Ձեր վստահելի աղբյուրը

Եթե Սիրիայում ծայրահեղական ուժերը գան իշխանության, դա, միանշանակ, վատ կանդրադառնա բոլոր ազգային փոքրամասնությունների, այդ թվում հայերի վրա: Այդ մասին այսօր լրագրողների հետ հանդիպմանը հայտարարեց արաբագետ Սարգիս Գրիգորյանը:

Նրա խոսքով, այն, ինչ կատարվում է Սիրիայում առաջին հերթին ուղղված է Իրանի դեմ, ինչի հետևանքով, այս երկիրը, ի դեմս Սիրիայի, հնարավոր է կորցնի իր դաշնակցին Մերձավոր Արևելքում: «Սիրիայում այս իրավիճակը կարող է երկար ձգվել, և Իրանին հարվածը, որի մասին շատ է խոսվում, հնարավոր է հասցվի այն բանից հետո, երբ Սիրիայի հետ հարցերը լուծեն»,- նկատեց արաբագետը:

Սիրիայում որոշիչ, ըստ արաբագետի, կլինի միջին խավի դիրքորոշումը և եթե այդ զանգվածը ակտիվանա, ապա նրանք կկարողանան փոխել սիրիական ճգնաժամի ելքը:

Արաբագետը քիչ հավանական համարեց այն, որ ալևինների առանձին պետություն ստեղծվի` Լաթաքիա մայրաքաղաքով: Նշենք, որ Սիրիայի ներկայիս նախագահ Բաշար Ասադը ալևինների ներկայացուցիչ է:

Ըստ Գրիգորյանի, այս պահին հնարավոր չէ ասել, թե Սիրիայում Ասադից հետո ով կգա իշխանության, քանի որ ընդդիմությունն այնտեղ բաղկացած է բազմաթիվ խմբերից և ուժերից: