Ձեր վստահելի աղբյուրը

Ներկայացնում ենք Panorama.am-ի հարցազրույցը Երևանի քաղաքապետ Տարոն Մարգարյանի հետ:

-Նախ, պարոն քաղաքապետ, փոխանցեմ Ձեզ մեր որոշ համաքաղաքացիների մտահոգությունն այն մասին, որ Դուք՝ լինելով Ավան վարչական շրջանի թաղային համայնքի նախկին ղեկավար ու բնակիչ, շարունակում եք ավելի շատ ուշադրություն հատկացնել Ավանին, քան մյուս վարչական շրջաններին: Ինչպե՞ս կարձագանքեք այդ մտահոգությանը:

-Մտահոգության կարիք չկա: Այո, ես այսօր էլ բնակվում եմ Ավան վարչական շրջանում և եղել եմ Ավանի թաղային համայնքի ղեկավարը, բայց այսօր, որպես Երևանի քաղաքապետ, ինձ համար մայրաքաղաքի բոլոր 12 վարչական շրջանները հավասար են և բոլորն էլ իմ ուշադրության կենտրոնում են:

Մեր համաքաղաքացիների անհանգստությանն ի պատասխան կվստահեցնեմ, որ իմ աշխատանքային շրջայցերի շրջանակում ես ավելի շատ լինում եմ մյուս 11 վարչական շրջաններում, քան Ավանում: Բացի այդ, Երևանի համաչափ զարգացման ծրագրի շրջանակում այսօր բոլոր վարչական շրջաններում էլ տարվում են ծրագրային աշխատանքներ, որոնք, վստահ եմ, տեսանելի են և գնահատվում են մեր համաքաղաքացիների կողմից:

Ի դեպ, Երևանի համաչափ զարգացման ծրագրի հետ կապված նշեմ, որ մենք այն ներկայացրել էինք մեր նախընտրական ծրագրում, որը արժանացել էր մեր համաքաղաքացիների հավանությանը: Եվ, ըստ այդմ, ստանալով նրանց վստահության քվեն, մենք այս տարիների ընթացքում շարունակաբար աշխատանքներ ենք տարել ու տանում Երևան համայնքի համաչափ զարգացման ուղղությամբ: Արդեն իսկ նկատելի է, որ մայրաքաղաքի կենտրոնում իրականացված որոշ խոշոր ծրագրեր այսօր իրականացվում են նաև մյուս վարչական շրջաններում:

Համաչափ զարգացման ծրագրի շրջանակում մենք նախատեսել ենք նաև բոլոր վարչական շրջաններում ունենալ կենտրոններ, որոնք, ըստ էության, կդառնան տվյալ վարչական շրջանի ինչպես մշակութային և ժամանցային, այնպես էլ հանգստի կազմակերպման հիմնական կենտրոնատեղին: Մասնավորապես, Աջափնյակ վարչական շրջանում մենք այսօր աշխատանքներ ենք տանում ապագա կենտրոնի ստեղծման ուղղությամբ, բարեկարգում ենք այգին և պուրակը, որը շուտով կհանձնենք մեր բնակիչների տնօրինմանը: Այս տարի ամբողջովին բարեկարգել և արդեն մեր բնակիչներին ենք հանձնել Նորք-Մարաշ և Էրեբունի վարչական շրջանների համապատասխան կենտրոնները: Այժմ ընթացքի մեջ են նաև Մալաթիա-Սեբաստիա, Շենգավիթ, Նոր-Նորք վարչական շրջանների կենտրոնների բարեկարգման աշխատանքները: Մի խոսքով, բոլոր վարչական շրջաններում էլ ունենալու ենք նման կենտրոններ:

-Պարոն Մարգարյան, Երևանի` հատկապես կենտրոնում շրջելիս կարելի է հանդիպել վաղուց կիսավարտ մնացած շինությունների: Քաղաքային իշխանություններն ի՞նչ լծակներ և հնարավորություններ ունեն նշված կիսակառույցների շինարարական աշխատանքներն արագացնելու և հստակ ժամկետներ սահմանելու առումով և ի՞նչ է արվում այդ ուղղությամբ:

-Անավարտ շինությունների մասով, վարչապետի առաջարկությամբ, կառավարությունում ստեղծվել է աշխատանքային խումբ, որտեղ թե՛ իրացման գոտիների և թե՛ անավարտ մնացած շինությունների հետ կապված քննարկումներ պետք է անցկացվեն, վերանայվեն բոլոր փաստաթղթերը, որից հետո աշխատանքային խումբը կներկայացնի իր եզրակացությունը: Աշխատանքային խմբում ընդգրկված են նաև քաղաքապետարանի ներկայացուցիչները և ակտիվ մասնակցում են այդ աշխատանքներին:

-2 տարի է, ինչ խոսվում է մայրաքաղաքը բեռնաթափելու ծրագրի մասին: Ի՞նչ է իրենից ներկայացնում ծրագիրը և որո՞նք են դրա իրականացման հաջորդական քայլերը: 

-Քաղաքային իշխանությունների համար առաջնահերթը մայրաքաղաքի տրանսպորտային բեռնաթափումն է: Ըստ այդմ մշակել ենք մայրաքաղաքի տրանսպորտի զարգացման հայեցակարգ, որի շրջանակում նախատեսել ենք նաև միկրոավտոբուսները փոխարինել միջին և մեծ տեղատարողությամբ ավտոբուսներով: Այս համատեքստում մշակել և հաստատել ենք Երևան քաղաքի երթուղային ցանցը, որի շրջանակում արդեն իսկ հայտարարել և իրականացնում ենք երթուղիների մրցույթները, որոնք կավարտենք մինչև այս տարեվերջ: Արդյունքում ներկայիս 2500 միկրոավտոբուսից մայրաքաղաքի երթուղիներում կմնա 1500 միկրոավտոբուս, փոխարենը ավելացնելով ավտոբուսների քանակը, որն այսօր օրեկան շահագործվող շուրջ 300-ից կհասցվի մինչև 750 ավտոբուսի:

Բացի այդ, տրանսպորտի բեռնաթափման նպատակով իրականացնում ենք նոր ավտոճանապարհների կառուցման աշխատանքներ: Մասնավորապես այս տարի կառուցվում են երկու մեծ ավտոճանապարհներ: Առաջինը Լենինգրադյան փողոցը Իսակովի պողոտային միացնող ավտոճանապարհն է, որը շահագործման կհանձնվի հաջորդ տարեսկզբին, և երկրորդը՝ Քանաքեռ - Զեյթունում Ուլնեցի-Ռուբինյանց փողոցներն իրար կապող արագընթաց ճանապարհը:

Ի դեպ, փողոցների բեռնաթափման տեսանկյունից մենք կարևորում ենք նաև ավտոկայանատեղիների ստեղծումը ու խրախուսում ենք հատկապես այն ներդրողներին, ովքեր մայրաքաղաքում ստորգետնյա ավտոկայանատեղիներ են կառուցում: Շատ կարևոր է, որ մեր համաքաղաքացիներն էլ իրենց հերթին սովորեն իրենց ավտոմենքենաները կայանել ավտոկայանատեղիներում:

-Կնշնանակի մայրաքաղաքի հատկապես բանուկ փողոցներում մենք այևս չե՞նք տեսնի կայանած ավտոմեքենաներ, մասնավորապես Վազգեն Սարգսյանի անվան նեղլիկ փողոցը կմաքրվի՞ ավտոմեքենաներից:

-Մենք Շահումյանի անվան հրապարակի հետ կապված ունենք որոշակի ծրագիր: Բանակցում ենք ներդրողների հետ, որպեսզի այդտեղ ունենանք ստորգետնյա ավտոկայանատեղի:

-Իսկ նոր շենք-շինություններ կառուցողներին պարտադրվու՞մ է ստորգետնյա ավտոկայանատեղի կառուցել:

-Մասնավորապես վերջին տարիներին բազմաբնակարան շենքերի և հասարակական շինությունների նախագծերի հաստատման կարևոր նախապայման է եղել ավտոկայանատեղի ունենալը: Երկրորդ պարտադիր պայմանն էլ եղել է հաշմանդամների համար նախատեսված մուտքեր ունենալը:

-Դուք Երևանի պատմության մեջ ամենաերիտասարդ քաղաքապետն եք: Ըստ էության Ձեզնից լուրջ սպասելիքներ ունեն հատկապես երիտասարդ երևանցիները: Ինչո՞վ և ինչպե՞ս եք պատրաստվում արդարացնել նրանց սպասումները: Որքանո՞վ են նրանք կարևորվում Ձեր կադրային քաղաքականության մեջ:

-Անշուշտ, երիտասարդներին աշխատանքով ապահովելուն ես կողմնակից եմ: Մենք բազմաթիվ մրցույթներ ենք հայտարարում և շատ հաճախ հենց երիտասարդներ են հաղթող ճանաչվում: Բայց ես նաև այն կարծիքին եմ, որ մեզ իրենց ոլորտում մասնագիտացած, փորձառու մարդիկ էլ են անհրաժեշտ: Իրականում նրանց կարիքը շատ կա, հենց թեկուզ նաև նրա համար, որ իրենց իմացությունն ու փորձը փոխանցեն նոր սերնդին:

-Պարոն Մարգարյան, նկատենք, որ Կենտրոն վարչական շրջանը բավականին հագեցած է ազատ ժամանցի կազմակերպման և զվարճանքի վայրերով, մինչդեռ մյուս վարչական շրջաններում այս մասով շոշափելի պասիվություն կա: Այս հանգամանքը Ձեզ համար խնդիր համարու՞մ եք և եթե այո, ապա ի՞նչ քայլեր եք նախատեսում ձեռնարկել այդ ուղղությամբ:

-Իրականում ասել, որ մնացած վարչական շրջաններում ընդհանրապես չկան նման վայրեր, կարծում եմ ճիշտ չի լինի: Բայցևայնպես դրանց ավելացումը ևս, այո, խնդիր է, որը պահանջում է լուծում: Երևան համայնքի համաչափ զարգացման մասին խոսելով նաև այս խնդիրը նկատի ունեի նշելով, որ յուրաքանչյուր վարչական շրջանում պետք է ստեղծենք նմանատիպ կենտրոններ: Դրա համար մեզ ընդամենը մի փոքր ժամանակ է պետք: Մեկ տարում դա չենք կարող կյանքի կոչել, բայց հույս ունեմ, որ կարճ ժամանակում մենք դա կյանքի կկոչենք:

-Գաղտնիք չէ, որ մարզերում համայնքների հոգսը երբեմն մարզպետները թեթևացնում են մարզի հանքարդյունաբերողների և մարզի գարծարարների աջակցությամբ: Նկատենք, որ այս առումով Դուք բավականին շահեկան վիճակում եք գտնվում. Հայաստանի օլիգարխները հիմնականում Երևանցիներ են, չասենք նաև մի շարք հայտնի գործարաներ: Որքանո՞վ է Ձեզ հաջողվում օգտագործել նրանց ռեսուրսներն ի նպաստ Երևանի ծրագրերի իրականացման և որքանո՞վ են իրենք պատրաստակամ մասնակից լինել Երևանի զարգացմանը:

-Այս հարցում քաղաքապետարանը միշտ էլ հայտարարել է, որ բաց է և պատրաստակամ՝ քննարկելու մայրաքաղաքի զարգացմանն ուղղված ցանկացած առաջարկ: Մեկ անգամ ևս կվստահեցնեմ բոլոր գործարարներին, ովքեր ցանկություն ունեն բարեկարգել, կանաչապատել տարածքները, ներդրումներ իրականացնել մայրաքաղաքում, որ մենք պատրաստ ենք քննարկել և մեր լիազորությունների շրջանակում աջակցել նրանց ծրագրերի իրականացմանը:

-Իսկ վերջին շրջանում եղե՞լ են նախաձեռնություններ, առաջարկներ հենց իրենց կողմից:

- Իհարկե եղել են, և մենք փոխհամաձայնեցված իրականացրել ենք բազմաթիվ ծրագրեր: