Ձեր վստահելի աղբյուրը

«Ես բնակարան չեմ վաճառել, քննությունը կպարզի»,-այսօր էլ Panorama.am-ի հետ զրույցում անդրադառնալով Բյուրեղավանում զինվորականի բնակարանը վաճառելու դեպքին, հերթական անգամ հայտարարեց քաղաքապետ Հակոբ Բալասյանը:

Հիշեցնենք, որ Կոտայքի մարզի Բյուրեղավան քաղաքի 1-ին հանրակացարանի բնակիչ Հերմինե Պետունցը, որը իր զինծառայող ամուսնու հետ այժմ ժամանակավոր բնակվում է Լեռնային Ղարաբաղում, «Առավոտ» թերթին տված հարցազրույցում հայտարարել էր, թե հանրակացարանի իր բնակարանը Բյուրեղավանի քաղաքապետը վաճառել է և այժմ իրենք կանգնած են փաստի առաջ:

«Ես զարմացա, անմիջապես վերադարձա Բյուրեղավան, տեսա՝ իրականում մեր դռան փականը կոտրել են, բացել են, իսկ բնակարանն էլ վաճառվել է Դերո անունով մեկին՝ 650 000 դրամով: Ինչպե՞ս կարելի է վաճառել բնակարանը, եթե ես իմ չորս երեխաների հետ հաշվառված եմ այդ բնակարանում, և բնակարանը պատկանում է ինձ»,- թերթին ասել է Հերմինե Պետունցը, ապա նաև ավելացրել, թե մինչ օրս իրեն չեն պատասխանել, թե որտեղ են գտնվում տնից հանված իրերը, մահճակալները, աթոռները, գորգը, հեռուստացույցը, այսինքն՝ գույքը:

Գլխավոր դատախազության մամուլի խոսնակ Սոնա Տռուզյանը Panorama.am-ին հայտնեց, որ փաստի առթիվ քրեական գործ է հարուցվել: Կոտայքի մարզի դատախազությունը Հերմինե Պետունցից դիմում է ստացել առ այն, որ 2005-ին Բյուրեղավանի քաղաքապետի կողմից իրենց ընտանիքին է հատկացվել նշված հանրակացարանի 14 սենյակը: Պետունցը նշել է, որ այդտեղ իրենք ապրել են մինչև 2009 թվականը, այնուհետև տեղափոխվել ու բնակություն են հաստատել ԼՂՀ-ում, քանի որ զինվորական ամուսինն այնտեղ է աշխատում: 2011-ին ընտանիքը տեղեկացել է, որ իրենց հատկացրած բնակարանը քաղաքապետարանը հատկացրել է մեկ ուրիշի:

Նյութերի նախապատրաստման ընթացքում, ըստ դատախազության, պարզվել է, որ քաղաքապետի խորհրդական Արթուր Ղալայանը, Բյուրեղավանի քաղաքապետի թիվ 8 կարգադրությամբ նշանակված լինելով համայնքային սեփականություն հանդիսացող հանրակացարանները հաշվառելու, բնակիչներին սենյակներ հատկացնելու փաստաթղթերը, սենյակների փաստացի օգտագործումը ստուգելու, ինչպես նաև պետական բաշխումը կազմակերպելու հանձնաժողովի նախագահ, առանց անձնագրային բաժանմունքում հարցում կատարելու զեկուցագիր է ներկայացրել քաղաքապետին, որ վիճարկվող 14 սենյակում հաշվառված անձինք չկան, որևէ մեկին հատկացված չէ:

Դրա արդյունքում քաղաքացի Բավական Հարոյանի կացարանի հարցը ժամանակավորապես լուծելու համար հանրակացարանի այդ բնակարանը հատկացվել է նրան: Այդ որոշումը կայացվել է 2010 թվականի սեպտեմբերի 14-ին կայացած համայնքի ավագանու նիստում:

Ստացվում է, որ 2005-ից այդ տարածքում հաշվառված Հերմինե Պետունցն ու նրա ընտանիքը զրկվել են բնակտարածության իրավունքից:

Նախապատրաստված նյութերի հիման վրա այս տարվա օգոստոսի 9-ին հարուցվել է քրեական գործ ոստիկանության Կոտայքի քննչական բաժանմունքում` հիշյալ հանձնաժողովի նախագահի պաշտոնական լիազորությունները չարաշահելու փաստի առթիվ /Քրեական օրենսգրքի 308 հոդված` 1. Պաշտոնատար անձի կողմից իր պաշտոնեական դիրքը ծառայության շահերին հակառակ օգտագործելը կամ ծառայողական պարտականությունները չկատարելը՝ շահադիտական, անձնական այլ շահագրգռվածությունից կամ խմբային շահերից ելնելով, որն էական վնաս է պատճառել անձանց, կազմակերպությունների իրավունքներին ու օրինական շահերին, հասարակության կամ պետության օրինական շահերին (գույքային վնասի դեպքում՝ հանցագործության պահին սահմանված նվազագույն աշխատավարձի հինգհարյուրապատիկի չափը գերազանցող գումարը կամ դրա արժեքը)՝ պատժվում է տուգանքով՝ նվազագույն աշխատավարձի երկուհարյուրապատիկից երեքհարյուրապատիկի չափով, կամ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ առավելագույնը հինգ տարի ժամկետով, կամ կալանքով՝ երկուսից երեք ամիս ժամկետով, կամ ազատազրկմամբ՝ առավելագույնը չորս տարի ժամկետով/:

Գործով տուժող է ճանաչվել Հերմինե Պետունցը: Նշանակվել են մի շարք հարցումներ`Բյուրեղավանի անձնագրային բաժանմունք և այլուր, պարզելու հանրակացարանում հաշվառված մարդկանց թիվը, պարզելու նաև արդյոք 2010 թվականին Բյուրեղավանի քաղաքապետարանի կողմից իրենց հարցում կատարվել է, թե՞ ոչ: Հարցման պատասխանները ստանալուց հետո այդ անձանց գործողություններին կտրվի իրավական գնահատական:

Նախորդող հրապարակումներ`
Զինվորականի տունը վաճառած ԲՀԿ-ական քաղաքապետը փախա՞ծ է

«Ըտենց բան չկա». Բյուրեղավանի քաղաքապետը թյուրիմացություն է համարում զինվորականի տունը վաճառելու մասին լուրը