Ձեր վստահելի աղբյուրը

«Եթե այդ անձնավորությունները չեն ներկայանում մարդկային կերպարանքով, անուն ազգանունով, թեկուզ մտահոգ են ու քննարկում են անում, ցանկացած այդպիսի անհասցե, անանուն խմբակային գործողությունների հումորով եմ վերաբերվում»,- Panorama.am-ի հետ զրույցում, մեկնաբանելով մի խումբ պատմաբանների, արվեստագետների, գրողների, բանասերների կողմից նախօրեին կազմակերպած քննարկումն ու ընդունած որոշումը` բաց նամակ հղել ԳԱԱ ղեկավարությանը` պահանջելով Ցեղասպանության թանգարան-ինստիտուտի տնօրեն Հայկ Դեմոյանին ազատել պաշտոնից, ասաց Հայկ Դեմոյանը: Նշենք, որ, նման պահանջի հիմքն այն է, որ Հ.Դեմոյանն իր ատենախոսությունը գրել է ռուսերեն, բացի այդ աշխատանքում կան խեղաթյուրումներ, լեզվական սխալներ:

Ըստ նրա, այդ մարդկանց նման վարքագիծը նա համարում է պարապության և պահանջված չլինելու հետևանք: «Ցանկություն կա դաշտում երևալ` ինչ-որ մեկին թիրախավորելով, հայհոյելով, խնդիր բարձրացնելով, բայց հիմքում պարապությունն է»,- ասաց Հ. Դեմոյանը:

Իսկ թե ինչո՞ւ է ատենախոսությունը գրել ռուսերեն հարցին, նա պատասխանեց, որ օրենքը թույլ է տալիս: «Եթե այդ մարդիկ լինեին գրագետ, կհասկանային, որ Դեմոյանի որոշմամբ կամ ցանկությամբ չէր ատենախոսությունը գրել ռուսերեն: Գոյություն ունի կարգ ու դիմելով այդ կարգին՝ իրավունք էի ստացել այլ լեզվով գրել իմ աշխատանքը: Դա չի նշանակում, որ նսեմացրել եմ հայերենը կամ այդպիսի ցանկություն եմ ունեցել: Բացի այդ, ատենախոսության թեման` Թուրքիա, ղարաբաղյան հիմնահարց, շատ կարևոր է ու պետք է ավելի լայն լսարանի հասու լինի: Շուտով թարգմանվելու է նաև անգլերեն»,- ասաց Ցեղասպանության թանգարան-ինստիտուտի տնօրենը, ապա ընդգծեց, որ այդ մարդկանց համար հետաքրքիր չէ, երբ հղում ես տալիս օրենքին: