Ձեր վստահելի աղբյուրը

Ռամիլ Սաֆարովի կողմից իրականացված ոճրագործությունը պաշտոնական Բաքվի պետական պատվերն էր: Անդրադառնալով հայ սպա Գուրգեն Մարգարյանին դաժանաբար սպանած Ռամիլ Սաֆարովին` Ադրբեջանին հանձնելու վերաբերյալ լուրերի ակտիվացմանը, լրագրողների հետ հանդիպման ժամանակ ասաց Բուդապեշտում Գուրգեն Մարգարյանի ընտանիքի շահերի ներկայացուցիչ, փաստաբան Նազելի Վարդանյանը։

«Ամբողջ դատական գործընթացին ադրբեջանական պետությանը գործուն մասնակցություն է ունեցել: Հենց այս գործընթացի հետ կապված Բուդապեշտում բացվեց ադրբեջանական դեսպանատուն: Բոլոր դատական նիստերին մասնակցում էին Ադրբեջանի նորաբաց դեսպանատան, ինչպես նաև թուրքական դիվանագիտական ներկայացուցչության աշխատակիցները: Դա խոսում է այն մասին որ և Թուքիան և Ադրբեջանը շահագրգռված էին, որպեսզի Ռամիլ Սաֆարովը ազատվեր պատժից կամ ստանար ավելի մեղմ պատիժ: Անցած 8 տարիների ընթացքում ես վերջնականպես համոզվել եմ այն բանում, որ սա եղել է պետական պատվեր: Ռամիլ Սաֆարովը կատարել է պետական պատվեր»,- նշեց Նազելի Վարդանյանը, հավելելով , որ այս մասին պարզ վկայում են Ադրբեջանի պետական և հասարակական անձանց կողմից Ռամիլ Սաֆարովի հերոսացմանը ուղղված արտահայտությունները և պաշտոնական Բաքվի ձեռնարկած քայլերը:

«Ադրբեջանի ՄԻՊ Սուլեյմանովան ասում էր, որ Ռամիլ Սաֆարովը երիտասարդության լավագույն օրինակ է, Ալիևն ասում էր` հայերին պետք է սպանել Ղարաբաղում, ԵՄ ներկայացուցիչն ասում էր, որ նման բան կարող է լինել Եվրախորհրդարանում ևս, սակայն այս հիստերիան մամուլում փոխվեց Ռամիլ Սաֆարովի ազատազրկման դատավճռից հետո: Այս ողջ ժամանակահատվածում մենք տեսնում ենք, որ պետությունը չի դադարում միջամտել այս գործին, որևէ առիթ բաց չի թողել այս մասին խոսելու համար»,- նշեց փաստաբանը:

Փաստաբանը պարզաբանեց, որ խոսքը չի գնում էքստրադիցիայի մասին, քանի որ էքստրադիցիայի են ենթարկվում հետախուզման մեջ գտնվող անձինք: Այս դեպքում խոսքը վերաբերում է 1983 թ. Ստրասբուրգում ընդունված «դատապարտված անձանց փոխանցման» վերաբերյալ կոնվենցիային, որով և հնարավոր է դատապարտված անձանց փոխանցումը, մեկ այլ պետության: Ըստ փաստաբանի` այս կոնվենցիայի 8-րդ կետում նշվում է, որ եթե երկիրը դատապարտված անձին հանձնում է մեկ այլ երկրի, ապա հանձնող երկրի տարածքում դադարեցվում է դատավճռի իրականացումը, և դատապարտյալի ազատ արձակվելու հարցը ամբողջովին փոխանցվում է ընդունող երկրին:

Վերջինիս խոսքերով, նման պայմաններում անընդունելի է հայրենիքում ազգային հերոսի մակարդակի բարձրացված ոճրագործի հանձնումը Ադրբեջանին: « ՀՀ պետական մարմինները պետք է շարունակեն պայքարը և բոլոր միջոցները ձեռնարկեն` Ռամիլ Սաֆարովին Ադրբեջան հանձնելը թույլ չտալու համար: Բոլորիս էլ պարզ է, որ Ադրբեջանում Ռամիլ Սաֆարովը պատիժը չի կրելու»,- նշեց փաստաբանը:

«Նույնիսկ Սաֆարովի փաստաբանը հայտարարում է, որ Ադրբեջանում հայ սպանելը հանցագործություն չէ: Այս պայմաններում Սաֆարովի հանձնումը Ադրբեջանին, նշանակում է ընդունած արդարացի դատավճռի ոտնահարում»,- հավելեց բանախոսը:

Իր հերթին, ասուլիսին ներկա «Ընդդեմ իրավական կամայականության» հիմնադրամի գործադիր տնօրեն, ՀՀ մարդու իրավունքների առաջին պաշտպան Լարիսա Ալավերդյանը նշեց, որ Ադրբեջանում երբևէ, թե պետական և թե հասարակական մակարդակով որևէ անգամ չի ընդունվել, որ Ռամիլ Սաֆարովի գործածը հանցագործություն է:

Վերջինս խոսքերով, անհրաժեշտ է այս ոճրագործության պատասխանատու կողմ հայտարարել նաև ադրբեջանական պետությանը, քանի որ միջազգային իրավական դրույթներում ողղակի կերպով նշում է, որ եթե պետությանը իր քաղաքացու գործողություները ընդունում է որպես իրենը և չի ենթարկում դատապարտման, ապա
«միջազգային պատասխանատվության է կրում սույն արարքի համար»:

Լարիսա Ալավերդյանը նշեց, որ դեռևս չկա պաշտոնական տեղեկատվություն այն մասին, թե Ադրբեջանը Սաֆարովին փոխանցելու խնդրանքով պաշտոնապես դի՞մել է հունգարական կողմին, թե` ոչ:

Վերջինս կոչ արեց ՀՀ պետական կառույցներին հարցումով դիմել Հունգարական կողմին առ այն թե, արդո՞ք ներկայումս նմանատիպ գործընթաց, մեկնարկել է, թե` ոչ:

Լարիսա Ալավերդյանը տեղեկացրեց, որ ավելի քան 80 հասարակական կազմակերպություններ միացել են ստորագրահավաքին` պահանջելով բացառել Հունգարիայից Ռամիլ Սաֆարովի էքստրադիցիան: Ըստ նրա` այս կոչին միացել են առանձին անհատներ ևս: