ԱԺ փոխնախագահ. Ադրբեջանն առավել սանձարձակ է դառնում
«Կարծում եմ, որ բավականին երկար ժամանակ միջազգային հարթակներում և, ինչու չէ, ՄԽ համանախագահների կողմից այսպես կոչված «պարիտետային» մոտեցում հանդես բերելու արդյունքում ագրեսոր Ադրբեջանի պաշտոնյաների հայտարարություներն օրեցօր ավելի սանձարձակ են դառնում» ,- Panorama.am-ի հարցին, թե ինչպես կմեկնաբանեք Ադրբեջանի փոխվարչապետ Ալի Հասանովի այն հայտարարությունը, որ եթե հայկական կողմը կառուցողական մոտեցում չորդեգրի, ապա մոտ ժամանակներս Ադրբեջանը «կազատագրի իր հողերը», ասաց ԱԺ Փոխնախագահ Հերմինե Նաղդալյանը:
«Ավելի սանձարձակ են դառնում նաև գործողությունները, քանի որ հաճախակիանում են կրակի ագտագործման դեպքերը, փոքր միջադեպերից անցնելով ավելի շատ զոհերով գործողությունների: Ճակատային գծում տեղ գտած միջադեպերի օբյեկտիվ քննության, կոնկրետ դեպքերի հետաքննության, մեղավորների բացահայտման և հստակ պատիժների անհրաժեշտության փոխարեն հնչեցվում են լղոզված հայտարարություններ «անկողմնակալության» տպավորություն ստեղծելու նպատակով, այն դեպքում, որ գոնե պետք էր հստակ ասել, թե որ կողմն է խուսափում և մերժում հետաքննության կատարումը» ,- ասաց նա:
Նրա խոսքերով, միջազգային կազմակերպությունները պետք է հստակ գնահատական տված լինեին դեռ այն ժամանակ, երբ Ադրբեջանը ընդունեց իր ռազմական դոկտրինը, որտեղ ամրագրեց խնդիրները ռազմական ճանապարհով լուծելու քաղաքականությունը:
«Վերջերս, թեև ուշացումով, բայց հնչեց ՄԱԿ–ի գլխավոր քարտուղար Բան Կի Մունի հայտարարությունը այն մասին, որ Ադրբեջանի կողմից սպառազինության մրցավազքը հատել է թույլատրելի սահմանները և միջազգային նորմերը:Բայց տարիներ տևող սպառազինվելու գործընթացն ուղեկցվել է լռությամբ և այսօր արդեն արդյունքում աղաղակող փաստեր են:
Բաքվում Եվրոնեսթի 2-րդ լիագումար նիստում Եվրամիության պատգամավորների առջև Ադրբեջանի նախագահի բացարձակ ռասիստական, քսենոֆոբիական բնույթի ելույթը և եվրոպացիների արձագանքը կամ ավելի շուտ «չարձագանքը» նման լռության ևս մեկ օրինակ է: Այդ լռության ներքո ստեղծվել է ահաբեկչության մի աննախադեպ իրավիճակ, երբ աշխարհի բոլոր հայերի կյանքը վտանգված է, քանի որ Ադրբեջանի նախագահը բացեիբաց հավանություն է տվել ապագա բոլոր «ռամիլ սաֆարովներին»»,- ասաց ԱԺ փոխնախագահը:
Հիշեցնենք, որ ԵԽԽՎ–ի ապրիլյան լիագումար նիստում Մեծ Բրիտանիայի ԱԳ նախարարը հիշեցրեց ադրբեջանցի պատգամավորներին, որ և՛ Ադրբեջանը, և՛ Հայաստանը ԵԽ–ին անդամակցելիս ստանձնել են կոնֆլիկտի խաղաղ կարգավորման պարտավորություն, ուստի որևէ կողմ չպետք է կատարի խաղաղ կարգավորմանը վնասող քայլեր:
«Հայաստանի Հանրապետությունը՝ ի դեմս նախագահ Ս.Սարգսյանի, բանակցային պրոցեսում հանդես են գալիս կոնստրուկտիվ և կոնֆլիկտի խաղաղ կարգավորման դիրքերից: Իսկ ինչ վերաբերում է այս հայտարարությանը, պիտի ասեմ, որ «հալվա–հալվա» կանչելով բերանդ չի քաղցրանա» ,- հավելեց նա:
Լրահոս
Տեսանյութեր
Ինչո՞ւ հանկարծ ՀՀ իշխանությունները որոշեցին խլել արցախցիների կենսաթոշակային խնայողությունները
