Ձեր վստահելի աղբյուրը

Սիրիահայերն աշխատում են քաղաքական հարցերում պահպանել չեզոքություն և չեն խառնվում ներսիրիական գործերին: Այսօրվա ասուլիսի ժամանակ այդ մասին հայտարարեցին Սիրիայից Հայաստան բնակության եկած գրող, բանաստեղծ Տիգրան Գաբոյանը, դեղագործ Կառլոս Գասպարյանը , ռեստորանի սեփականատեր Վազգեն Մեսրոպյանը և ոսկերիչ Վիգեն Պոզեաքալյանը: Ըստ բանախոսների` Սիրիայում գործում են զուտ ահաբեկչական խմբավորումներ, որևէ ազգայի կամ դավանական հողի վրա ընդհարումներ չկան, իսկ հայկական համայնքն անվտանգ է այնքանով, որքանով հեռու է մարտական գործողությունների թատերաբեմից:

«Այսօր առավոտյան եմ խոսել Սիրիայում բնակվող քեռուս հետ: Ասաց, որ իրավիճակը գնալով թեժանում է: Եղբայրս ու քույրս ավելի վաղ են տեղափոխվել Հայաստան», - ասաց Վ.Մեսրոպյանը:

Ի պատասխան panorama.am-ի  լրագրողի դիտարկմանը, թե ինչու՞ են Հայաստան ժամանած սիրիահայերը զգուշավորությամբ խոսում Սիրիայի իրականության մասին և արդյոք կա որևէ վախ, բանախոսները վստահեցրեցին որ ամեն ինչ վատ չէ, երկրի հայությունն ապահով է: Վիգեն Պոզեաքալյանը նշեց միայն, որ սիրիահայ համայնքը ոչ ոքից չի վախենում, պարզապես գնահատականներ տալուց զերծ է մնում` զգուշավորություն պահպանելու նկատառումներից ելնելով:

Բանախոսները նաև միաձայն հերքեցին այն տեսակետը, որ Սիրիայում ընթանում է քաղաքացիական պատերազմ, ընդ որում` ոչ միայն քաղաքական, այլ նաև` էթնո-կրոնական հիմքերի վրա: Նրանց խոսքով` պարզապես Բաշար Ասադի դեմ գործում են դրսից սնվող ահաբեկչական խմբավորումներ և մի քանի այլ կազմակերպություններ, իսկ ազգային – դավանական հողի վրա որևէ սպանության կամ այլ դեպքի  մասին նրանք տեղյակ չեն:

Հիշեցնենք, որ Սիրիայի Արաբական Հանրապետության բնակչության կեսից ավելին սունի արաբներ են, բայց իշխանությունը 1963 թվականին պատկանում է ԲԱԱՍ կուսակցությանը, որի անդամների մեծ մասը, այդ թվում նաև երկրի նախագահ Բաշար Ասադը  ալևվի էթնոկրոնական համայնքից է, որը կազմում է բնակչության ընդամենը 10 տոկոսը: Գործող ռեժիմի դեմ պայքարը սկսվել է 2011 թվականի մարտից: Հատկանշական է, որ ընդդիմության այս ընդվզումը ստացավ «ուրբաթօրյա հեղափոխություն» անվանումը, քանի որ սկզբնական շրջանում հակաիշխանական ելույթները տեղի էին ունենում ուրբաթ օրերը` մզկիթներում աղոթքներից հետո:

Նշենք, որ ասուլիսին ներկա սիրիահայերն իրենց կարծիքներն արտահայտեցին նաև հայաստանյան իրականության մի քանի  դրսևորումների հանդեպ: Այսպես` Տիգրան Գաբոյանը գոհունակություն հայտնեց Հայաստանի  իշխանությունների՝ անձնապես իր հանդեպ ցուցաբերած վերաբերմունքից:

«Հայաստանի Հանրապետության ջանքերը՝ թե’ պետական, թե’ հասարակական կազմակերպությունների առումով, սիրիահայերի նկատմամբ ես անձամբ դրական եմ գնահատում»,-ասաց նա` հայտնելով, որ Հայաստան է ժամանել ՀՀ քաղաքացիություն ստանալու համար և ցանկանում է այստեղ բիզնես գործունեություն ծավալել:
 
«Հայաստան եկել ենք սեփական՝ հագուստի բիզնես հիմնելու նպատակով, և կախված մեր ունեցած հաջողություններից` կտեսնենք՝ ուզում ենք վերադառնալ Սիրիա՞, թե՞ մնալ այստեղ»,- նշեց Տիգրան Գաբոյանը:

Ի դեպ, նա նաև խոսեց դեպի Սիրիա «Արմավիա»-յի չվերթների մասին և ասաց, որ  սիրիահայերի հոսքը Հայաստան զգալիորեն կմեծանա, եթե չվերթի գինն ավելի մատչելի դառնա:

Իր հերթին Կառլոս Գասպարյանը ասաց, որ ՀՀ սփյուռքի նախարարության հոգածությունը զգացել են դեռ «Զվարթնոց» օդանավակայանից:

«Գոհ եմ, մինչ այսօր էլ հետաքրքրվում են մեզնով, ընդառաջում մեր գործերին: Պատրաստվում եմ Հայաստանի քաղաքացիություն ձեռք բերել, ընկերներս քաղաքացի դարձել են մոտ վեց ամսում»,- ասաց բանախոսը:

Վազգեն Մեսրոպյանը հակառակը` դժգոհություն հայտնեց, որ սիրիահայերին Հայաստանում վերաբերվում են որպես սիրիացիների՝ վիզաների հարցով բազմաթիվ դժվարություններ առաջացնելով:

«Ավելի լավ կլիներ, որ ՀՀ քաղաքացիություն, գոնե սփյուռքահայերի, սիրիահայերի համար, ստանալու գործընթացն իր լուծումը ստանար ավելի կարճ ժամանակահատվածում, հիմա մենք քաղաքացիություն ենք ստանում 6 ամսվա ընթացքում: Կան մարդիկ, որ մեկ տարի է՝ դիմել են, բայց դեռ ՀՀ անձնագիր չեն ստացել: Մնացած հարցերով հայաստանյան իշխանությունները լավ են վերաբերվում սփյուռքահայերին»,- ասաց նա: