Ձեր վստահելի աղբյուրը

Ադրբեջանի ընդդիմադիր կառույցներին միավորող Հանրային պալատը քննարկել է ադրբեջանական բանակում տիրող իրավիճակը: Քննարկմանը մասնակցել են քաղաքական գործիչներ, ոչ կառավարական կազմակերպությունների ղեկավարներ եւ փորձագետներ: «Ազադլիգ»-ի փոխանցմամբ` ՀՊ համակարգման խորհրդի անդամ, Ադրբեջանի «Ժողովրդական ճակատ» կուսակցության առաջնորդ Ալի Քերիմլին հայտնել է, որ խիստ անհանգստացնող է հրադադարի ժամանակաշրջանում ադրբեջանական բանակում տեղի ունեցող մահերի չափազանց մեծ թիվը:

«Այս տարվա հունվարից մինչեւ օգոստոս 65 զինվոր եւ սպա է մահացել: Նրանցից միայն 13-ն են զոհվել հակառակորդի գնդակից: Մնացած 52-ի մահվան պատճառներն անհայտ են: Անցյալ տարի բանակի կորուստը կազմել է 99 զինծառայող: Հրադադարի ժամանակաշրջանում Ադրբեջանի տված կորուստները համեմատելի են արեւմտյան երկրներում մի շարք լայնամասշտաբ ռազմական գործողությունների ժամանակ տրված կորուստների հետ: Բանակում օրենքը, կանոնադրությունը չեն աշխատում, ղեկավարությանը բողոքելն էլ անիմաստ է դարձել: Բանակում սպայական անձնակազմը զինվորներին օգտագործում է իր մասնավոր նպատակների համար: Զինվորին մեծացրել ենք հայրենիքին ծառայելու, ոչ թե ինչ-որ մեկի տանը ծառա լինելու համար: Այս ամենի համար, իհարկե, պատասխանատու է պաշտպանության նախարարությունը եւ բանակի ղեկավարությունը, սակայն, միանշանակ է, որ բանակում առկա անմխիթար վիճակը Իլհամ Ալիեւի անօրինականության, օրենքը ոտնահարելու եւ ավտորիտար ղեկավարման արդյունքն է: Իլհամ Ալիեւը իրավիճակը շտկելու քաղաքական կամք չի դրսեւորում», -ասել է Քերիմլին:

«Թոշակառու եւ պաշտոնաթող սպաների միության» նախագահ Յաշար Ջաֆարլին հայտնել է, որ Ադրբեջանի բանակի մարտական պատրաստվածությունը ցանկալի մակարդակի վրա չէ, ինչի մեղավորը պաշտպանության նախարարությունն է:

Թոշակառու գնդապետ-լեյտենանտ, փորձագետ Ուզեիր Ջաֆարովը հայտարարել է, որ Ադրբեջանի բանակն այնպիսի մարդիկ են ղեկավարում, որոնք բանակից ոչինչ չեն հասկանում: «Բանակում այնքան գեներալներ կան, որ թվարկել հնարավոր չէ: Ինչպե՞ս կարող է պարտված երկիրն այդքան գեներալներ ունենալ: Եթե նախկինում գեներալի կոչում ուներ միայն նախագահի խորհրդականը, ապա այժմ գեներալներ են նաեւ խորհրդականի օգնականները: Գեներալների կոչումներ են տրվում անգամ Հեյդար Ալիեւի կողմից պաշտոնաթող արված սպաներին», -բողոքել է նա:

«Զինվորականների իրավունքների պաշտպանության կենտրոնի» նախագահ Թելման Աբիլովը ադրբեջանական բանակում մեծաթիվ մահերի պատճառը համարել է սպայական անձնակազմի ոչ արհեստավարժ լինելը: «Եթե բանակում մի փոքր արհեստավարժություն լիներ, ապա մահվան դեպքերը կրկնակի կնվազեին», -գտնում է նա:

Զինված ուժերի վետերանների հասարակական միության նախագահ Դաշդեմիր Ալիեւը ելույթում նշել է, որ 2003-2011 թթ-երին ադրբեջանական բանակում 547 մահվան դեպք է գրանցվել, որոնցից միայն 162-ն են մարտական կորուստ եղել: Ալիեւը նշել է, որ կորուստները ոչ կանոնադրական հարաբերությունների, սպաների կամայականությունների, կոռուպցիայի եւ կաշառակերության արդյունք են, իսկ զինվորներին հատկացված զորանոցները նախկինում գոմ են եղել:

Լրագրողների ռազմական հետազոտությունների «Դոկտրինա» կենտրոնի նախագահ Ջասուր Սումերենլին էլ հայտնել է, որ 2000-2012 թթ. ընթացքում ադրբեջանական բանակում 100 զինվոր ինքնասպանություն է գործել, որոնցից կեսի` այդ քայլին դիմելու պատճառն անհայտ է մնում:

Պաշտոնաթող գնդապետ, փորձագետ Շահմուրադ Մամեդովը հայտարարել է, որ Ադրբեջանի իշխանությունը զավթածները զավթել են նաեւ զինված ուժերը: «Պետական սահմանային ծառայությունում 6 տարի ծառայածը գեներալի կոչում է ստացել: Առեւտրից սկսել` եկել գեներալ է դարձել: Սահմանում զինվորները պոնիներով են շրջում, իսկ այդ ծառայության ղեկավարը ձիավարության ֆեդերացիայի նախագահն է», -հայտնել է նա:

Եզրափակիչ խոսքում ՀՊ համակարգման խորհրդի անդամ, «Մուսավաթ» կուսակցության առաջնորդ Իսա Ղամբարն էլ հայտարարել է, որ «իշխանությունը գիտի, որ եթե թերությունները վերացնի, կզրկվի ապօրինի եկամուտից»: