատեղ, որոնց համարյա բոլորին ճանաչում եմ  հարյուր տարի՚, շարունակելու եմ աշխատել խորհրդարանում իմ կողմից բարձրացրած՝ դասագրքերի ընտրությանը, նրանց ներկայացվող սանիտարահիգիենիկ պահանջներին, ուսուցչի կատարելագործման ոլորտն առավել արդյունավետ կազմակերպելուն, ներառական կրթության, ավագ դպրոցների կայացմանն ուղղված խնդիրների լուծման և այլ հանձնարարություններ կատարելու ուղղությամբ: