Ձեր վստահելի աղբյուրը

Հոկտեմբերի 1-5-ը Ստրասբուրգում կգումարվի ԵԽԽՎ աշնանային նստաշրջանը, որը հոյակապ առիթ է բարձրաձայնելու վերջին իրադարձությունները այդ հարթակում. «Բնական է, մեր պատվիրակության հիմնական խնդիրներից մեկը պետք է լինի Ադրբեջանի և Հունգարիայի միջև տեղի ունեցած խայտառակ գործարքը քննարկման առարկա դարձնել թե հանձնաժողովներում, թե լիագումար նիստում: Համենայնդեպս հենց երկուշաբթի օրը, նստաշրջանի առաջին օրը, երբ նախատեսված է ազատ քննարկումների ռեժիմը, ես արդեն իսկ հայտ եմ ներկայացրել ելույթ ունենալու և բնականաբար բարձրաձայնելու եմ այս խայտառակ գործարքի մասին»,- Panorama.am-ի հետ զրույցում ասաց ԲՀԿ խմբակցության քարտուղար, ԵԽԽՎ-ում հայկական պատվիրակության անդամ Նաիրա Զոհրաբյանը:

Պատգամավորը հիշեցրեց, որ մարդասպան Սաֆարովին Ադրբեջանին հանձնելու կապակցությամբ ինքը նամակ էր հղել ԵԽԽՎ նախագահ Մինյոնին, ԵԽ նախագահ Շուլցին, «Եվրանեսթ» ԽՎ համանախագահ Վիգենինին և նշեց, որ այդ բոլոր կառույցներում նա պահանջելու է, որ լայն քննարկման առարկա դառնա այդ հանցավոր գործարքը. «Այս նստաշրջանի հիմնական խնդիրը պետք է լինի այն, որպեսզի միջազգային կառույցներն ու միջազգային հանրությունը գնահատական տան թե տոտալիտար Ադրբեջանի, թե ՆԱՏՕ-ի ու ԵՄ-ի անդամ երկիր Հունգարիային: Եվ ընդհանրապես քննարկի` իրավունք ունեն այդ երկրները լինելու և մնալու եվրոպական ընտանիքում»,- տեղեկացրեց Նաիրա Զոհրաբյանը:

Ինչ վերաբերում է հենց նստաշրջանի օրակարգին, ապա դրանում ներառված հարցերը ևս այնպիսի շեշտադրումներ ունեն, որ հայկական պատվիրակությունը կարող է օգտագործել` հիշյալ հարցը բարձրաձայնելու համար: Ն.Զոհրաբյանը նշեց, որ մասնավորապես նախատեսված է զեկույց Մարդու իրավունքներն ու ժողովրդավարությունը Եվրոպայի անդամ երկրների արտաքին քաղաքական օրակարգերում. «Այս զեկույցը ևս հրաշալի առիթ է լինելու խոսել Ադրբեջանի և Հունգարիայի արտաքին քաղաքական խայտառակ օրակարգերի մասին, երբ նրանց օրակարգը ձևավորվեց հրեշի պաշտպանությամբ ու հրեշին առուվաճառքի հանելով»,- նշեց նա ու ավելացրեց, որ այս զեկույցի քննարկմանը ևս թե ինքը, թե պատվիրակության այլ անդամներ ասելիք կունենան:

Կա նաև կարևոր մի նախագծի քննարկում ևս` քաղաքական բանտարկյալի ձևակերպում: Ակնկալվում է, որ այս հարցը բուռն քննարկումներ կծավալի, քանի որ ամառային նստաշրջանում`իրավական հարցերի հանձնաժողովում բազմաթիվ պատգամավորներ դրա շուրջ, նշեց մեր զրուցակիցը, արդեն իսկ ջերմեռանդությամբ հասցրել են պաշտպանել Ադրբեջանին, ինչպես չէին պաշտպանի սեփական մորն ու զավակին. «Եվ ընդհանրապես, որպես ԵԽԽՎ քաղաքական հանձնաժողովի անդամ իմ հանձնաժողովում խոսելու եմ եվրոպական կառույցների երկակի ստանդարտների կիրառման մասին: Որ եվրոպական կառույցների երկակի ստանդարները ևս իրենց մեղավորությունն ունեն, որ Ադրբեջանը` Ալիևը կարողացավ ուղղակի թքել եվրոպական կառույցների վրա և հասնել նրան, որ իր հրեշին էքստրադիցիայի ենթարկեն: Այո, այստեղ կա նաև եվրոպայի կառույցների թողտվությունը , մեղավորության չափաբաժինը»:

Ն.Զոհրաբյանը հերթական անգամ կրկնեց` ժամանակն է, որ Հայաստանն այդ կառույցներում խոսի բաց և առարկաները կոչի իր անուններով ու մատնանշի Եվրոպայի թերացումներին: Իսկ թերացումն այն էր, որ նրանք տևական ժամանակ ուղղակի աչք են փակել Ադրբեջանի խայտառակ գործողությունների վրա ու նաև աչք են փակել Ադրբեջանում տիրող հակաժողովրդավարական իրավիճակի վրա. «Պատահական չէ, որ Ադրբեջանում ժողովրդավարական ինստիտուտների վերաբերյալ զեկույցը, որի հեղինակն են ԵԽԽՎ Ադրբեջանի հարցով համազեկուցողները, հենց Ադրբեջանի հասարակական գործիչ Լեյլա Յունուսը որակել է խայտառակ կաշառված զեկույց եվրոպացի պատգամավորների կողմից, որ նրանք ուղղակի խեղաթյուրել են Ադրբեջանում տիրող հակաժողովրդավարական իրողությունը ու փորձել են այն սքողել տարբեր մանիպուլյատիվ հայտարարություններով»,- շարունակեց ԵԽԽՎ-ում հայկական պատվիրակության անդամն ու կրկնեց` ժամանակն է, որպեսզի ԵԽԽՎ-ն, «Եվրանեսթ»-ը, միջազգային այլ կառույցներ հստակ գնահատական տան Ադրբեջանին: