Ձեր վստահելի աղբյուրը

Կենտրոնական ընտրական հանձնաժողովը հրապարակել է  նախօրեին տեղի ունեցած տեղական ինքնակառավարման մարմինների ընտրությունների նախնական արդյունքները: Ըստ հանձնաժողովի հրապարակած տվյալների, Կապանի քաղաքապետ է ընտրվել Աշոտ Հայրապետյանը, նա ստացել է 10 261 ձայն: Նրան սատարում էր ՀՀԿ-ն:

Սյունիքի մյուս քաղաքում` Քաջարանում ընտրվել է Վարդան Գևորգյանը: Նա ևս ՀՀԿ թեկնածուն: Ագարակում քաղաքապետ է ընտրվել ՀՀԿ-ական Մխիթար Զաքարյանը: Նշենք, որ երեքն էլ քվեարկության օրը առանց մրցակից էին մնացել:
Դաստակերտում հաղթել է ՀՀԿ թեկնածուն` Նաիրի Ֆիլոսյանը: Նա գործող քաղաքապետն է:

Սիսիանում ընտրվել է գործող քաղաքապետ Աղասի Հակոբջանյանը: Նա ԲՀԿ թեկնածուն էր: Այս համայնքում քաղաքապետի պաշտոնի համար պայքարում էին նաև անկուսակցական Հրաչիկ Խաչատրյանը և ինքնառաջադրված դաշնակցական Տիգրան Պողոսյանը:

Մեղրիում, ըստ նախնական տվյալների, հաղթողը Արշավիր Հովհաննիսյանն է: Նա անկուսակցական է, անհատ ձեռնարկատեր: Գործող քաղաքապետ, Հանրապետական կուսակցության սատարած թեկնածուն` Սերգեյ Հայրապետյանը 113 ձայնով քիչ է ստացել Արշավիր Հովհաննիսյանից: Մյուս թեկնածուն` ինքնառաջադրված ՀՀԿ-ական Միշա Հովհաննիսյանը ստացել է ընդամնեը 456 ձայն:

Հիշեցնենք, որ սեպտեմբերի 9-ին ՏԻՄ ընտրություններ էին Արարատի, Արմավիրի, Լոռիի, Շիրակի և Սյունիքի մարզերում: Ընդհանուր առմամբ, ՏԻՄ ընտրություններ են անցկացվել Արարատի մարզի 97 համայնքներից 86-ում, Արմավիրի 97 համայնքներից 93-ում, Լոռու 113 համայնքներից 96-ում, Շիրակի 119 համայնքներից 113-ում, Սյունիքի 109 համայնքներից 94-ում:

Համայնքի ղեկավարի ընտրություններ են կայացել տվյալ մարզերի 18 քաղաքային համայնքներում: Քաղաքապետ են ընտրել Սյունիքի մարզի Կապան, Սիսիան, Մեղրի, Քաջարան, Ագարակ և Դաստակերտ, Արարատի մարզի Վեդի և Մասիս, Արմավիրի մարզի Մեծամոր և Էջմիածին, Շիրակի մարզի Գյումրի և Արթիկ, Լոռու մարզի Վանաձոր, Ստեփանավան, Տաշիր, Ախթալա, Թումանյան և Շամլուղ համայնքներում:

Ինչպես ավելի վաղ ներկայացրել էր Կենտրոնական ընտրական հանձնաժողովի նախագահ Տիգրան Մուկուչյանը, համայնքի ղեկավարի և ավագանու անդամության համար կպայքարի 4789 թեկնածու՝ որպես համայնքի ղեկավար 714 թեկնածու և ավագանու` 4073:

ՏԻՄ ընտրություններում ամենաշատ թեկնածուներ առաջադրել է Հանրապետական կուսակցությունը` 342-ը որպես համայնքի ղեկավարի, 1001-ը` ավագանու թեկնածու: Երկրորդ տեղում «Բարգավաճ Հայաստանն» է. ԲՀԿ-ն առաջադրել է 48 թեկնածու համայնքի ղեկավարի պաշտոնի համար և 239-ը` ավագանու անդամ: «Օրինաց երկիր» կուսակցությունից առաջիկա ընտրություններում պայքարում էին 62-ը` 12-ը համայնքի ղեկավարի պաշտոնի համար, 50-ը՝ ավագանու անդամության: