Ձեր վստահելի աղբյուրը

Վրաստանի ներքաղաքական զարգացումները, ինչպես և սպասելի էր, խորհրդարանական ընտրություններին ընդառաջ, ակտիվանում են:

Օգոստոսի 5-ին Վրաստանի ԿԸՀ-ում ավարտվել է 2012 թ. հոկտեմբերի 1-ին կայանալիք խորհրդարանական ընտրություններին մասնակցել ցանկացող կուսակցությունների հայտերի ընդունման ժամկետը: ԿԸՀ դիմած 41 քաղաքական կուսակցություններից 19-ն արդեն գրանցվել են, սակայն հիմնական պայքարը շարունակվում է երկու առաջատար քաղաքական ուժերի` իշխող «Ազգային շարժում» և ընդդիմադիր «Վրացական երազանք» կուսակցությունների միջև»:

Խորհրդարանական ընտրություններին մնացել է երկու ամսից քիչ ժամանակ. քաղաքական ուժերը փորձելու են անել հնարավորը` լավագույն արդյունքներն ապահովելու համար: Այդ նպատակին հասնելու ճանապարհին կկիրառվեն ինչպես սեփական ծրագրերը որպես լավագույն և իրենց` որպես ժողովրդավարական արժեքներին նվիրված կերպար ունեցող քաղաքական ուժերի ցուցադրության, այնպես էլ մրցակցին վարկաբեկելու տարբեր միջոցներ:

Ի դեպ, կարելի է ասել, որ նման գործիքներ որոշակիորեն արդեն իսկ կիրառվում են:

Վրաստանի իշխող կուսակցության ներկայացուցիչները «Վրացական երազանք» կուսակցություն հիմնադիր, միլիարդատեր Բ.Իվանիշվիլիին մեղադրում են Ռուսաստանի հետ համագործակցության մեջ` նպատակ ունենալով կարծիք ստեղծել, թե վերջինս «Ռուսաստանի մարդն է»:

Միլիարդատերն իր հերթին մեղադրում է Սահակաշվիլիին ռուսական զորքերի` Վրաստանի տարածք մուտք գործելու և երկրի հասարակության պառակտման համար: Սակայն, անհրաժեշտ է նշել, որ քաղաքական կուսակցությունների նման գործելաոճը կարող է զգալիորեն սրել ներքաղաքական վիճակը, ինչն էլ վտանգավոր զարգացումների պատճառ կարող է դառնալ հատկապես հետընտրական շրջանում և ապակայունացնել իրավիճակը երկրում:

Այս համատեքստում, կարելի է ասել, որ Վրաստանի իշխանությունները ռիսկի են գնում, քանի որ նախընտրական շրջանում երկրում տեղի ունեցող իրադարձությունները` կապված «Վրացական երազանքի» անդամների, այդ թվում` նաև Բիձինա Իվանիշվիլիի` բնակչության հետ հանդիպումների ընթացքում տեղի ունեցած բախումների հետ, որոնք ուղեկցվել են նաև որոշ ընդդիմադիրների ձերբակալություններով, բացասաբար կարող են ազդել նույն իշխող կուսակցության վարկանիշի վրա` ինչպես երկրի ներսում, այնպես էլ դրա սահմաններից դուրս: Շատ վտանգավոր է գործող իշխանությունների համար նաև իրենց կողմից իրականացվող խիստ հսկողությունը` ուղղված ընդդիմադիր ուժերի գործունեությանն ու տարբեր քաղաքական և հասարակական գործիչների քաղաքական կողմնորոշվածությանը:

Չնայած ճնշումներին, Իվանիշվիլիի ղեկավարած ընդդիմադիր կուսակցությունը երկրի գրեթե բոլոր բնակավայրերում հիմնում է գրասենյակներ, զուգահեռ շարունակվում է նաև քաղաքացիների` կուսակցությանն անդամագրման գործընթացը: Ըստ ընդդիմադիր մամուլում տարածված տեղեկությունների, որոնք, հիմնականում, հենվում են վերջերս Վրաստանում տարբեր միջազգային կազմակերպությունների կողմից անցկացված հարցումների արդյունքների վրա, նախկինի համեմատությամբ` մեծապես ավելացել է «Վրացական երազանքի» կողմնակիցների թիվը:

Ինչ վերաբերվում է մեր հայրենակիցներին, ապա պետք է նշել, որ հայկական համայնքն ընտրությունների ժամանակ սովորաբար պաշտպանում է գործող իշխանություններին, սակայն չի կարելի բացառել, որ Վրաստանում քաղաքական հետագա զարգացումներն այնպես դասավորվեն, որ վիրահայությունը կողմնորոշվի դեպի ընդդիմություն: Իհարկե, դա մեծապես կախված կլինի այն հանգամանքից, թե ինչ տեղ կհատկացնեն իշխող կամ ընդդիմադիր կուսակցություններն իրենց քաղաքական ծրագրերում վիրահայության, և հատկապես ջավախահայության խնդիրներին: