Ձեր վստահելի աղբյուրը

 ՀՀ նախագահի նստավայրի դիմաց այսօր հավաքվել էին ՀՅԴ երիտասարդական և «Նիկոլ Աղբալյան» ուսանողական միությունների անդամները: Նախատեսվում էր, որ Նախախագի նստավայր` ՆԱՏՕ-ի գլխավոր քարտուղար Անդերս ֆոգ Ռասմուսսենի ժամանումով հավաքը կդառնար բողոքի ակցիա, բայց նախատեսված հանդիպման հետաձգման մասին տեղեկատվության տարածվելուց հետո ցույցի մասնակիցները ցրվեցին:

 Panorama.am-ի լրագրողին ՀՅԴ երիտասարդական միության անդամ Արթուր Ղազարյանը ներկայացրեց նախատեսված բողոքի ակցիայի մասնակիցների պահանջները:

 «ՆԱՏՕ-ի գլխավոր քարտուղարին ներկայացնելու ենք հետյալ պահանջները. նախ` կոշտ դիրքորոշում հայտնի Հունգարիայի նկատմամբ, որը իրականացրեց այս անմարդկային, չսպասված բանը, երկորդը`  վերանայել Ադրբեջանի հետ «գործընկերություն հանուն խաղաղության» գործողությունների ծրագիրը, և երրրորդը` որպես 2004 թվականին` ՆԱՏՕ-ի դասընթացների շրջանակներում այդ սահմռկեցուցիչ դեպքերի պատասխանատու մարմին` հետամուտ լինի, որ մարդասպան, ողորմելի Սաֆարովը կրի իր պատիժը:

Մենք գիտենք, որ ՆԱՏՕ-ն որպես ռազմաքաղաքական դաշինք լուրջ լծակներ ունի, ուստի մեր պահանջները իրատեսական են, մանավանդ որ, նա ներկայանում է որպես խաղաղասիրության և անվտանգության երաշխավորն աշխարհում, սակայն իր աչքի առջև կատարվում են նման բաներ: Բացի այդ` կան նաև այլ հարցեր, մանավանդ այն, թե ինչու Հյուսիսատլանտյան դաշինքը չի արձագանքում դեպքի կապակցությամբ: Այդ դեպքում կասկածի տակ են դրվում մեր իսկ կողմից կատարվող ծրագրերը, այդ թվում նաև մեր խաղաղապահների գործողությունները: Եվ եթե մեր պահանջներն իրականություն չդառնան, օրակարգային հարց ենք դարձնելու Հայաստան – ՆԱՏՕ գործընկերության խնդիրը»,- պարզաբանեց նա:

 Բանախոսը տեղեկացրեց, որ Անդերս ֆոգ Ռասմուսսենի ժամանելուց հետո երիտասարդները կրկին կհավաքվեն: Նա նաև նշեց, որ դեռ պահանջները կներկայացվեն հայտարարության տեսքով, անհրաժեշտության դեպքում հայտարարության տեքստը կփոխանցվի նաև նամակով:  

 Ըստ Արթուր Ղազարյանի` ակցիան կկազմակերպվի նաև վաղը առավոտյան ոչ միայն ՀՀ նախագահի նստավայրի, այլ նաև` Երևանի պետական համալսարանի կենտրոնական մուտքի մոտ, քանի որ նախատեսված է ՆԱՏՕ-ի գլխավոր քարտուղարի այցը նաև Մայր բուհ: «Որոշ հարցադրումներ կփորձենք ներկայացնել ուսանողների հետ Ռասմուսսենի հանդիպման ժամանակ», -ասաց նա:  

Ակցիայի կազմակերպիչներից «Նիկոլ Աղբալյան» երիտասարդական միության անդամ Վահագն Ասրյանի խոսքերով` միայն հայտարարությամբ չեն բավարարվելու:

« Մենք միայն հայտարարությամբ չենք բավարարվելու, գնալու ենք մինչև վերջ և պահանջելու ենք Հունգարիայի անդամակցության կասեցումը ՆԱՏՕ-ից և ԵԽ-ից, ինչպես նաև` Ադրբեջանի մասնակցությանը կասեցումը ԵԽ-ից: Այդ պահանջով նամակ ենք ուղարկելու ԵԽ-ին: Բացի այդ, պահանջելու ենք, որ հետաքննություն սկսվի»,- ասաց նա և հավելեց, որ նշված պահանջների կատարումը առավել հավանական է դառնում այն պարագայում, որ տարբեր ԶԼՄ-ներ, դիվանագետներ, պետական այրեր արդեն բացասական կերպով են անդրադարձել երևույթին:

 Նշենք, որ վաղը` ժամը 10:00-ին ԵՊՀ «Երիտասարդ համալսարանականների միավորում» կազմակերպության 1000-ից ավել անդամները բողոքի ակցիայով են դիմավորելու ՆԱՏՕ-ի գլխավոր քարտուղար Անդերս ֆոգ Ռասմուսենին, որը հանդիպելու է ԵՊՀ պրոֆեսորադասախոսական անձնակզմի հետ:

 Երիտասարդ համալսարանականները պահանջում են ՆԱՏՕ-ից խստորեն դատապարտել ադրբեջանցի մարդասպանի արտահանձման և ազատ արձակման փաստը, ինչպես նաև դադարեցնել Ադրբեջան-ՆԱՏՕ համագործակցությունը: