Ձեր վստահելի աղբյուրը

ԵՊՀ ժամանած ՆԱՏՕ-ի գլխավոր քարտուղարին համալսարանի կենտրոնական մասնաշենքի դեմ բողոքի ակցիայի մասնակից ուսանողներն ու երիտասարդները դիմավորեցին «ա-մոթ», «ար-դա-րութ-յուն» բացականչություններով: Ի պատասխան բացականչություններին Անդերս Ֆոգ Ռասմուսենը, իջնելով մեքենայից, ձեռքով ողջունեց ակցիայի մասնակիցներին, ապա մտավ ԵՊՀ կենտրոնական մասնաշենք, որի գիտխորհրդի դահլիճում նախատեսված է ուսանողների հետ հանդիպում:

Բողոքի ակցիայի մասնակցում են նաև ՀՅԴ, ՀՀԿ երիտթևերի անդամները: Ակցիայի մասնակիցներն ասում են, որ իրենք ցանկանում են անձամբ ներկայացնել Ռասմուսենին հայ երիտասարդության պահանջները` դատապարտել Ադրբեջանի քայլը, Հունգարիայի գործողությունները, տալ հստակ գնահատական տեղի ունեցածին:

Երիտասարդները բողոքի են եկել անգլիալեզու ցուցապաստառներով` «Ամոթ», «Հունգարիան արժե 2 մլն եվրո, իսկ որքան արժե ՆԱՏՕ-ն», «Ադրբեջանում հայի համար տեղ չկա» և այլ գրություններով:

ՆԱՏՕ-ի գլխավոր քարտուղարը Հայաստանում է տարածաշրջանային այցի շրջանակում: Այսօր նախատեսված են նրա հանդիպումները երկրի ղեկավարի, ԱԳ և պաշտպանության նախարարների հետ: Սերժ Սարգսյանի հետ հանդիպումից հետո նախատեսված է համատեղ ասուլիս:

Հիշեցնենք, որ օգոստոսի 31-ին Հունգարիայի իշխանությունները Ադրբեջանին հանձնեցին Ռամիլ Սաֆարովին, ով 8 տարի առաջ ձմռանը կացնահարել էր հայ սպա Գուրգեն Մարգարյանին: Նրանք երկուսն էլ Բուդապեշտում էին` մասնակցելու ՆԱՏՕ-ի «Համագործակացություն հանուն խաղաղության» ծրագրի շրջջանակում անցկացվող անգլերենի դասընթացներին: Սաֆարովի` Բաքու հասնելուն պես այդ երկրի ղեկավար նրան ներում շնորհեց, մայորի կոչում տվեց, բնակարան նվիրեց, մարդասպանին հարևան երկրում դիմավորեցին որպես հերոսի…