ՀՊՃՀ պրոռեկտորները նորեկ ուսանողներին ներկայացրել են ուսումնական գործընթացի առաձնահատկությունները

Հասարակություն 16:36 03/09/2012

ՀՊՃՀ պրոռեկտորները նորեկ ուսանողներին ներկայացրել են ուսումնական գործընթացի առաձնահատկությունները

Նոր ուսումնական տարին Հայաստանի պետական ճարտարագիտական համալսարանում (Պոլիտեխնիկ) սկսվել է ճարտարագիտական համալսարանի ղեկավարության, պրոֆեսորադասախոսական անձնակազմի և ուսանողության ներկայացուցիչների ու առաջին կուրսեցիների ավանդական հանդիպմամբ:

Ինչպես տեղեկացնում են ՀՊՃՀ (Պոլիտեխնիկ) հասարակայնության հետ կապերի և տեղեկատվության բաժնից, միջոցառմանը մասնակցելու և ՀՊՃՀ Կառավարման խորհրդի անունից նորաթուխ պոլիտեխնիկցիներին շնորհավորելու էր եկել նաև ՀՊՃՀ Խորհրդի նախագահ Սամվել Նիկոյանը:

«Սկսած եգիպտական բուրգերից մինչ գերժամանակակից համակարգչային աշխարհ, համոզվում ենք, որ հենց ինժեներական միտքն է ընկած մարդկության քաղաքակրթության զարգացման հիմքում: Ուստի ողջունելով ճարտարագիտական մասնագիտություն ընտրելու ձեր ցանկությունը` վստահեցնում եմ, որ դուք ընտրել եք աշխարհի ամենահեղինակավոր կրթությունը», ասել է նա:

ՀՊՃՀ ռեկտոր, պրոֆեսոր Արա Ավետիսյանը, շնորհավորելով ներկաներին նոր ուսումնական տարվա և պոլիտեխնիկական մեծ ընտանիքին միանալու կապակցությամբ, հորդորել է լինել հավակնոտ ու պահանջատեր ուսման և գիտելիքի հանդեպ, քանզի այդ ճանապարհով կհզորանա մեր հայրենիքը:

Հանդիպմանը ներկա էին նաև ՀՊՃՀ պրոռեկտորները, ովքեր ներկայացրել են ՀՊՃՀ-ում ուսումնական գործընթացի կազմակերպման առաձնահատկությունները, համալսարանում գործող զեղչերի ճկուն համակարգը, արտերկրում ուսանողների շարժունության ծրագրերը, ՀՊՃՀ-ում իրականացվող հսկայածավալ հետազոտական ծրագրերը և այլն:

ՀՊՃՀ գիտության և գիտատեխնոլոգիական համագործակցության գծով պրոռեկտոր Արեգ Գրիգորյանը, շնորհավորելով առաջին կուրսեցիներին, հույս է հայտնել, որ ներկաներից ոմանք տարիներ անց այս նույն դահլիճում կողջունեն նոր ընդունվածներին և կասեն. «Բարով եք եկել Հայաստանի պետական ճարտարագիտական համալսարան»:

Տոնական հանդիպումը շարունակվել է ՀՊՃՀ ֆակուլտետներում:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: