Ձեր վստահելի աղբյուրը

Եթե Ադրբեջանը Թուրքիայի հետ վերացնի վիզային ռեժիմը, իսկ Իրանի հետ ոչ, ապա վերջինս Ադրբեջանին կարգելի իր տարածով կապ հաստատել Նախիջևանի հետ:
Այդ մասին նշված է իրանական «արաննյուզ.իռ» կայքում թողարկված հոդվածում:

Տեղեկատվության մեջ նշվում է, որ Իզմիրում Թուրքիայի վարչապետ Ռեջեփ Թայիփ Էրդողանի նախագահությամբ տեղի ունեցած թուրք-ադրբեջանական համաժողովի ընթացքում, ի թիվս այլ հարցերի, քննարկվել է նաև Ադրբեջանի կողմից Թուրքիայի քաղաքացիների համար վիզային ռեժիմը վերացնելու մասին հարցը:

«Հաշվի առնելով Հայաստանի և Ադրբեջանի միջև պատերազմի վերսկսման հավանականությունը՝ այդ պարագայում Ադրբեջանը ստիպված կլինի Նախիջևանի հետ կապն ապահովելու համար օգտագործել Իրանի տարածքը»:

Հիշեցնենք, որ վերջերս Իրանի Մեջլիսի ազգային անվտանգության և արտաքին քաղաքականության հարցերով հանձնաժողովի փոխնախագահ Հոսեյն Էբրահիմին, անդրադառնալով Իսրայելի և Ադրբեջանի միջև վերջերս կնքված ռազմական համագործակցության մասին պայմանագրին, նշել էր, որ Իրանը Նախիջևանի նկատմամբ պետք է վերանայի իր քաղաքականությունը:

Նախիջևանյան թեմայի առնչությամբ՝ իրանական «ՖԱՐՍ» լրատվական գործակալությունն էլ գրել էր, թե Նախիջևանն Իրանի շնորհիվ է, որ զերծ է մնում հումանիտար աղետից:

Նախորդող տեղեկատվություն՝ «Թեհրանն այսօր». Նախիջևանի հարցն Ադրբեջանին ստիպում է հաշվի նստել Իրանի հետ