Ձեր վստահելի աղբյուրը

Լյուքսեմբուրգի Մեծ Դքսության փոխվարչապետ, արտաքին գործերի նախարար Ժան Ասելբորնին այսօր Երևանում ԱԳ նախարար Էդվարդ Նալբանդյանի հետ համատեղ ասուլիսում մի քանի ուղերձ հղեց, մեկը` Հունգարիայի ու Ադրբեջանի, մյուսը` Թուրիքիայի իշխանություններին:

«Մարդուն կացնահարելը չի կարող դիտվել որպես հերոսություն»,-իր մասնավոր կարծիքը հայտնեց ԱԳ նախարարը, ավելացնելով, որ այդ կարծիքին են նաև ԵՄ-ում: Լյուքսեմբուրգի փոխվարչապետի խոսքով, Կիպրոսում ԵՄ անդամ երկրների արտաքին գործերի նախարարների հավաքի ժամանակ Հունգարիայի ԱԳ նախարարը ափսոսանք է հայտնել տեղի ունեցածի առթիվ ու նշել, թե իր երկիրը մտադրություն չի ունեցալ ցավ պատճառել Հայաստանին: «Ես կարծում եմ, այդ պահին նա ասաց այն, ինչ զգում էր»,-ասաց Ժան Ասելբորնը:

Ժան Ասելբորնին անդրադառնալով Թուրքիային, նշեց, որ Լյուքսեմբուրգը` որպես ԵՄ անդամ երկիր բանակցություններ է վարում այդ երկրի հետ: «Ունեմ նաև ուղերձ Թուրքիային` անել ամեն ինչ, որպեսզի Հայաստանի ու Թուրքիայի միջև ստորագրված արձանագրությունները վավերացվեն: ԵՄ-ում բոլոր այս նույն մտայնությամբ ենք առաջնորդվում»,-նշեց եվրոպացի պաշտոնյան:
Առավոտյան Լյուքսմեբուրգի փոխվարչապետը Ծիծեռնակաբերդում հարգել է Օսմանյան Թուրքիայի կողմից իրականացրած Հայոց Ցեղասպանության անմեղ զոհերի հիշատակը, եղել է նաև Ցեղասպանության թանգարանում:

«Թանգարանում տեսածից շատ հուզված եմ: Լուսանկարները, որ տեսա…Դեռևս աչքիս առաջ է այն լուսանկարը, որտեղ մայրն է` գրկած երկու երեխաներին: Նրանցից մեկն արդեն մահացած է: Հուսանք, որ Թուրքիան բավականաչափ ուժ կունենա ընդունել ճշմարտությունը, և բոլորս կանենք ամեն ինչ` որպեսզի կանխենք նմանօրինակ վայրագությունները»,-ասաց հյուր պաշտոնյան: