Ձեր վստահելի աղբյուրը

Ստամբուլի Թաքսիմ հրապարակում «Նոր Զարթոնք» նախաձեռնության կողմից ակցիայի շրջանակներում մարդու իրավունքների պաշտպանության ակտիվիստները ցույց են անցկացրել հայազգի զինծառայող 25-ամյա Սևակ Շահին Բալըքչըի սպանությունն իրականացրած թուրք զինվոր Քվանչ Աղաօղլուին ազատ արձակելու կապակցությամբ: Այս մասին գրում է «bianet.org» կայքը:

Տեղեկատվության համաձայն, ցույցին մասնակցել է մոտ 500 մարդ, դրանց թվում սպանված հայազգի զինվորի հարազատներն ու ընկերները: Ցուցարարները հայերեն, թուրքերեն և քրդերեն լեզուներով լոզունգներ են հնչեցրել ցույցի ընթացքում:

Բացի այդ, «Մենք բոլորս Սևակ ենք, մենք բոլորս հայ ենք», «Մարդասպան պետությունը պատասխան է տալու», «Սևակ, մենք երբեք քեզ չենք մոռանա» բացականչություններով երթ է ընթացել Ստամբուլի կենտրոնական փողոցներում:

Ցույյցի մասնակիցները ընդգծել են, թե Սևակի սպանությունն համընկել է Հայոց Ցեղասպանության 96-րդ տարելիցի հետ և կտրականապես մերժել են պաշտպանական կողմի այն վարկածը, թե սպանությունը դժբախտ պատահարի հետևանք է եղել:
«Մեկ անգամ ևս ապացուցվեց, որ հայ լինելը մեծ գին ունի, որ ռասիզմը խլեց նրան մեզանից»,-հնչեցվել է ակտիվիստների կողմից ընթերցված հայտարարությունում:

Թուրքիայի քաղաքացի ազգությամբ Սևակ Շահին Բալըքչըի սպանվել էր 2011 թ. ապրիլի 24-ին իր զինակից Քվանչ Աղաօղլուի կողմից: Պաշտոնական վարկածով սպանությունը տեղի է ունեցել կատակի արդյունքում, «պատահաբար» արձակված գնդակից: Սևակի հարազատները, մինչդեռ, պնդում են, թե Սևակին դիտավորյալ են սպանել նրա հայ լինելու համար:

Իրավապաշտպանները նաև արձանագրել են դատական գործընթացի ընթացքում արձանագրված խախտումների բազում դեպքեր, այդ թվում վկաների անտեսում, նախապես արձանագրված վկայությունների փոփոխություն և այլն: Դատական գործընթացը ընթացքի մեջ է, սակայն առաջին նիստից հետո Աղաօղլուի կալանքի սանկցիան փոխվել էր, ինչն առավել մեծ զայրույթի ալիք էր բարձրացրել: